АНУ-ын дэд ерөнхийлөгч асан Альберт Гор Доналд Трампын засаг захиргааг эрс хатуу шүүмжилж, түүний зан авирыг Германы нацист дэглэмийн үйл ажиллагаатай зүйрлэжээ. Тэрбээр Сан Францискогийн далайн эргийн шинжлэх ухааны музейд байгаль орчны идэвхтнүүдтэй уулзах үеэрээ ингэж мэдэгджээ. 

Альберт Горын хэлснээр, Трампын баг зорилгодоо хүрэхийн тулд өөр бодит байдлыг бий болгохыг эрэлхийлж байгаа бөгөөд үүнд тэрбээр Гуравдугаар Рейхийн үед ашиглаж байсан суртал ухуулгын аргуудтай ижил төстэй байдлыг хэрэглэж байна гэжээ.

Тэрбээр "Гитлерийн дэглэмийг бусад улс төрийн дэглэмтэй харьцуулах нь буруу гэдгийг би бүрэн ойлгож байна. Гитлерийн дэглэм бол өвөрмөц хорон муу зүйл байсан бөгөөд би үүнд эргэлздэггүй. Гэсэн хэдий ч нацизмын түүх бидэнд чухал сургамжуудыг өгдөг" гэж хэлжээ.  Тэрбээр мөн Дэлхийн 2-р дайны дараа Германы сэтгэгчдийн хийсэн гүн ухааны шинжилгээг эш татсан бөгөөд Гор Юрген Хабермасийн зөвлөх онолч Теодор Адорногийн хэлсэн Германы ёс суртахууны уналт үнэнийг эрх мэдэлд захирагдахаас эхэлсэн гэдгийг онцлон дурджээ. 

"Нацистууд Адорногийн бичсэнчлэн үнэн худал хоёрын заагийг бүдгэрүүлсэн. Өнөөдөр бид Трампын засаг захиргаа улс төрийн ашиг сонирхолдоо нийцүүлэн "тохь тухтай" бодит байдлыг бий болгохыг оролдож байгааг харж байна" гэж дэд ерөнхийлөгч асан тэмдэглэжээ.

Тэрбээр мөн Трампын уур амьсгалын өөрчлөлт, эрчим хүч, байгаль орчны талаарх талаарх мэдэгдлийг шүүмжилж "Тэд уур амьсгалын хямралыг Америкийн үйлдвэрлэлийг устгахын тулд Хятадын зохиосон хууран мэхлэлт гэж хэлдэг. Нүүрсийг цэвэр гэж хэлдэг. Салхин үүсгүүрүүд хорт хавдар үүсгэдэг гэдэг. Далайн түвшин нэмэгдэх нь далайн эргийн үл хөдлөх хөрөнгийн хэмжээг нэмэгдүүлдэг гэж хэлдэг. "Энэ бүхэн бол заль мэх юм" гэж хэлжээ. Гор нэмж хэлэхдээ, түүхийн туршид популист авторитар удирдагчид үзэн ядалтыг өдөөж, цагаачлалын урсгалыг харийнхныг үзэн ядсан үг хэллэг, хувийн эрх мэдлээ бэхжүүлэх шалтаг болгон ашиглаж ирсэн. "Трампын үндсэн зорилго бол эрх мэдэл. Бидний үүсгэн байгуулагчдын бүтээсэн Үндсэн хууль нь Дональд Трамп шиг хүмүүсийн аюулаас хамгаалах зорилготой бичигдсэн" гэж дүгнэн хэлжээ.

Э.Хулан

Эх сурвалж: cursorinfo.co.il