sonin.mn
Сэтгэгдэл (1)

Умард Солонгосын Ёнбен дахь цөмийн цогцолборт уран баяжуулах шинэ объект ашиглалтад орсон тухай DW мэдээлснийг Kazinform агентлаг дамжууллаа. Олон улсын цөмийн эрчим хүчний агентлагаас /IAEA/ 8 дугаар сарын 28-нд нийтэлсэн илтгэлд дурдсанаар, шинэ объектод хийн центрифугийн 28 каскадыг /баяжуулалтын дараалсан цуваа/ байрлуулах боломжтой ажээ. 


Түүнээс гадна, Пёньянаас холгүй орших Кансон цогцолборт уран баяжуулах өргөтгөсөн объектыг ашиглаж эхэлсэн байж магадгүй шинж тэмдгүүд илэрснийг илтгэлд дурджээ.


Тус агентлагийн шинжээчид 2009 оноос хойш Умард Солонгост нэвтэрч чадахгүй байгаа учраас хиймэл дагуулын гэрэл зургууд болон Умардын хэвлэлүүдэд нийтлэгдсэн гэрэл зургууд зэрэгт дүн шинжилгээ хийж байна. Хиймэл дагуулын гэрэл зургууд болон зургаадугаар сард Умард Солонгосын удирдагч Ким Жөн Ун тус объектод очиж байсныг харуулсан гэрэл зургуудыг харьцуулсны үндсэн дээр Ёнбенд шинээр баригдсан хоёр давхар барилга нь уран баяжуулах хоёр дахь объект мөн гэдгийг баталжээ. 


Үүнтэй холбогдуулан “Кансон болон Ёнбенд баяжуулах төхөөрөмжүүдийг ашиглаж эхэлсэн нь ноцтой түгшүүр зовнил төрүүлж байна” гэж IAEA-гийн Ерөнхий захирал Рафаэль Гросси мэдэгдсэн байна. 


Умард Солонгосын явуулж буй үйл ажиллагаа нь цөмийн зэвсэг болон баллистик пуужинтай холбоотой хөтөлбөрүүд хэрэгжүүлэхийг Пёньянд хориглосон НҮБ-ын Аюулгүйн зөвлөлийн тогтоолыг зөрчиж байна гэдгийг IAEA анхааруулжээ. Р.Гросси саяхан Сөүлд айлчлах үеэрээ мэдэгдэхдээ, сүүлийн үед Умард Солонгос уран баяжуулах үйлдвэрийг шинээр байгуулснаар цөмийн зэвсгээ боловсронгуй болгоход “маш том ахиц гаргасан” гэдгийг онцолж байв.



Б.Адъяахүү