sonin.mn
Сэтгэгдэл (1)

АНУ-ын Конгрессын Төлөөлөгчдийн танхим ирэх 2027 онд Америкийн цэргийн хэрэгцээнд зориулан 1 их наяд 150 тэрбум долларыг төсөвт суулгахыг дэмжсэн байна. Парламентын доод танхимд болсон цэргийн зардлын асуудлаарх санал хураалтын явцыг телевизийн C-SPAN сувгаар шууд дамжуулан үзүүлжээ.


Төлөөлөгчдийн танхимын 216 гишүүн батлан хамгаалах салбарын зардлын тухай хуулийн төслийг дэмжсэн бол 212 гишүүн эсрэг санал өгсөн байна. Одоо уг төслийг Конгрессын Сенатын танхимаар хэлэлцүүлэх бөгөөд дээд танхим дэмжсэн тохиолдолд гарын үсэг зуруулахаар АНУ-ын Ерөнхийлөгч Д.Трампад хүргүүлэх юм.


Харин Politico сонинд бичсэнээр, Сенатын 100 гишүүнээс дор хаяж 60 нь дэмжсэн тохиолдолд Пентагонд олгох цэргийн зардлын асуудал шийдэгдэх тул Конгрессын хоёр танхимын хоёуланг нь хянаж буй БНН-ынхан багагүй бэрхшээлтэй тулгарах бололтой. Өмнө нь энэ сард Сенатын танхимд уг төслийг батлахгүйгээр буцааж байсан юм.


Дээрх хуулийн төслөөс гадна 95 тэрбум долларыг Пентагонд олгох тухай санаачилгыг Төлөөлөгчдийн танхим дэмжжээ. Гэхдээ уг баримт бичгийг Сенатаар мөн хэлэлцүүлэх ёстой. Дээрх мөнгөнөөс 73 тэрбумыг нь Ираны эсрэг цэргийн ажиллагаанд зарцуулахаар төлөвлөсөн байна.


Ираны эсрэг АНУ, Израилын цэргийн ажиллагаа энэ оны хоёрдугаар сарын 28-нд эхэлсэн билээ. 6 дугаар сард Вашингтон, Техран хоёр фронтын нийт шугамын дагуу, түүний дотор Ливаны нутаг дэвсгэрт байлдааны ажиллагааг зогсоох тухай Харилцан ойлголцлын санамж бичигт гарын үсэг зурсан юм. Гэвч энэ сарын 8-нд шилжих шөнө Америкийн тал Иранд өргөн хэмжээний цохилт өгч эхэлсэн бөгөөд үүнийгээ “Ормузын хоолойтой холбоотой тохиролцоог Ираны тал зөрчсөн” гэж тайлбарлажээ.



Б.Адъяахүү