sonin.mn
Сэтгэгдэл (0)

Есдүгээр сарын 21-нд Хятадын Гадаад харилцааны яамны хэвлэлийн төлөөлөгч Гүө Жякүнь хэвлэлийн бага хурал хийв.

Энэ үеэрээ: "Оросын Гадаад харилцааны яамны хэвлэлийн төлөөлөгч 18-нд, Америк Японы Кюшюүд ‘Тайфун’ дунд тусгалын пуужингийн систем байрлуулсантай холбогдуулан Японы талд дипломат нот бичиг хүргүүлж, уг байршуулалтыг хүлээн зөвшөөрөх боломжгүйг онцлон, Дэлхийн II дайны үр дүнг бүрэн хүлээн зөвшөөрч, "дахин цэрэгжих"-ээ зогсоохыг шаардсан гэж мэдэгдсэн. Хятадын тал ч саяхан энэ асуудлаар Японы талд дипломат нот бичиг хүргүүлж, санаа зовниж буйгаа илэрхийлсэн. Хятадын тал үүнийг нотолж, холбогдох нөхцөл байдлыг танилцуулж болох уу?" гэсэн сэтгүүлчийн асуултад хариулахдаа:

Гүө Жякүнь: "Тайфун" дунд тусгалын пуужингийн систем бол стратегийн довтолгооны зэвсэг юм. Японы тал уг системийг нэвтрүүлж байгаа нь "дахин цэрэгжих"-ээ түргэтгэж буйн бас нэгэн нотолгоо болж байна. Энэ алхам нь цэргийн сөргөлдөөн, зэвсгээр хөөцөлдөх эрсдэлийг нэмэгдүүлж, стратегийн тэнцвэр болон бүс нутгийн тогтвортой байдалд заналхийлж, хөрш орнуудын аюулгүй байдлын зүй ёсны ашиг сонирхолд хохирол учруулж байна. Олон улсын хамтын нийгэмлэг үүнд өндөр сонор сэрэмжтэй хандаж, Азийн олон орны иргэд эсэргүүцлээ илэрхийлсэн. Хятадын тал дипломат сувгаар Японы талд удаа дараа эрс эсэргүүцлээ илэрхийлсэн бөгөөд саяхан мөн дипломат нот бичиг хүргүүлж, хатуу байр сууриа дахин нотолсон. Энэ жил Токиогийн шүүх ажиллагаа эхэлсний 80 жилийн ой тохиож байна. Түрэмгийллийн түүхээ гүнзгий эргэцүүлж, бүс нутгийн улс орнуудын дуу хоолойг анхааран сонсож, "дахин цэрэгжих" аливаа оролдлогоо зогсоохыг Хятад улс Японы талд шаардаж байна" гэжээ.


Г.Бямба