sonin.mn
Сэтгэгдэл (47)

Гайхалтай. Facebook-ээс шавийн пост ба дагалт коментуудаар нийтлэл босгоод авлаа. Эхлээд коментуудаас сонирхуулъя. Бичсэн эзэд нь хүлцээрэй: Би Та нараас будаа идчихлээ! Хөгжиж дэвжиж өгөхгүй, ядууралтайгаа зууралдсаар байгаагийн шалтгааныг шавь маань янзтай гоё, маш энгийнээр буулгажээ.


Монголчуудын ТАМЫН АМЬДРАЛ!

Д.Баярхүү




  • Swap Wife World гэдэг Америк, Англи, Австралид дэлгэрсэн франчайз контент юм байна
  • Бидний үнэн төрх, ядуу байгаагийн цаад шалтгаан нь мөнгөндөө биш хүндээ
  • Маш товчоор маш том агуулга багтсан байна
  • Яг л бидний амьдрал юм даа. Яаж өсгөж, хүмүүжүүлсэн, хэрхэн түшиж, өндийлгөсөн гээд л
  • Харин хөдөөд, гэр хороололд мөнгө тараадаг нь хүнийг хүн биш, эрүүл биш болгож өөрчилдөг юм байна лээ, аймшигтай
  • Яг л нүднээ бууж байна. Хэдэн юм бодогдлоо
  • Наад нэвтрүүлэгт чинь орж аймаар тансаг айлын эхнэр болж үзэхийнсэн
  • Яг манай Монгол
  • Хэрэгтэй хэрэггүй юм ТV-ээр гаргаж байхаар иймэрхүү нийгэмд хэрэгтэй шоу нэвтрүүлгүүдийг орчуулгатай гаргаж байвал сургамжтай, хэрэгтэй юм даа
  • Биднээс мөнгө авдаг бүх ТВ-үүдэд иймэрхүү нэвтрүүлэг заавал хийх үүрэгтэй болгомоор байна. Тэр монгол киноныхоо цагаар
  • Халамж ийм л аюултай
  • Гайхалтай нэвтрүүлэг чирч иржээ. Олон хүнд хүрч, олон хүн үзээсэй
  • Манай улсын гал тогоонд хэзээ тийм эзэгтэй шиг хүн орж ирэх юм, бүү мэд дээ



Хоёр гэргийн солилцоо


Swap your wife гэдэг Амеркийн нэг нэвтрүүлэг үзлээ. Нэг нь чинээлэг дундаж анги, нөгөө нь халамжийн ангийн хоёр айл эхнэрүүдээ хэсэг хугацаанд сольж, тухайн айл ямар өөрчлөлтөд орж байгааг харуулдаг контент юм байна. Эхнэрүүд нь тэр айлын эзэгтэй болж, үр хүүхэд, гэр орны ажлыг гүйцэтгэж, нөхрүүд нь ажилдаа явж, санхүүгээ шийдвэрлэнэ.

 

Нэг


Гэтэл ядуу айлын авгай хэт илүүдэл жинтэй, арьс үсний арчилгаа муу мөртлөө хэтэрхий их буддаг, хувцас хунар нь зүгээр драг куин, цаашаа ганган, гархи мархи нь барагдахгүй. Тэр ирсэн айлдаа эхэндээ жаахан хөгжилтэй, инээд ханиадтай, эрх чөлөөтэй уур амьсгал бүрдүүлж, дуулж бүжиглэж, айлын нөхөр хүүхдүүдийг хөөрөлтийн байдалд оруулах боловч хоёр хонохгүй хүнс нь дуусч, гал тогоо нь дэлбэрч, хүүхдүүд нь өмсөх цэвэрхэн хувцасгүй, ланч бокс нь зүгээр л чипс, снакс болж, сургуулиас нь хоцрооно, дугуйлангуудыг нь таслуулна.


Дөрөв хонохгүй хоол хийхгүй, гаднаас хоол захиалж иддэг болж, гэрээрээ баахан жанк фүүд идэж, хог нь хайрцаг саваар дүүрнэ. Долоо хоноогүй байхад өрхийн зардлаа зохицуулах төсөв нь дуусч, айлын нөхрөөс мөнгө нэхнэ.


Гэр орон нь нохойн хороо, гараж сав нь замбраагүй агуулах, гадаахи газон талбай нь арзайж сарзайсан юм болж, өнөөх бүдүүн авгай өдөржин диван дээр хэвтэж, зурагт үзэж, тойруулаад попкорн, ундааны сав өрөөтэй, чипс снакс хивж хэвтэнэ. Айлын нөхөр тэсэхээ байгаад хэдэн үг хэлэнгүүт хашгирч чарлаж хэрэлдээд, чиний өгсөн мөнгө хаанаа хүрдэг юм, хичнээн өндөр цалин авч байж нарийндаа хатсан, муусайн баячууд, таануус биднийг шулдаг, дөрвүүлэхнээ нийлээд төчнөөн метр кв байшинд, өчнөөн зардлаар тансаглаж байхад чинь цаана чинь бидэн шиг хэдэн мянган эгэл бор хүмүүс хоногийн хоолныхоо төлөө зовж, Та нарыг л баян байлгахын төлөө зүтгэж байна, хэтэрсэн хэрэглээнээс чинь болж байгаль дэлхий сөнөж байна, төр засаг ижил тэгш хандсангүй, бидний боломжийг булаалаа, бүх юм хуйвалдааны онол, би ядуу ч гэсэн сайхан сэтгэлтэй энэ тэр гээд байж болох бүх солиорлоор савчиж өгнө.


