sonin.mn
Сэтгэгдэл (39)

Украин дахь Оросын цэргийн тусгай ажиллагаа 4 жилийнхээ босгыг даваад 10 хонож байна. Энэ тэмдэглэлт явдал Трампын өнгөн дээр шинэ шинэ агуулгаар баяжиж, гэхдээ тэр нь АНУ-ын язгуур эрх ашгийн эсрэг эргэж байгаатай холбогдуулан мэдээллийн тэнцвэр хангах үүднээс украины Freeдом ТВ, dialog.ua сайт; АНУ, Европын, тэр дундаа украин, оросын зүтгэтнүүд Трампын ба Оросын талаар ярьсан хэлснээс орчуулж сонирхуулъя. Энд sonin.mn сайтын байр суурь тусгагдаагүй болно.


Украины эсрэг өдүүлсэн Оросын түрэмгийллийг Трамп маш ширүүн эсэргүүцэж Украины талд 100% зогсож байсан телевизийн бичлэгийг АНУ-д буцааж гаргаж үзүүлжээ. Тэр нь дайн дэгдсэнээс хойш сар орчим хугацаа өнгөрсний дараа 2022 оны гуравдугаар сарын 21-ний ярилцлага байна. Оросын цэрэг Киевийг эзлэх гэж довтлоод бутцохигдон ухарсны дараа Д.Трамп:

- Украиныг америкийн зэвсгээр зэвсэглэхийг уриалж байна. 

- Путин улаан шугам давсныг няцаах хэрэгтэй. 

- Хэрэв Путин цөмийн зэвсгийн шантажаа үргэлжлүүлбэл америкийн атомын шумбагч хөлөг онгоцуудыг Оросын эрэг рүү ойртуулж заналхийлэх хэрэгтэй хэмээн уриалан дуудаж байжээ.


Гэтэл одоо. БНН-аас Төлөөлөгчдийн танхимд сонгогдсон конгрессмэн Тед Лю Трампыг хатуу шүүмжлэхдээ:–АНУ-ын Ерөнхийлөгч нь Оросын дарангуйлагчийн эрхшээлд бүрэн орсныг харна гэдэг ёстой эмгэнэл юм байна. Одоо бид үүний өртгийг олон жилийн турш төлөх болж дээ!


БНН-аас Сенатад сонгогдсон Том Тиллис Сенатын хурал дээр Бучагийн яргаллын тухай гунигт түүх сөхөж, гэрэл зураг үзүүлж:–Ерөнхийлөгч Трампын инстинкт бүрэн тодорхой байна. Путин бол худалч мөртлөө бас алуурчин. Энэ бол бүх дэлхийд халдварлаж байгаа хорт хавдар. Үүнийг Трамп мэдэхгүй байв гэж дээ! 


Трампын гадаад бодлогод дургүйцэх явдал Конгресст тэсрэлтийн өмнөх хэмжээнд очжээ. АН-ынхан төдийгүй Ерөнхийлөгчийн нэг намынхан БНН-ынхан ч түүний этгээд гаж үзэгдлийг тэвчихгүй эгдүүцэн байна. Москватай ийм ээдрээт тоглоомоор наадаж, Украинд өрөө төлөхийг бүдүүлгээр шахаж байгаа нь эргээд АНУ-ыг өөрийг нь катастрофт хүргэнэ. БНН-ын маш олон дэмжигчид, гишүүд хэзээ ч ийм олуулаа Украины төлөө дуу хоолойгоо өргөж байсан тохиолдол үгүй, харж байгаарай, хоёр намын хамтарсан мэдэгдэл мөдхөн хэмээн америкийн улс төрч, Трампыг дэмжигч БНН-ын зүтгэлтэн Борис Пинкус онцлон тэмдэглэв. 



Трамп Европоос нүүр буруулсан нь энэ цагийн үеийн АНУ-ын хамгийн том эмгэнэл бөгөөд дэлхийн II дайны дараа цэргийн хүчин чадалдаа хязгаарлалт тавиулсан Германд эргэн хүчирхэгжих таатай боломж нээж өгч байна гэх мэдээлэл Германы Бундестагийн сонгуулийн фонон дээр олонтаа давтагдав. Шинэ канцлер энэ боломжоо нээн илрүүлж ашиглахын тулд Украиныг дэмжихээ шууд зарлалаа. Европын хувьд Оростой дангаараа нүүр тулах нь Трампын мэдэгдлээс тодорхой болж байгаа тул Оросын цэргийн хүчийг аль болох ихээр Украины фронт дээр устгалд оруулах нь зөв гэсэн стратегийн шийдвэр Европын лидерүүд гаргаж байгаа бололтой. Ийнхүү Трампгүйгээр ялалтаа хангах Украины дайны хоёр дахь үе шат эхэллээ хэмээн германы нэг сайтад бичээд сонгуулийн кампанийн явцад ТВ-д халз мэтгэлцэхдээ Фридрих Мерцээс Германы альтернатив намын даргад хандаж хэлсэн үгийг эш татжээ. “Үгүй шүү, фрау Вайдель, Оросын хувьд бид төвийг сахихгүй шүү. Бид дундыг барихгүй. Бид Украины талд байх болно. Украинтай хамтаараа бид өнөөгийн  Европыг хамгаалах болно, Та ч тэр бодлогыг тодорхойлохгүй!” гэжээ.


