sonin.mn
Сэтгэгдэл (39)

Украин дахь Оросын цэргийн тусгай ажиллагаа (СВО) 2 жил 10 дахь сар руугаа (1006 өдөр шөнө) дөхөж байгаатай холбогдуулан мэдээллийн тэнцвэртэй байдал хангах үүднээс украины Freeдом ТВ-ийн мэдээлэл, Европын дипломат албаны тэргүүн Ж.Боррель, Францын Ерөнхийлөгч Э.Макрон, Польшийн Ерөнхий сайд Д.Туск, АНУ-ын сенатч Майк Раундс зэрэг улс төрчдийн ярилцлага мэдэгдлээс орчуулж сонирхуулъя. Энд sonin.mn сайтын байр суурь тусгагдаагүй болно.

 

Европт газар нутгийн хамгийн том аннекс сүүлийн 75 жилд тохиогоогүй, түүнийг Орос л хүчээр хийхийг зорьж байна. Аннекс гэдэг нь бусдын нутаг дэвсгэрийг хүчээр хавсарган нэгтгэх. Украин зөвхөн ийм аннексын эсрэг эх орноо хамгаалах дайн хийж байна.


Гэтэл Дональд Трамп нь Укрнацистуудыг дэмжихгүй, иймд Европын даган баясагчид амаа үдүүлээд нуувчиндаа орно, Бандерчууд 5 хоног ч тэсч чадахгүй, хувь тавилан Орост ялалт авчирна гэсэн гэнэн тэнэг бодолтой хүн дэлхийд олон байна. Украиныг ялагдуулж, Оросыг ялуулахад европчууд бэлэн байна уу гэдэгт хариулт хайя. Украины тухай шийдвэр Украины оролцоогүйгээр гаргах ёсгүй. Европчуудын оролцоогүйгээр Европын шийдвэр ч гарах ёсгүй. Манай иргэдийн аюулгүй байдлыг хангахын тулд хүчирхэг Украин, хүчирхэг Европ, хүчирхэг Альянс байх ёстой. Украинд шаардлагатай зайлшгүй бүх дэмжлэгээ үзүүлэхийг бид НАТО-д, холбоотнууддаа уриалсаар байх болно. Энэ бол хэлэлцээнд суулгах цорын ганц зам мөн–Эмманюэль Макрон.


Украин дахь энх тайвны төлөө нягт хамтран ажиллахыг Европ Трампад уриалсаар байна. Европын Холбооны Дипломатын тэргүүн Жозеп Боррель үүрэгт ажлаа өгөхийн өмнөхөн Украинд айлчлаад ийм агуулгатай ярилцлага өгчээ.

 

