sonin.mn
Сэтгэгдэл (15)

Норвеги улс ОХУ-тай хиллэдэг 198 километрийн урт хилийн бүсийн хамгаалалтаа эрчимжүүлэх шийдвэр гаргасан тухай тус улсын Цагдаагийн газар мэдээллээ.

Төлөвлөгөөний дагуу хил орчмын хэд хэдэн хэсэгт хамгаалалтын хашаа барих бөгөөд үүнд Сёр-Варангер коммун дахь хуучин Скафферхуллетийн боомт болон Норвеги–Оросын хилийн албан ёсны шалган нэвтрүүлэх цэг болох Стурскуг орж байна.


Норвегийн эрх баригчдын тайлбарласнаар, хашаанаас гадна орчин үеийн хяналтын камер, мэдрэгч систем суурилуулах бөгөөд зарим хэсэгт хил хяналт шалгалтыг нэмэгдүүлэх зорилгоор нисгэгчгүй төхөөрөмж (дрон) ашиглах боломжийг судалж байгаа аж. “Энэ нь Оросын хилтэй хилийн шугамыг шинэчлэх, орчин үеийн болгох ажлын чухал хэсэг юм” хэмээн Финнмарк мужийн цагдаагийн газрын дарга Эллен Катрине Хетта онцоллоо.


Скафферхуллетийн шинэ хашааны өртөг ойролцоогоор 400 мянган евро бөгөөд нийтдээ Осло хот Еврокомиссоос хилийн шинэчлэлд зориулан 16.4 сая еврогийн санхүүжилт авсан байна.


Норвегийн Зэвсэгт хүчний штабын дэд хурандаа Руне Риппон “Европ дахь аюулгүй байдлын нөхцөл байдал Норвегийг хил хамгаалалтаа чангатгах шаардлагад хүргэж байна.


Цагдаа болон цэргийн байгууллагуудын хамтын ажиллагааг улам сайжруулж, хил хамгаалалтын ажиллагааг илүү уялдаа холбоотойгоор хэрэгжүүлэх болно” гэж мэдэгдэв.


The Barents Observer-ийн мэдээлснээр, Европын Холбооны гишүүн биш ч Шенгений хэлэлцээрийн хүрээнд хамтран ажилладаг Норвеги улс энэ оны хавраас эхлэн Стурскугийн боомтод илүү өндөр, сайжруулсан хашаа барих ажлыг эхлүүлсэн бөгөөд энэ нь “Оросын талаас үүсч болзошгүй аюул”-д хариу болгон хэрэгжиж буй арга хэмжээ гэж үзэж байна.



Н.Отгончимэг


Эх сурвалж: moscowtimes.ru