Францын Ерөнхийлөгч Э.Макрон Трамптай уулзахдаа:–Украинд тусламжаар олгосон тэр мөнгөө АНУ Оросоос нөхөж гаргуулбал зохилтой. Украиныг дэмжсэндээ харамсаад байгаа бол Орос тэр мөнгийг чинь төлбөл таарна. Учир нь тэр дайныг чухам Орос л эхлүүлсэн шүү дээ!


В.Зеленскийн цогтой үгс дахин цууриатав:–Орос энэ дайныг эхлүүлсэн. Орос, Путин хоёр энэ гэмт хэргийн дайныг хийж байна. Тэд гурван жилийн турш өдөр бүр манай хотууд руу довтолж, украинчуудыг хөнөөж байна. Украин өөрийгөө хамгаалж, амьдрал, ардчиллын төлөө тэмцэж байна. Бидэнтэй хамт байгаа бүх хүмүүст баярлалаа. Амар амгаланг ойртуулсан бүх хүмүүст баярлалаа. Украинчууд урт зам туулсан. Украинд амьдарч асан, амьдран суугаа хүн бүрийн хувьд төрийн аюулгүй байдлын баталгаа, нэр төр, бүх ард түмнийхээ хүндэтгэлийн баталгаа болсон жинхэнэ энх тайванд хүрэхийн тулд боломжтой болон боломжгүй бүхнийг бид энэ жил хийх ёстой. Украины ард түмэн дэлхийн бүх үндэстнүүдийн адил хүндэтгэл хүртэх ёстой. Тэмцэж буй хүмүүс, жинхэнэ баатарлаг охид, хөвгүүдийг өсгөж хүмүүжүүлсэн хүмүүсийн адил хүндэтгэл хүлээх ёстой. Би Украины дайчин хүн бүр, манай хамгаалагчдын гэр бүл, Украины хамт зогсож байгаа бүх хүмүүст талархаж байна. Украиныг амьд байлгаж байгаад баярлалаа!



Чехийн Ерөнхийлөгч Петр Павел Прага хотод Украиныг дэмжсэн жагсаалд оролцож үг хэлжээ:–Бид Украинд туслах ёстой, учир нь түүний ялагдал бидний ялагдал байх болно. Яг үнэндээ бид энэ цаг үед удаашрах боломжгүй, энхийн хэлэлцээ магадлалтай ч Украиныг дэмжихээ бид зогсоож чадахгүй. 1938 онд бидэнд тохиолдсон явдал дахин давтагдах боломжгүй, тэд бидэнгүйгээр бидний төлөө, Украингүйгээр Украины төлөө хэлэлцээ хийнэ гэж байхгүй. Ийм учраас бид, Украин, Европ хоёр хэлэлцээний ширээний ард хамт сууж байхыг шаардах ёстой. Украин улс алдар гавьяаг хүртэх ёстойгоос гадна түүнд хурдан амар амгалан, нэр төртэй, шударга амар амгаланг хүсэн ерөөе! Украинд сонгох боломжтой ирээдүй өөрт нь байгаа. Харин Украины ирээдүйг Орос тодорхойлох боломж олгож огт болохгүй!


Латвийн Гадаад хэргийн сайд хатагтай Байба Браже:–Путин бусад орнуудын дотоод хэрэгт оролцдог. Нутаг дэвсгэрт нь ч, Засгийн газрынх нь улс төрийн сонголтод ч хяналт тавихыг оролддог. Украин дахь гурван жилийнхээ дайнаар Путин хүсч байснаа харин авч чадсангүй. Тэр хүслээ одоо энх тайвны хэлэлцээгээр дамжуулан олж авахыг Путин хичээх болно гээд АНУ-тай байгуулах Путины ямарваа тохиролцоог хүлээн авахгүй байхыг уриалжээ.


Оросын зохиолч, нийгмийн зүтгэлтэн Дмитрий Глуховский:–Путин энэ дайнаар оросын 20 ба 30 насныхныг бүхэлд нь өвдөг сөхрүүлсэн. Тэр тэдэнд чимээгүй байх, юунд ч оролцохгүй байх, худал хэлэх, хулчгар зан гаргах, энэ бүхнийг өөртөө тайлбарлахыг зааж өгсөн. Бүр жижиг нялх хүүхдүүд хүртэл цэрэг армийг байнга харж, тэднийг цэрэг армид дасгаж, дайны тоглоом тоглож, аавыгаа дайнд үхэхийг харж, түүндээ харамсахгүй байхад нь сургаж байна! 


