sonin.mn
Сэтгэгдэл (3)

Оросын Санхүүгийн хяналтын агентлаг улс төрийн шинжээч Екатерина Шульман болон бизнес эрхлэгчид Борис Зимин, Михаил Кокорич нарыг “террорист ба экстремист” бүртгэлд оруулсан байна. Тэд бүгд Оросын “Дайныг эсэргүүцэх хороо”-ны гишүүн юм. Албан ёсны жагсаалтад тэдний нэрний хажууд од (*) тэмдэглэгээ тавигдсан бөгөөд эрх баригчдын үзэж байгаагаар энэ нь “террорист үйл ажиллагаанд холбогдсон хүмүүсийг” илтгэдэг гэнэ.


10-р сарын дунд үед Оросын ФСБ уг хорооны 20 гаруй гишүүнд “эрх мэдлийг хүчээр булаах” болон “террорист бүлэглэл байгуулах эсвэл түүнд оролцох” гэсэн зүйлээр эрүүгийн хэрэг үүсгэсэн юм. Хэрэгт холбогдолтой хүмүүсийн дунд Борис Зимин, Михаил Кокорич, Екатерина Шульман, ЮКОС компанийн экс-ерөнхийлөгч Михаил Ходорковский, Ерөнхий сайд асан Михаил Касьянов, улс төрийн сөрөг хүчний удирдагчид Владимир Кара-Мурза, Дмитрий Гудков, Гарри Каспаров, Леонид Гозман, Максим Резник, Анастасия Шевченко, эдийн засагч Сергей Гуриев, бизнес эрхлэгч Евгений Чичваркин, нийтлэлч Виктор Шендерович, жүжигчин Артур Смольянинов, эрдэмтэн Константин Чумаков, биологич Евгений Кунин тэргүүтэй хүмүүс багтжээ.


ФСБ мэдээлснээр, уг хороо нь Украины зэвсэгт үндэсний бүлгүүдийг санхүүжүүлж, хүн элсүүлэх үйл ажиллагаа явуулдаг гэж үзсэн байна. Мөн агентлаг 2023 оны 4-р сард баталсан Берлины тунхаглал дээр үндэслэн, хорооны баримт бичигт “Оросын одоогийн эрх баригчдыг устгах шаардлагатай” гэж заасан гэж тайлбарлажээ.


“Дайнын эсэргүүцэх хороо”-ны вебсайтад дурдсанаар, байгууллага нь “дайныг эсэргүүцэгч Оросуудыг дэмжиж, тэдэнд уялдаа холбоо, үйл ажиллагаа болон харилцан туслалцааны орон зайг бүрдүүлдэг” гэжээ.



Н.Отгончимэг

Эх сурвалж: moscowtimes.ru