  1. АНУ-ын шинэ Ерөнхийлөгч Трампын сонгуульд ялалт байгуулсан нь дэлхий дахин өөрчлөгдөх тухай, үнэний тухай ойлголт руу, улс төрийн шинэ хандлага руу шилжиж байгааг дэлхийд илтгэн харуулав.
  2. Европ нь аюулгүй байдлынхаа төлөө илүү хариуцлагатай байж, нөлөөгөө хадгалахын тулд хүчээ нэгтгэх ёстой.
  3. 2024 оны 6 дугаар сард гарын үсэг зурсан Европын Холбооны 10 жилийн аюулгүй байдлын тухай гэрээний хүрээнд Украинд дэмжлэг үзүүлсээр байх болно. Энэ тусламж бол буяны үйлс биш, харин Европын Холбооны аюулгүй байдалд оруулж байгаа чухал хувь нэмэр юм.
  4. Унгар улс Украинд зэвсэг нийлүүлэх талаар заримдаа маргаантай, мөн Оростой хэлэлцээ хийхийг уриалдаг. Гэхдээ Орост хориг арга хэмжээ авах, Украинд санхүүгийн ерөнхий тусламж үзүүлэх тухай Европын Холбооны өмнөх бүх шийдвэрийг Унгар дэмжсэн. Энэ дэмжлэгийн хэмжээ 122 тэрбум Еврод хүрсэн.
  5. Украинд цэргийн тусламж үзүүлэх талаар Европын Холбоо илүү шуурхай арга хэмжээ авч болох байсан. Шинэ үе шат болгон урт хугацааны хэлэлцээ, гишүүн орнуудын хоорондын санал зөрөлдөөнийг даван туулах зэргээс ихээхэн шалтгаалдаг. Гэхдээ л төмөр малгайнаас эхлэсэн дэмжлэг F-16 онгоцтой болтол үргэлжиллээ.
  6. Жилд нэг сая их бууны сум нийлүүлэх тухай Европыг Холбооны зорилт бараг биелсэн. Одоогийн байдлаар 980 мянга гаруй сум нийлүүлээд байна.
  7. Европын Холбооноос тавьж буй шалгуур шаардлагуудыг чанартай биелүүлснээр Киев нь бусад нэр дэвшигч улсуудыг давж гарсныг Европын Комисс дүгнэлээ. Украины хийж буй шинэчлэл реформ нь Европын Холбооны стандартад нийцэж байгаа бөгөөд тус улс Европын Холбооны нэг хэсэг болох чин хүсэлтэй байгааг нь тэдгээр реформ илтгэн харуулж байна.
  8. Европын Холбоо бол цэргийн холбоо биш ч гэсэн тусламж дэмжлэг үзүүлэх механизмтай хэвээр байна. Тодруулбал Европын Холбооны гэрээгээр аль нэгнийх нь эсрэг түрэмгийлэл үйлдсэн тохиолдолд гишүүн орнууд эв санааны нэгдэлтэй байх үүрэг хүлээсэн байдаг. Украиныг тус холбооны гишүүн болбол Европын Холбоо илүү идэвхтэй дэмжихэд бэлэн байна гэжээ.

 

Бид геополитикийн болон Атлантын далай дамнасан нөхцөл байдал, Украины нөхцөл байдлын талаар ижил төстэй үзэл бодолтой улс орнуудтай хамтын ажиллагаагаа маш эрчимтэй зохицуулах болно. Мөргөлдөөнийг даамжруулахыг хэн ч хүсэхгүй. Үүний зэрэгцээ Украиныг сулруулж, бүр бууж өгөхийг хэн ч хүсэхгүй. Энэ нь Польш болон бидний ашиг сонирхолд ноцтой аюул учруулах болно–Д.Туск

 

The Telegraph бичжээ: Сэр Кейр Стармер, Эммануэль Макрон нар Украинд үзүүлэх АНУ-ын дэмжлэгийг багасгах гэсэн Дональд Трампын хүчин чармайлтыг зогсоохоор цуцалтгүй оролдоно. Оросын гүн рүү “Storm Shadow” пуужин Украин харваж болох зөвшөөрөл өгчихсөн. Трампыг хичнээн шахсан ч энэ шийдвэрээсээ няцахгүй гэжээ.

 

Фронтын байдал. Цоо шинэ тив алгасагч баллистик “Орешник” пуужин Украины Днепр хот руу харваснаа ОХУ-д ид бах болгон сурталчилж байгаа бол оросын сөрөг хүчний хоёр зүтгэлтэн Игорь Яковенко, Виталии Портников нар энэ пуужинг шинэ бүтээл биш, шинээр ямар ч пуужин бүтээгээгүй, туршаагүй, зүгээр л зүсийг нь хувиргаж гадрыг нь будсан “Пионер” гэх хуучин пуужин гэж нотлон ярив. Оросын блогер Максим Вихруци “Ямар ч орешник Оросын нуралтыг аварч чадахгүй” гэв. Фронтод энэ хэдэн өдөр ана мана тулалдаж байна. Орос ялалт хангаагүй, гэвч давшсаар. Украин ялагдаагүй, гэвч амжилттай хориглон няцаасаар. Харин ч Орост маш их хохирол учруулан, эх орноо хамгаалан байлдсаар байна. Украины пуужингийн довтолгоонд оросын нэг генерал, 18 офицерээс гадна хойд солонгосын 500 орчим цэрэг офицер алагджээ гэсэн мэдээ орос генералын зурагтай явж байна. Хойд солонгосын хурандаа генерал бункерт бөмбөгдүүлж хүнд шархаджээ.


