Монгол Улсын Ерөнхий Сайд Н.Учрал өнгөрсөн 5-р сард Нийслэлийн Засаг Дарга бөгөөд Улаанбаатар хотын захирагч Хишгээгийн Нямбаатарыг огцруулсан билээ. Үүнтэй холбогдуулан Х.Нямбаатар орой нь нийгмийн сүлжээгээр лайв хийн, хариу тайлбар хийн, "Миний нэр хүнд чинийхээс өндөр байгаа, чи бантсандаа, муу алиа бацаан минь, чамтай үзэлцэнэ" гэх мэтээр яг л гудамжны хулгайч шиг аашилж байв.

Хүүхэн тосгоноос явсан ч тосгон хүүхнээс явсангүй гэж үг байдаг. Үнэхээр ч ийм танхай, биеэ ихэд бодож, бэтгээ цатгаланд бодсон бүдүүлэг этгээд Монгол төрд урьд өмнө нь байгаагүй.

Хятадын компаниудад ажил, орлого олж өгч, гадаад улсын төлөө хүчин зүтгэж буйгаа том төсөл гэж хаацайлах энэ этгээд үүнээс хойш ч үе үе элдэв пост, бичлэг хийхээсээ зогсоогоогүй. Энэ ч яахав, иргэний хүний үгээ хэлэх эрх юм гэж бодъё.

Тэгвэл Х.Нямбаатар эх үүсвэр нь тодорхойгүй асар их мөнгөөр санхүүжүүлдэг тролл армиа одоо ч идэвхтэй ажиллуулсаар байгаа бөгөөд тэд нь Монгол Ардын Намын эсрэг гүтгэлэг тарааж байна.

"Монголын үнэн" сонины Ерөнхий Эрхлэгч асан А.Амундраг намынхаа эсрэг гүтгэлэг явуулж байна гэдэг үндэслэлээр намын гишүүнээс нь хасаж байсан. Энэ зарчим Х.Нямбаатарт ч үйлчлэх ёстой юм биш үү?

Улс төрийн албан тушаалтан огцорч болно. Албан тушаал бол хэн нэгний насан туршийн өмч биш. Харин албан тушаалаасаа буусныхаа дараа өөрийн харьяалагддаг нам, намын удирдлага, Засгийн газрын эсрэг зохион байгуулалттай мэдээллийн довтолгоо явуулж байгаа эсэх нь огт өөр асуудал. 

МАН-ын дарга Н.Учрал 2026 оны хоёрдугаар сарын 27-ны Бага хурлын үеэр А.Амундраг намын бодлого, үйл ажиллагааг “зохион байгуулалттайгаар гүтгэн харлуулж”, намын бодлогыг гуйвуулсан гэх үндэслэлээр намын гишүүнээс чөлөөлөх нь зүйтэй гэж мэдэгдсэн. Улмаар А.Амундрагийн намын гишүүнчлэлийн асуудал яригдсан. Тэгвэл нэг гишүүнд үйлчилсэн намын сахилга, ёс зүйн шаардлага нөгөө гишүүнд яагаад үйлчлэхгүй байх ёстой гэж? Намын дүрэм, сахилга хариуцлага гэдэг хүний нэр, нөлөө, албан тушаалаас хамаарч өөрчлөгддөг зүйл биш баймаар.

Учир нь улстөрч хүн өөрийн байр сууриа илэрхийлэх нэг хэрэг. Харин өөрийн нөлөөллийн хүрээн дэх цахим сүлжээ, зохион байгуулалттай хаягуудыг ашиглан намынхаа бодлого, удирдлагыг харлуулах ажиллагаа явуулсан бол энэ нь хувь хүний үзэл бодлоо илэрхийлэх эрхийн асуудлаас хальж, намын дотоод сахилга хариуцлагын асуудал болно.

Тиймээс энд хамгийн түрүүнд хариулах ёстой хэд хэдэн асуулт бий. Х.Нямбаатартай холбоотой гэж улс төрийн хүрээнд яригддаг цахим хаяг, пэйжүүд, троллуудыг ямар мөнгөөр санхүүжүүлдэг вэ? Тэдгээрийн мэдээллийн бодлогыг хэн чиглүүлдэг вэ? МАН болон намын удирдлагын эсрэг ижил агуулгатай мэдээлэл зэрэг түгж байгаа нь санамсаргүй давхцал уу, эсвэл зохион байгуулалттай ажиллагаа юу? Хэрэв зохион байгуулалттай бол түүний ард намын гишүүн Х.Нямбаатар байгаа эсэхийг МАН-ын Хяналтын ерөнхий хороо шалгах шаардлагатай.

Эдгээр асуултын хариуг таамгаар бус баримтаар тогтоох ёстой.

Х.Нямбаатар бол МАН-ын нэрээр олон жил улс төр хийсэн хүн. УИХ-ын гишүүн, Засгийн газрын гишүүн, Хууль зүй, дотоод хэргийн сайд, нийслэлийн Засаг дарга хүртэл ажилласан. Түүний улс төрийн карьер МАН-тай л нягт холбоотой. Тиймээс намынхаа дэмжлэгээр төрийн өндөр албан тушаалд хүрчихээд, албан тушаалаасаа буусныхаа дараа намынхаа эсрэг улс төрийн тэмцэл өрнүүлж буй нь Х.Нямбаатарын ямар увайгүй этгээд болохыг л харуулж байна.

Э.Солонго