“Зууны мэдээ” сонин энэ удаагийн “Амжилтын эзэн” буландаа Залуучуудын зуны спортын IV олимпын наадмын жүдо бөхийн төрөлд хүрэл медаль хүртэж, Монголын багийн медалийн салхийг хагалсан “Мон-Алтиус” ахлах сургууль, “Мон-Алтиус Цагаанбаатар” академийн тамирчин, Дорнод аймгийн “Талын хүчтэн” дэвжээний бөх Т.Төгсхүслэнг онцолж байна.

Шийдвэрлэх барилдаанд өрсөлдөгчөө цэвэр ялж, медалиа баталгаажуулав

Сенегалын нийслэл Дакар хотод болж буй Залуучуудын зуны спортын IV олимпын наадмын жүдо бөхийн эрэгтэйчүүдийн 55 кг-ын жинд Т.Төгсхүслэн хүч сорьж, хүрэл медалийн эзэн боллоо. Түүний хувьд энэ наадмын Монголын багийн анхны медалийг авчирсан нь амжилтынх нь үнэ цэнийг улам тодотгож байна.

Олимпын дэвжээнд өрсөлдөж буй залуу тамирчны хувьд медалийн төлөөх барилдаан бүр туршлага, ур чадвар, сэтгэл зүйн бэлтгэлийг зэрэг сорьдог. Т.Төгсхүслэн энэ сорилтыг давж, шагналын тавцанд зогсож чадлаа.

Түүний жинд 11 тамирчин өрсөлдсөн бөгөөд эхний тойрогт гоц мөргөсөн юм. Улмаар шөвгийн наймд Замби улсын бөх Элиша Зимбаг нэмэлт цагт ялж, хагас шигшээд шалгарсан. Хагас шигшээд Хорватын Йона Зворцтой барилдахдаа үндсэн цагт ялагч тодроогүй тул нэмэлт цагт үргэлжилж, Т.Төгсхүслэн харамсалтайгаар ялагдсан юм. Гэхдээ хагас шигшээд ялагдсан нь түүний медалийн боломжийг үгүй хийгээгүй. Харин ч хүрэл медалийн төлөө дахин дэвжээнд гарч, Дүрвэгсдийн багийн тамирчин Ботай Арно Яфунгаг ялснаар тэмцээнээ медальтай өндөрлүүлсэн юм. Жүдогийн тэмцээнд барилдаан бүр өөрийн гэсэн тактик, тэвчээр, шийдвэр гаргалтыг шаарддаг. Ялангуяа нэмэлт цагт үргэлжилсэн барилдаанд тамирчны биеийн хүчнээс гадна анхаарал төвлөрөл, алдаагаа хянах чадвар чухал нөлөөтэй.

Т.Төгсхүслэн шөвгийн наймд ийм нөхцөлд ялалт байгуулж, хагас шигшээд ялагдсаныхаа дараа хүрэл медалийн төлөөх барилдаанд дахин төвлөрч чадсан нь энэ тэмцээний онцлох хэсэг байв. Тэрээр шийдвэрлэх барилдаанд өрсөлдөгчөө цэвэр ялж, медалиа баталгаажуулсан юм.

Т.Төгсхүслэнгийн хувьд өсвөрийн улсын аваргын дэвжээнд үзүүлсэн амжилтаа олон улсын тэмцээнд үргэлжлүүлж чадлаа. Тэээр 2025 оны улсын аварга шалгаруулах тэмцээнээс мөнгөн медаль хүртэж байсан бол энэ онд түрүүлж, алтан медаль хүртсэн юм. Өсвөрийн бөхчүүдийн улсын аваргын дэвжээнд амжилтаа ахиулсан тэрбээр Дакарын олимпын дэвжээнд ч өрсөлдөгчдөө буулган авч, ийнхүү хүрэл медаль хүртлээ.

“Нэг улсаас жин тус бүрд нэг тамирчин оролцож буй нь тэмцээний онцлог байлаа”

Монголын жүдочид залуучуудын олимпын наадмаас өмнө нь медаль хүртэж байсан түүхтэй. 2010 онд Сингапурт болсон анхдугаар наадмын холимог багийн төрөлд О.Дөлгөөн мөнгөн медаль хүртсэн. Тэрээр ОХУ, Мальта, Туркменистан, Сенегал, Шинэ Зеланд, Бельги, Германы тамирчидтай нэг багт багтан барилдсан юм. Харин 2018 онд Аргентины Буэнос-Айрес хотод болсон наадмаас хөвгүүдийн 55 кг-ын жинд Г.Тэмүүжин, охидын 52 кг-ын жинд Л.Сосорбарам нар мөнгөн медаль хүртэж байв. Энэ удаагийн жүдо бөхийн тэмцээнд 93 орны 94 тамирчин оролцож байгаа бөгөөд 46 нь эрэгтэй, 48 нь эмэгтэй жүдоч юм. Нэг улсаас жин тус бүрд нэг тамирчин оролцож буй нь тэмцээний онцлог байлаа.

“Дакар-2026” наадам аравдугаар сарын 31-нээс арваннэгдүгээр сарын 13-ны өдрийг хүртэл үргэлжилж байгаа бөгөөд Африк тивд зохион байгуулагдаж буй анхны олимпын спортын наадам гэдгээрээ түүхэн ач холбогдолтой. Монгол Улсаас спортын зургаан төрөлд нийт 10 тамирчин оролцож байна.

Тэдний дөрөв нь 3х3 сагсан бөмбөг, хоёр нь усанд сэлэлт, үлдсэн дөрөв нь бокс, жүдо, дугуй, элсний бөхийн төрөлд тус бүр нэгээр өрсөлдөж байгаа юм. Ийнхүү Т.Төгсхүслэн Залуучуудын зуны спортын IV олимпын наадмаас хүрэл медаль хүртэж, Монголын багийн анхны медалийг авчирлаа. Тэрээр залуучуудын олимпын жүдо бөхийн төрлөөс медаль хүртсэн Монголын дөрөв дэх тамирчин болж, өмнөх тамирчдынхаа амжилтыг үргэлжлүүлэв. Дакарт эх орноо төлөөлөн оролцож буй Монголын бусад тамирчдын тэмцээн үргэлжилж байна. Залуучуудын олимпын наадамд оролцох сагсчдын тэмцээн өнөөдөр эхлэх юм. Монголын залуу тамирчид олон медаль хүртэж, эх орныхоо нэрийг өндөрт өргөх болтугай.

П.АМГАЛАН

Эх сурвалж: “Зууны мэдээ” сонин