В.Путины байр суурь, үзэл бодол тун тогтворгүй байна. Ийм дайн өдүүлсэндээ хамгийн ихээр шаналан тарчилж байгаа гол буруутны цөхрөл нүүрнээс нь, унтарч буй нүднийх нь харцнаас, хэл ярианаас нь илт харагдана. Оросууд яах гэж Украин руу довтолсон юм бэ гэдэгт “Тусгаар тогтнол, бүх нийтийн эрх, эрх чөлөөг нь хамгаалахын тулд довтолсон” гэж ярьжээ. Ам халж будилав уу, эсвэл дайны гэмт хэрэгтэн болчихгүй гэсэндээ тэгж цөхрөлийн үгээ хэлэв үү гэдэгт нэгэн орос блогер сайтад ингэж хариулжээ:

 

Орхигдуулсан гурван асуултад оросын эрх баригчид хариулт өгөх үлдэж байна гээд,

 

  1. Украины бүрэн эрх, эрх, эрх чөлөөгүй иргэд яаж тийм эрх, эрх чөлөөнийхөө тээгч болох вэ? Тэд хэзээ ч харж эдэлж байгаагүй үнэт зүйлсээ хэрхэн авч явах, эсвэл хамгаалах вэ?
  2. Украинд Орос геноцид хийснээрээ “Тусгаар тогтнол, бүх нийтийн эрх, эрх чөлөөг” нь хэрхэн хамгаалах вэ? Бүрэн эрхт байдал, бүх нийтийн эрх, эрх чөлөөг нь хамгаалсан юм бол Украины ард түмнийг устгах ёстой гэсэн оросуудын логиктой нь яаж авцалдах вэ?
  3. Украин улс бүх хүн төрөлхтний хөгжлийн замд саад болсон, хэрхэн яагаад “муугийн цайз” болсон талаар мэдээлэл Оросоос өөр газар байна уу? Хаанаас хайх вэ? Яагаад зөвхөн Орост энэ талаар мэддэг, гэтэл дэлхий даяар яг эсрэгээр нь ойлгодог вэ гэжээ.

 

АНУ-ын сенатч Тед Круз 2022 оны хоёрдугаар сард Орос Украин руу довтлохоос өмнө ингэж хэлж байжээ:–Бидэнд амлалт бий. Украин цөмийн зэвсгээсээ татгалзсаны хариуд бид, АНУ Украины нутаг дэвсгэрийн бүрэн бүтэн байдлыг хамгаалах болно гэсэн тодорхой баталгааг өгсөн шүү дээ!


Д.Трамп Орос-Украины дайнд шударга ёс тогтооно, хэрэг дээрээ Путиныг ялуулна гэдэгт АНУ-ын Конгрессын Сенат дахь Трампын гол хамтран зүтгэгч Майк Раундс ингэж хариулжээ:–Путинтэй ямар ч хэлэлцээ хийгээд нэмэргүй. Тэр зогсохгүй. Украины нутаг дэвсгэрийн зарим хэсгийг өгөөд ч зогсохгүй. Бид өөрсдийгөө хуурах хэрэггүй. Хялбар зам гэж огт байхгүй. Бид Украинд хангалттай зэвсэг өгөөгүй нь туйлын харамсалтай. Украиныг цөмийн зэвсгээс нь татгалзуулах үедээ авсан Украиныг хамгаалах үүргээсээ бид урвасан! Конгрессын Төлөөлөгчдийн танхим дахь БНН-ын бүлгийн гишүүн Жо Вильсон:–Украиныг түрэмгийлсэн түүх 2014 онд ч, 2022 онд ч эхлээгүй юм. Бүр 1994 онд тусгаар тогтнолынх нь баталгаа болгож цөмийн зэвсгийг нь хурааж аваад Будапештын санамж бичиг байгуулснаар эхэлсэн. Украин үүргээ бүрэн биелүүлсэн. Харин тусгаар тогтнолыг нь батлан даагчид болох АНУ, ОХУ, Их Британи үүргээ шившигтэйгээр хөсөрдүүлсэн! Трампын өөрийнх нь намынхан хэлд ороод эхэллээ. Украиныг Трампаар тоглуулахгүй шүү гэсэн сануулга биш гэж үү?

 

Англи, орос хэлнээс хөрвүүлсэн Дүгэржавын Номиндарь