Хоёр


Харин ядуу айлд очсон нөгөө эхнэр эхний өдрөөсөө л тэр айлынхантай зөрчилд орно. Гэр орон нь замбраагүй, хаалга үүд нь байнга савчаад, хүүхдүүд нь дуртай үедээ орж гарна. Айлын нөхөр цагийн, эсвэл ээлжийн ажил олохгүй бол өдөржин үүднийхээ довжоон дээр пиав гударч, соошл ухаж, видео үзэж өнгөрөөнө.


Гэр орон мэдээж нохой байтугай гахайн хороо, хамаг сав суулга нь түлэгдсэн, угаалтуур нь бохир аяга шаазангаар дүүрсэн, хөргөгч нь дэлбэ, хүүхдүүд нь гоёж гангалах, нэг л өдөр баяжих тухай ярихаас биш сурах, зорих тухай ойлголтгүй, эцэг хүүхэдгүй бохир үг хэллэгтэй яриатай.


Айлын эхнэр тэдэнтэй ярилцаж, дүрэм тавьж эхлэхэд тэд бүгд эсэргүүцэж, айлын нөхөр бид хүүхдүүдээ хайрладаг, тэд чөлөөт үзэл бодолтой, бид ядуу ч гэсэн амар амгалан, өөрсдийнхөөрөө амьдардаг, угаасаа шаардлагатай гэж үзвэл гэрээ цэвэрлэчихнэ, тэгээд ч тэр чинь эхнэрийн ажил, бид бол амьдрах гэж ядарч байна, зүдэрч байна, тэгэж байхад нэмээд битгий дарамтлаад бай энэ тэр гээд юу ч хүлээж авахгуй. Нэг хоноход айлын эхнэрийн хийсэн хөдөлмөрийг хэн ч хүндлэхгүй. Энд тэнд сууж, зөвхөн пицца, шарсан тахиа захиалж, замбраагүй идэж уудаг байсан тэр айл ширээ тойрон айлын эхнэрийн хийсэн гэрийн хоолыг идэж, халуун дулаан яриа өрнүүлснийхээ дараа арай аятайхан болно.


Ямар ч байсан гэртээ хараалын үг хэрэглэхгүй байхыг зөвшөөрнө. Хоёр хоногийн дараа гэр орноо цэвэр, цэмцгэр байлгахыг хичээж, аяга тавгаа энд тэнд хаяхгүй болж, юмаа хурааж, угааж цэвэрлэж эхэлнэ.


Дөрөв хоноход хүүхдүүд нь дуртай үедээ хичээлээ тасалдаг байсан бол өглөө цагтаа босч, орой цагтаа унтаж, гэр орны хуваарьт ажлаа хийдэг болж, гадуур хооллох биш гэрээсээ ланч бокс авч явдаг болж, хичээлийн дараа айлын эзэгтэйн хамт гэр бүлээрээ өнгөрөөх цагтай, тоглоомын талбай, цэцэрлэгт хүрээлэн, үзвэр үйлчилгээгээр явж, өөр хоорондоо сонирхолтой зүйлс ярьж, амьдралын учир, зорилго тэмүүллийн талаар хөөрөлдөж, эмэгтэй үргэлж тэднийг урамшуулж, зоригжуулна. Энэ бүх хугацаанд эмэгтэй эрхэмсэг байдлаа алдахгуй, цэвэрхэн эрүүл арьстай, даруу ч зохицсон дэгжин хувцастай. Долоо хоноход тэр эхнэр айлын нөхөртэй ярьж тэр хугацаанд гарсан зардал, үлдсэн мөнгө, хүүхдүүдийн мөрөөдөл, түүнд хүрэхэд босгох төсөв, хийх ажил, яагаад мөнгө төгрөг нь хүрдэггүйг, ямар байвал дэвжиж дээшлэх боломж байгааг, эрүүл бус амьдралын хэв маягаа өөрчлөхгүй л бол яаж ч мөрөөдөөд, хичээгээд үр дүнгүй тухай ярилцана.


Энэ хугацаанд нөгөө өдөржин ялхайж хэвтдэг нөхөр ч гэр орны ажилд тусалж, гадаахи үүд, довжоогоо янзалж цэвэрлэж, үс толгойгоо хүртэл засуулж, цагийн ажлуудаа нэмж, бүүр тогтвортой, байнгын ажлын байртай болохоор хөдөлмөрийн биржд бүртгүүлнэ. Ингээд бодохоор гэр бүлийн үнэт зүйл, эрхэм чанар л эрүүл нийгмийг бүтээдэг юм байна.


Аж төрөх ёс өөрөө амьдрах соёл бөгөөд энэ нь их ухаанаас биш, харилцан хүндэтгэл, сахилга бат, хөдөлмөр зүтгэлээр л оршин тогтнодог гэдгийг яруу тодоор харуулсан нэвтрүүлэг байлаа. Сайн иргэнийг сайн ээж л бэлтгэнэ гэдэг энэ. Эргүү тэнэг малууд үйлдвэрлээд байхгүйн тул эмэгтэйчүүд минь сайн л хичээгээрэй дээ. Эрчүүдээ зөв удирд, зөв чиглүүл, зөв хамтрагч нь бай! 


Иргэн Цоггэрэлийн Уянга