sonin.mn
Сэтгэгдэл (90)

Харьковт цэргийн нэгдсэн дээд сургуульд суралцаж, эх орондоо эр цэргийн алба хааж явсан цэргийн мэргэжилтэйн хувьд Орос-Украины энэ дайн ОХУ-ын нутаг дэвсгэрт шилжин орж ирсэн тухай https://nv.ua/world/countries/ сайтад өчигдөр орой бичсэнийг орчуулж монголчууддаа үнэнийг мэдээлье.


Гуравдугаар сарын 12-ны шөнө буюу даваа гаригаас мягмар гаригт шилжих шөнө ОХУ-ын Курск, Белгород, Тула, Воронеж, Нижегород, Брянск, Ленинград, Орёл мужууд, мөн Москва хот халдлагад өртжээ. Орёл хотод нефть баазын район дэлбэрч, ихээхэн түймэр дэгджээ, мөн Нижегород мужид Лукойлын нефть бааз шатаж байна.


Халдлагыг Украины зэвсэгт хүчин агаараас нисэгчгүй онгоцоор хийсэн бололтой байна. Тэр өдөр оросын цэргийн хоёр ч онгоц – Ил-76 нутагтаа осолдож, Су-27 Белгородод сөнөөгджээ. Оросын 9 муж хот руу ийнхүү агаараас халдсантай давхцан оросын иргэдээс бүрдүүлсэн Легион Свобода России (Оросын эрх чөлөө легион), Русский добровольческий корпус (Оросын сайн дурынхны корпус), Сибирский батальоны (Сибирийн батальон) хамтарсан цэргийн хүчин (нийт гурван батальон) танк, хуягтаар дэмжүүлэн ОХУ-ын улсын хилийг даван орж Курск, Белгород мужид “ОХУ-ыг дарангуйлагч дэглэмээс чөлөөлөх”-өөр байлдаж байна. Кремлийн дарангуйллыг эсэргүүцдэг оросын сөрөг хүчний иргэдээс бүрдүүлсэн хамтарсан цэргийн хүч ийнхүү Оросын улсын хилийг даван орсон нь дайны явцыг үндсээр эргүүлэхгүй ч  тактикийн анхны амжилт авчирлаа хэмээн Украины Жанжин штабын спикер асан хурандаа Владислав Селезнев дүгнэжээ.


Оросын олон мянган дайчин зэвсэг техниктэйгээ Курск, Брянск, Белгород муж руу цөмрөн орж байлдаж байгаа нь хөрш зэргэлдээ орноо эзлэн түрэмгийлж устгах дайн өдөөсөн тэр Орос эх оронд нь оросууд өөрсдөө аюулгүй, элбэг дэлбэг, сайн сайхан аж төрөх бололцоогүй, хэрэг дээрээ тэд ямар ч хамгаалалтгүй улсад амьдарч байна гэдгийг оросуудад нь жинхэнээсээ мэдрүүлэх болно гэж Селезнев ярьжээ. 


Белгород мужийн Лозовая Рудка сууринд 12-ны өглөө босогчдын танк орж ирсэн бол Курск мужийн Теткино сууринг бүрэн чөлөөлж мэдэлдээ авчээ. Оросын хилчид, цэрэг, цагдаа байлдалгүй тарж зугтаж байгаа бичлэг 12-ны өдөр сайтуудад олон тавигджээ. Оросын эрх чөлөө легионы дайчдын мэдэгдэл хийж буй видео уриалга таржээ. 


Тэд ОХУ-ын Ерөнхийлөгчийн хуурамч сонгуулийг “хийлцэх”-ээр Оросын нутагт орж ирсэн, “Бид Та бүхнийг гуйлгачлал, ядуурал, диктатураас чөлөөлөхөөр Курск, Белгород муж руу орлоо”, “Путины дээрэмчдийн дарлал диктатураас чөлөөлөгдсөн Орос орны тухай бид мөрөөдсөн”, “Тэр мөрөөдлөө хэрэгжүүлэхээр бид бүх хүчин чармайлтаа дайчилна” гэж цэргийн дарга нь Оросын ард түмэнд хандан мэдэгдэв. Одоогоор Оросын сайн дурынхны корпус ба Сибирийн батальоны тусдаа мэдэгдэл хийгдээгүй байна.  Хилийн хоёр муж агаарын халдлагад өртөж, “украины хорлон сүйтгэгчид” нутагт нь нэвтрэн орж ирж тулалдаж байгааг Белгород мужийн захирагч Вячеслав Гладков, Курск мужийн захирагч Роман Старовойт нар хүлээн зөвшөөрч, хүмүүс алагдаж шархадсан гээд хэдэн тоо хэлэв. Орон нутгийн өөрийгөө хамгаалах цэрэг дайчилсан, өөрийгөө хамгаалах бэлтгэл хийж байна гэв. Белгород,  Курск мужид украины 234 “хорлон сүйтгэгч”-ийг, 7 танк, байлдааны гурван машин, хуягт тээвэрлэгч хоёрыг устгав хэмээн ОХУ-ын БХЯ яаран мэдэгдэл хийсэн нь ОХУ-ын иргэд өөрсдөө цэрэг арми байгуулаад Кремлийн эсрэг босоод ирсэн гэдгийг үгүйсгэх, бас дэгсдүүлсэн тоо зохиож суртал нэвтрүүлэг гэж байна хэмээн босогчдын армийнхан мэдэгдэв. Бодит байдал дээрээ тийм зүйл болоогүй гэв.


“Сибирийн батальон” хэмээх цэргийн нууцлаг ангийн тухай мэдээлэл мэр сэр ил болов. Зөвлөлтийн армид болон Оросын цэргийн гадаад тагнуулд алба хааж байсан якут үндэстэн Владислав Аммосов гэгч 2023 оны нэгдүгээр сард ийм анги салбарыг анх “Саха” гэсэн нэртэйгээр Украины зэвсэгт хүчний гадаад легионы бүрэлдэхүүнд байгуулснаа зарлаж байв. Түүний бүрэлдэхүүнд Оросын Сибирь, Алс Дорнодын бүс нутгийн олон үндэстний иргэд (Саха, Чукотка, Буриад, Тува, бусад бага үндэстнүүд) сайн дураараа нэгдэж орсныг Иргэний Зөвлөл гэгч нь дараахан нь тунхаглав. 2023 оны 10 дугаар сард “Сибирийн батальон”-ы хээрийн сургуулийн тухай мэдээ түгэв. Олон арван дайчдаас бүрдсэн цэргийн анги болж бэхжив. Ингээд 2023 оны 11 дүгээр сард анх удаа Авдеевкийн фронтод оросын армийн эсрэг тулалдаанд оролцов. Одоо Белгород, Курск мужид нэвтрэн ороод байна гэснээс өөр мэдээлэл алга. 


орчуулсан Адьяaгийн Батсайхан (бэлтгэл хошууч)