sonin.mn
Сэтгэгдэл (83)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Харин энэ удаа Орос нь нутаг дэвсгэртээ байгаа стратегийн объектуудыг хамгаалах чадваргүй болж байгаа тухай хэдэн мэдээг хөрвүүлье.

 

Фронтын байдал тун хүнд байна. Хоногтоо заримдаа 140 хүртэл байлдаан тулалдаан өрнөж байна. Гэхдээ оросын цэргийн хохирол ямагт давна. Хоногтоо 1000 орчим цэргээ хядуулна. Путин цэргээ атаканд зүгээр л хаяна.


Зүйрлүүлбээс Сталинградын тулалдаан шиг цэргийнхээ хамаг сумыг нь дуустал нь галлуулаад махан овоо босгож давшуулах. 1942-1943 оны өвөл болсон явдал давтагдах магадлалтай. Махан овоо босгосон улаан армийн нуранги балгас дээр эзлээд бэхжээд авсан германы цэргийг ид өвөл болонгуут хөлдөөж алах тактик сонгож ялснаас бус цэргийн урлагийн гайхамшгийг үзүүлээгүй, олигтой байлдаж шальсан юмгүй хэмээн оросын цэргийн түүхчид өөрсдөө ярьж бичдэг болсныг эргэж сануулмаар. “Сая сая улаан цэргийг Сталин немцийн танкны гинжин дор дайруулж булшилсан” хэмээн Оросын ТВ-ийн ток-шоугаар В.Жириновский хашгачиж байсан нь одоо Украины фронт дээр мэдрэгдэж байна. Украинтай дайтаж байгаа орос цэргүүд фронт дээр командлагч захирагч нараа буудаж алсан тухай хэд хэдэн эвгүй мэдээ чих дэлсэв. Махан шуурганд орж, ясаа тавихыг тушаахад нь хариуд нь цэргүүд тэгж хөдөлсөн тухай www.dialog.ua/war/ сайтад бичжээ.


 Твиттерт @batengineer гэдэг хаягнаас инженер Бат гэдэг хүн ингэж бичжээ:


-Украиныг дэмжигчид очоод байлд гэх юм. Оросыг дэмжигчид ч бас фронтод нь очоод байлд. Хэнд нь хэн яаж хандахыг харцгаая. НАТО-гийн хангамжтай Украины арми хүнээ гамнаж, дроноор байлддаг. Харин Орос та нарыг зүгээр л махан овоо болгохоор пулемётын ам руу тууж оруулна гэжээ.

 

Хүн давалгаандаа Оросын командлал найдаад байх шиг. Гэвч тэдний ар талд юу өрнөв? Ростов мужийн “Морозовськ” цэргийн аэрдром руу украины дронууд довтолжээ. Тэнд оросын Су-34 онгоцууд байрладаг ба тэнд Х-59 пуужин, КАБ ба ФАБ бөмбөгтэй агуулах шатаж байна гэж нутгийн оршин суугчид жиргэжээ. Гэмтсэн, эргэж ашиглах аргагүй болсон Су-34 ганц нэгээр тоологдоно. Нислэгийн удирдлагын төвийг устгажээ. Украины дроноос өрсөж агаарт хөөрөхгүй бол аэрдромд гэмтэхгүй үлдэх онгоц байхгүй.


Тэр явдлыг залгаад ATACMS пуужингууд түр эзлэгдсэн Крымд оросын агаарын довтолгооноос хамгаалах системийн “С-400 Триумф” пуужингийн хөөргөгч суурь 4-ийг газар дээр нь устгав. Крым ба Украинтай хил залгаа оросын мужуудад гал түймэр энд тэндгүй дүрэлзсэн хиймэл дагуулын зураг сайтуудад олон явж байна.

 

Крымд түймэр асч байх хойгуур украины шунгагч сум ОХУ-ын Хар тэнгисийн флотын бахархал болох “Ростов-на-Дону” шумбагч онгоцыг устгажээ. Өмнөхөн нь Мурманск дахь “Оленя” авиабаазад бөмбөгдөгч онгоцуудыг устгасан нь Украинд ирэх агаарын цохилтыг дор хаяж хэд хоногоор саармагжуулав.


Тун удахгүй украины нисэх хүчний F-16 онгоцууд оросын фронтын бөмбөгдөгч Су-34, Су-35 онгоцуудыг агаарт зомгол болгохыг бид үзэх болох нь.

 

Путины хамгийн том зорилго бол Украиныг ямар ч хамаагүй үнээр хяналтандаа авах явдал. Наанадаж Донецк, Луганск мужуудын засаг захиргааны баруун хилд хүрэх явдал. Тэр нь бүтэлгүйтсэн ч үргэлжлүүлэн давшсаар хохирсоор гэхдээ ганц нэг метр ахисан байдалтай байна. Харин Харьков мужид “буфер бүс” байгуулна гэсэн оролдлого нь бүтэлгүйтсэн. Фронтын шугам Оросын хил дотор ороод ирлээ. Оросынхоо нутагт орос өөрөө цохиулж эхэллээ. Курск мужийн Суджанскийн районд ширүүн байлдаан үргэлжлэв. Украины зэвсэгт хүчний 300 цэрэг, 31 хуягт техникээр дэмжүүлэн давшлаа. Оросын 35 цэрэг олзлогдов гэсэн мэдээ явж байна. Оросын Белгород муж руу дроноор халдав. Оросын хил хаана ч дуусашгүй гэсэн биш хил дотроо дуусах аюулын өмнө ирсэн юм биш байгаа?


Оросын тархи угаалтад автаад мэдээллийн фейк ваакумд төөрч яваа бол Путин ялахыг хүлээсэн тэр цөхрөлөөсөө яаралтай салах хэрэгтэй. Украин бууж өгч, Орос эзэлсэн газраа үүрд эзэн сууж цаашаа Киевийг ганц ухасхийгээд авчихна гэж хүлээж яваа бол маш том эндүүрэл болно. Орос террорист дайндаа ялахгүй, ялахгүй нь улам бүр нотлогдож байна. Оросын түрэмгийллийг зөвтгөөд Украин, Зеленский, АНУ-ыг мянгантаа харааж шүлстээд нэмэргүй боллоо. Путинээ нулимстай горьдлогын нүдээр хүлээж суусны дараагийн хувилбарт Таны зүрх, тархи тэсэх болов уу? 


Орчуулж тайлбарласан Адьяaгийн Батсайхан (бэлтгэл хошууч)