Немцовын гэгээн дурсгалыг хүндэтгэн чулуунд нь цэцэг тавьсан Санкт-Петербургийн губернаторын сонгуульд өрсөлдөж явсан Людмила Васильевацагдаа нарт хандан үг хэлж буй бичлэг оросын SOTAvision сайтаас:–Та нар, Та нарын ач нар Украинд дайны асар их төлбөр төлөх болно. Тэгэхийг би үзэхгүй юмсан!  



Дайны гурван жилийн тэмдэглэлт өдөр фронтод ноцтой өөрчлөлт гараагүй, гэвч оросын хохирол давсан хэвээр байна. Эхний нэг жилийн ширүүн байлдаанд мэргэжлийн армиа сүйтгүүлээд дараагийн хоёр жилд асар их тоогоор татан авчирсан дайчилгааны хөлсний, шинэ цэргээ Орос тулалдуулж байна. Хүний олноор атаклах тактикаа өөрчилсөнгүй. Украины тагнуулын алба мэдээлжээ. Орост түрэмгийллийнхээ гурван жилийн ойгоор “ялалт”-ын түүх сурталчилж байна. Украиныг тогтворгүй болгох, түншүүдийнх нь өмнө гутаах, цөхрөлийг нь барах гэхдээ Кремлиэс суртал ухуулга, тагнуулын ажиллагаагаа зэрэг зэрэг эрчимжүүлжээ. Гол сэдэв нь: 

1. Украинаас барууныхан урвасан. Үүнийг Трамп илтгэн харуулав. 

2. Европчууд, украинчуудын санал сэтгэл Москва, Вашингтонд хамаагүй.

3. АНУ, Орос хоёр Украинаас далдуур бүх зүйлээ тохиролцсон. 

4. Украины Засгийн газар хууль бус. 

5. Украины арми фронт дээр ялагдаж байна. 

6. Украины авлигач албан тушаалтнууд олон тэрбум доллар хулгайлсан. 

7. 2025.02.24-нд тэд АНУ, Оросын хэлэлцээг далимдуулан Украин, НАТО-гийн “ялалт” мэт зарлахаар төлөвлөсөн

8. Зүгээр гал зогсооно гэж байхгүй, заавал ялж байж, Украиныг ялагдуулж байж гал зогсоох хэрэгтэй гэх сэдвүүд голлов. 


“Ялта–Европын стратегийн гурван жил: Ялах цаг” тусгай уулзалтын үеэр Путины үнэн нүүр царайг генерал Кирилл Буданов илчлэн ингэж ярьжээ:–Өөрийгөө эзэнт гүрэн гэж үздэг Орос нь Беларусь, Украиныг нэгтгэж нэг улс болох юм бол дараа нь Варшавын гэрээний орнууд руу зүтгэнэ. ОХУ-ын одоогийн удирдлагын зүтгэж буй тэр импер бол Зөвлөлт Холбоот Улсын загвар мөн боловч Варшавын гэрээний хуучин орнуудыг хамж аваад томрох зорилготой. Хамгийн муу хувилбарыг нь төсөөлөөд үз дээ. Гурван улс–Украин, Орос, Беларусийг нэг улсад нэгтгэх гээд үзнэ. Дараагийнх нь Польш байх болно. Би Та бүхэнд үүнийг шууд хэлж байна. Ингэнэ гэхээс айх шаардлагагүй, ингэвэл яах вэ гэдгийг ухамсарлах хэрэгтэй. Дараа нь Чех, Унгар, том улсууд Оростой дайнд орно! 


Эцсийн бүлэгт Трамп үнэнд гүйцэгдэв үү, яав? Британийн Ерөнхий сайд Кир Стармер Трампаас “Зеленскийг дарангуйлагч гэж үздэг хэвээр юү?” гэж асуухад “Би тэгж хэлсэн гэж үү? Ерөнхийлөгч Зеленскийг дарангуйлагч гэж хэлсэндээ би итгэж чадахгүй байна” гэв. Засгийн газрынхаа анхны хуралдаан дээр Трамп бүр 180 градус эргэчихсэн “Европын Холбоо биднийг сайн шахаж байна, тийм ээ Путин бол маш зальтай амьтан, Украин дахь дайнаа зогсоохыг тэр хүсэхгүй байна, бид аль болох илүү их нутаг дэвсгэрийг нь Украинд буцаан олгуулахыг зорино” энэ тэр гээд л…


       Англи, орос хэлнээс хөрвүүлсэн Дүгэржавын Номиндарь