Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Бүтэн гурван жил өнгөрлөө. Стратегийн ганц ч том ялалтгүй, маш их хохиролтой. Энэ сэдэвтэй холбогдуулан Путиныг зайлуулсан тэр мөчид Орос орон тэсэрнэ гэж оросын Z-эх орончид ярьж эхлэсэн тухай баримтаас хуваалцая.

Манай улсын эсрэг Москвагийн түрэмгийлэл үргэлжилсээр байх ахул оросын цэргийн анги нэгтгэл, зэвсгийн агуулах, цэрэг-аж үйлдвэрийн цогцолбор цехүүд, газрын тос боловсруулах үйлдвэр болон бусад байгууламжууд бидний халдлагад өртөх болно–орос үндэстэн украин генерал А.Сирский.

Эдүгээ Украины Зэвсэгт хүчин Курск муж дахь оросын хамгаалалтыг эвдэж, ОХУ-ын нутаг дэвсгэрт 5 км-ийн гүнд нэвтэрсэн гэж дайн судлалын хүрээлэн (ISW) хэдэн өдрийн өмнө мэдээлж байсан. Украины цэргүүд механикжсан хэд хэдэн довтолгоон хийж, оросын хамгаалалтыг нэвтлэн, Сужа хотоос зүүн өмнө зүгт урагшилсныг дайн судлалын хүрээлэн тэмдэглэжээ. Долоо хоногийн өмнөх байршлын бичлэгээр бол украины дайчид Махновка тосгоны баруун өмнөд, түүнчлэн Сужа-Обояны хойд болон зүүн хэсэгт байрлаж, Колмаков, Фанасеевка тосгоныг хяналтдаа авсан ажээ. Харин хойд солонгосын тусламжийн цэрэг Курскт дахин ирж, хохирол амсаж эхэлсэн мэдээ байна.

Украины Цэргийн тагнуулын дарга Кирилл Буданов ярьж байна:–Бид дрон хөгжүүлэлтийн шинэ үе шатны нэгэн гишгүүр дээр байна. Камиказе дроны гибрид хөгжүүлэлт туршилтаас практикт удахгүй шилжинэ. Цохилтын дроны сул тал радарт амархан илчлэгдэж устгагдах аюултай бол харин камиказе дроны давуу тал нь радараас бултаж зорьсон газраа хаа ч байсан очиж чадна. Тэгэхлээр бид юу төлөвлөж хөгжүүлсэн нь ойлгогдож байна уу хэмээн оросуудаас асуужээ. Өнгөрсөн жил оросын А-50 онгоцыг Украины дрон устгахад оросууд мөн ч их инээд ханиад болж, басч байж билээ. Муусайн хохолууд мөрөөдчихсөн энээ тэрээ гэж доош нь хийгээд л. Гэтэл одоо нөгөө лут онгоцыг нь устгасан украины дроны армийн бригадын командлагчийг эрэн сурвалжлаад, онгоц нь сөнөсөн гэдгээ албан ёсоор хүлээн зөвшөөрчээ.

Оросын Z-патриот Михаил Полынков гэж шоронд суугаа Игорь Стрелковын (Гиркин) хамсаатан Украиныг ялах нь бүү хэл, Орос эх орноо авран хамгаалах ямар ч шаансгүй боллоо хэмээн ярьжээ.

Путины хүрээллийнхэн түүнийг нь зайлуулж магад, тэгвэл бужигнаан дэгдэнэ, гаднаас гадаадын интервенц ч хийгдэж мэднэ, тэгээд Оросыг хэдэн хэсэгт хуваан задална. Путиныг зайлуулсны дараа Орос оронд тогтворгүй байдал, гадна хүчний хөндлөнгийн оролцоо удтал үргэлжилнэ. Харьж яваа Путин (72 нас) ертөнцийн жамаар үхэж мэднэ, тэглээ гэхэд залгамжлагч гэхээр хүн ил алга. Тэгэхлээр улс орныг анархи, дезинтеграц залгаж таарна. Орос бол дэлхий дээр хамгийн олон угсаатны бүлэг бүхий эрээн цоохор улс. Соёлын хувьд ч, хэл ярианы хувьд ч өөр хоорондоо холбогдох садансах юу ч байхгүй 190 гаруй угсаатан үндэстний бүлэг Оросын газар нутагт оршин сууж байна.

ОХУ-ын нутаг дэвсгэрт тархан суусан үндэстэн угсаатнууд тус тусдаа хөгжлийн түүхэн замналтай, заримд нь нийтлэг өвөг дээдэс гэж байхгүй, урт удаан хугацаанд өөр хоорондоо контакттай байгаагүй.

Орос оронд үнэн алдартнууд, мусульманчууд, буддистууд, бөө мөргөлтнүүд, шашны бусад төлөөллүүд бий бөгөөд ялгарал нь улам хүчээ авч байна. Бүс нутгууд нь өөр хоорондоо асар хол оршдог, тиймээс маш олон үндэстэн угсаатан харилцан хамаарал гэж байхгүй. Орос орон бүхэлдээ газар зүйн тун муу хэлхээ холбоотой, зам харилцаа ч зарим газраа байхгүй. Тийм учраас Путиныг зайлсны дараа юм уу, зайлуулсны дараа улс орны ирээдүй яах бол гэсэн айдас оросын нийгэмд буглаж байна. Тарж бутрах дээрээ тулбал нэн амархан, Оросын ирээдүй маш баргар байна гэж эх оронч Михаил Полынков сэрэмжлүүлжээ.

Дээр юу өгүүлнэ вэ? Украиныг бутцохиж эзэлж авах нь бүү хэл Орос орон өөрөө хөмөрч ойчихыг хэт үндсэрхэг, шовинист Полынков дотроос нь анхааруулсан байна. Дайн үргэлжлэх тусам Орос эх орон нь суларч доройтолж, дотроо тэсрэлтийн өмнөх уур амьсгал буглаж, хэзээ мөдгүй ойртсон, маш том хямрал айсуй гэж ганц энэ нөхөр ч биш, кремлийн суртал ухуулагчдын зарим нь сэтгэл түгшин ярьдаг, бүр ТВ-ээрээ хашгачдаг болж байна. Орос эх орон нь дайнд ялна гэдэг эцсийн  горьдлого унтрахад ийнхүү ойрхон байна!  

Адьяaгийн Батсайхан (бэлтгэл хошууч)