sonin.mn
Сэтгэгдэл (30)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Бүтэн гурван жил дуусах дөхөж байдаг, гэтэл стратегийн ганц ч ялалтгүй. Харин ч бүр ОХУ-ын нутаг руу оруулаад ирсэн тухай мэдээллээс хөрвүүлж буулгая.

 

Оросоос тун хачирхалтай мэдээ таржээ. Хакерууд Оросын иргэний бүртгэлийн газрын (Росрегистр) серверт нэвтэрч ОХУ-ын бүх иргэний хувийн мэдээллийг хулгайлжээ. Гэтэл олон жилийн турш Оросын хүн ам 145 сая гэж худлаа мэдээлж ойлгуулдаг байсан нь илэрч бөөн сенсаац дэгдээв. ОХУ маань уртаашаа 82 сая хүн амтай гэдэг нь ил болжээ гэх мэдээ сайтуудад явж байна. Энэ үнэн болов уу? Хэрэв үнэн бол Украин дахь дайнд нь ч нөлөөлж таарна. Цэрэг татлага, дайчилгаа явуулаад ялалт ирэхгүй гэдгийг нь энэ “82 сая” гэсэн тоо нотлох бус уу?

 

Оросын суртал ухуулгачид мэдэн будилан эцсийн найдвараа Трампад тавьж ТВ-үүдээр үлгэр домог, тэнгэрийн юмаа ярьсаар байна. Харин үнэмшдэг нь хэд байдаг бол? Манайд ч орос хэл гадарладаг, бас Орост хайртайчууд итгэж сэтгэл сэргэж догдолмоор зүйлийг политолог Карасёв гэдэг хүн ярьж байх юм.


Тэр зурагтаар улайм цайм ингэж ярив:–Европ гэж цаашид байхгүй, НАТО ч гэж бас алга. Европын Холбоо бас алга боллоо. Зөвхөн хүчирхэг Орос ба трампистууд л үлдлээ. Гэхдээ АНУ даан ч хол юм. Харин яаж тийшээ холбогдох вэ? Тэгвэл тэднийг байхгүй болохлоор л холбогддог байгаа даа гэжээ. Украины аюулгүй байдлын алба өнгөрөгч 13-14-нд шилждэг шөнө ОХУ-ын нутаг дэвсгэр дэх хэд хэдэн объектод гайхалтай цохилт өгчээ. Украины аюулгүй байдлын алба, батлан хамгаалах хүчний мэдээллээс үзвэл ийм ийм байгууламж, байрлалд цохилт очжээ.

 

  1. Тула мужийн Алексинск хот. Химийн комбинат. Дронууд халдсаны дараа томхон гал түймэр дэгдээд хэдэн цаг шатав. Одоо ч үнс нурам уугисаар байна.
  2. Саратов мужийн “Энгельс” аэродром дахь бөмбөг пуужингийн агуулах–тэнд нь ФАБ, КАБ бөмбөг, далавчит пуужингууд хадгалж байсан нь дэлбэрч шатжээ. Олон цагийн дэлбэрэлтээр агуулах бараг хоосорчээ.
  3. Саратовын нефть боловсруулах завод. Томхон гал түймэр дэгдээд хэдэн цаг шатав. 
  4. Брянск мужийн Сельцо хот. Химийн завод. Химийн гэсэн атлаа тэнд нь их бууны сум, инженерийн сум, X-59 далавчит пуужингийн эд анги үйлдвэрлэдэг байжээ. Дрон байгаа яг оносон тул маш хүчтэй дэлбэрэлт доргилт мэдрэгдэж олон цаг гал түймэр авалцан шатжээ. Одоо ч шатаж байна.
  5. “Казаноргсинтез”-ийн үйлдвэрүүд цохилтод өртөж их хэмжээний гал авалцаж одоо ч үргэлжлэн шатаж байна. Эдгээрээс гадна “Тор”, “Бук” загварын агаарын довтолгооноос хамгаалах хоёр системийг сөнөөжээ. 


Казань, Саратов, Энгельс, Брянск, Тула, Тамбов, Нижнекамск болон Оросын бусад хотууд ийнхүү украины дрон ба нисэгчгүй онгоцны халдлагад өртлөө. Телеграм-каналд бичсэнээр Оросын 12 бүс нутагт дрон, нисэгчгүй онгоцоор довтолжээ. Орон нутгийн эрх баригчид аргаа барахдаа аэропортуудаа хааж, сургууль цэцэрлэгийг завсарлуулжээ. Гэтэл ОХУ-ын БХЯ ам үдээтэй. Учир нь өрнөж буй цагийн байдалд оперативын үнэлгээ хийж, шийдвэр гаргаж чаддаггүй.


Украиныг эзлэн авч дагуул боолоо болгох гэсэн гурван жилийн өмнөх цэргийн тусгай ажиллагаа өнөөдөр Орост ийм л гамшиг авчраад байна. Украин нь ганц шөнө 200 дрон хөөргөчих чадалтай болсон бол Орост түүнийг амдан сөнөөдөг хүч хэрэгсэл илт дутаж байна. Харин иргэддээ бүгдийг нь амдан устгалаа гэж губернаторууд ам мэдэн мэдээлдэг боловч олон өдөр дүрэлзэн шатаж буй энэ олон байгууламжуудыг оросын иргэд харахгүй, сонсохгүй, мэдрэхгүй өнгөрнө гэж хэрхэвч үгүй.


Украины зэвсэгт хүчин дайсныхаа цэргийн объект, цэргийн зориулалттай үйлдвэр, мөн цэрэг-аж үйлдвэрийн бүх цогцолборын нарийвчилсан судалгаа хийж дуусгаад цохилт өгөх графикаа боловсруулж байна.


Оросын нутагт цохилт амсан шатаж сөнөж байгаа зэвсгийн агуулах, нефть шатахууны үйлдвэр, бааз, химийн заводууд бол ОХУ-аас Украинд явуулж буй дайных нь хүч чадал боломжид хамгийн хүнд, эмзэг тусч байгааг оросын суртал ухуулагчид хүлээн зөвшөөрцгөөж байна. Үнэндээ ч Орост дуусашгүй их зэвсэг, сум, бөмбөг, пуужин, ширгэшгүй их бензин шатахуун, алуулж барагдахгүй их цэрэг (хүний алтан амь!) гэж байхгүй л дээ. Дээр юу өгүүлнэ вэ? Украиныг бутцохиж ялах нь бүү хэл дайны фронтыг Орос нутагтаа оруулаад ирсэн, одоо яаж ч чадахгүй гэдэг нь харагдаж байна. Энд Курскийг яриагүй байна. Курскээ 5 дугаар сарын 9-ний ялалтын баяр гэхэд чөлөөлнө гэж арай шогтохгүй байгаа даа? Орост хайртайчууд Украин ба Зеленскийг амаа цангатал харааж болно! АНУ ба Баруун Европ, НАТО-г нус цэр угаадсаараа тургиж болно! Харин Орос энэ дайндаа ялна гэж горьдсоор байвал эрүүл мэнд, тархи нерв чинь хэр удаан тэсэх бол!  



Адьяaгийн Батсайхан (бэлтгэл хошууч)