МҮОХ-ны Ерөнхийлөгч, ОУОХ-ны гишүүн Б.Баттүшиг, Тэргүүн дэд Ерөнхийлөгч Ч.Наранбаатар, ЕНБД Э. Бадар-Ууган нар өнөөдөр БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань тэргүүтэй төлөөлөгчдийг Олимпик хауст хүлээн авч уулзлаа.

Уулзалтын үеэр хоёр улсын спортын салбарын хамтын ажиллагааны өнөөгийн байдал болон цаашдын хөгжлийн талаар санал солилцов. 

Элчин сайд Шэнь Миньжуань Монголын спортын салбар сүүлийн жилүүдэд олон улсын тавцанд өндөр амжилт үзүүлж буйг онцлон тэмдэглэж, ялангуяа Монголын 3х3 сагсан бөмбөгийн эмэгтэй шигшээ баг олимпын наадамд оролцсон түүхэн амжилтад баяр хүргэв. 

Түүнчлэн олимп, тив, дэлхийн хэмжээний томоохон наадам, тэмцээнүүдэд Монголын баг, тамирчид амжилттай оролцож байгааг өндрөөр үнэлж буйгаа илэрхийллээ.

Мөн тэрбээр хоёр улсын хооронд спортын барилга байгууламж, цэнгэлдэх хүрээлэн байгуулах асуудал хэлэлцэж байгаад талархалтай байгаагаа илэрхийлж, хамтын ажиллагааны үйл явц амжилттай үргэлжилбэл бүтээн байгуулалтын ажлыг энэ онд багтаан эхлүүлэх хүсэлтэй байгааг дурдав. 

Олон улсын стандарт шаардлага хангасан, орчин үеийн дэвшилтэт технологи бүхий спортын цогцолбор байгуулах нь Монгол-БНХАУ-ын найрамдалт харилцааны бэлгэ тэмдэг болж, хоёр орны спортын салбарын хамтын ажиллагааг шинэ түвшинд гаргах ач холбогдолтойг онцолсон юм.

Мөн БНХАУ сүүлийн жилүүдэд соёл, спортын хамтын ажиллагаа, хөгжлийг чухалчлан дэмжиж ирснийг тэмдэглээд, МҮОХ-ноос олон төрөлт наадмыг эх орондоо зохион байгуулах чиглэлээр баримталж буй бодлогыг дэмжиж буйгаа илэрхийллээ. 

Тэрбээр Харбин хотноо Азийн өвлийн наадам амжилттай зохион байгуулсан нь ард иргэдийн дунд өвлийн спортыг сонирхон хичээллэгчдийн тоог эрс нэмэгдүүлэхэд эерэг нөлөө үзүүлсэн сайн туршлага болсныг дурдсан юм.

МҮОХ-ны зүгээс Олимпын хөдөлгөөн, спортын салбарын хамтын ажиллагаа, найрсаг харилцааг бэхжүүлэхэд оруулсан хувь нэмэр, идэвх санаачилга, хамтын ажиллагааг өндрөөр үнэлж МҮОХ-ны дээд шагнал “Алтан очир” одонгоор Элчин сайд Шэнь Миньжуанийг шагналаа. 

Төлөөлөгчид мөн Олимпын музейг үзэж сонирхов