sonin.mn
Сэтгэгдэл (132)

УИХ-ын гишүүн асан, МАН-ын УЗ-ийн гишүүн Ч.Хүрэлбаатар сэтгүүлчдийн асуултанд хариуллаа.

Тэрээр: "МАН-ын УЗ-ийн хурал энэ удаа өргөтгөсөн хэлбэрээр явагдсан. Нөхцөл байдлаа дүгнэж, хуваагдсан байгаа хүмүүстэй уулзаж, яриа хэлцэл хийх ажлын хэсэг байгуулсан. Хэлэлцээрийн хүрээнд юу яригдах вэ гэдэг талаар янз бүрийн яриа гарч байх шиг байна.



Онцолж нэг зүйлийг хэлэхэд ажлын хэсгийн ажиллах хүрээ гэж бий. Дээр нь давж болохгүй шугам гэж бий. Давж болохгүй шугам гэдэг нь хууль юм.



Хуулийг давж ярьдаг, хэлэлцдэг зүйл хаа ч байхгүй. Хуулийн асуудал тусдаа. Мөн УЗ-өөс гарсан ажлын хэсэг төрийн хэрэгт оролцохгүй. Гишгэж болохгүй хоёр дахь ажил бол төрийн ажил. Цэвэр улстөрийн намын дотроо яригдах зүйлүүд. МАН-аас нэр дэвшээд гишүүн болсон хүмүүс хоёр хуваагдчихаад байгаа учраас бүлэг эхлээд нэг болоод, хамт хуралдаад, төрийн ажлаа хамтдаа ярьдаг болгохын төлөө ажиллаж байгаа.


Эвлэрэхгүй бол яах вэ? биш, яаж эвлүүлэх вэ? гэдэг ажлаа эхлээд яриадхая. Дараагийн зүйлийг дараа нь ярина аа. Би улстөрийн хувьд ажиглагчийн байдалтай байж байгаад саяхнаас л орж ирж байна. Намын асуудал хавраас үймэж эхэлсэн. Эдийн засаг унаад эхлэхээр үймэж эхэлдэг. Мөн эрх ашгуудын хоорондын зөрчил явсан болов уу гэдэг бодол байна. Эрх ашгийн эрэмбээ алдчихаар хоорондоо үл ойлголцол үүсээд эхэлчихдэг шүү дээ.



Өөр хоорондын ширээ сандлын асуудлаасаа илүүтэйгээр улс орныхоо эрх ашгийг харж манай намын аль аль талд байгаа хүмүүс эв зүйгээ олоод нэгдчих байх гэсэн ийм итгэлтэй байна.



Хэрэв та бүхэн санаж байгаа бол МАН-ын бага хурлаас өмнө УЗ дээр би өөрийн байр суурийг маш тодорхой илэрхийлсэн юм. Өчигдөр ч түүнийгээ хэлсэн. Ямар байр суурь байсан бэ? гэхээр Д.Амарбаясгалан даргаа, Г.Занданшатар даргаа та хоёр одоо бага хурал дээр битгий өрсөлдөөчээ. МАН-ын Их хурал дээр өрсөлдөөчээ. Бага хурал дээр өрсөлдөх юм бол намаа хувааж байна. Дахиад Их хурал дээр өрсөлдөнө. Дахиад хуваана. МАН-ыг ингэж олон удаа хуваагаад байх шаардлага алга. Намын бага хурал дээр та хоёр өрсөлдлөө гэж үзвэл хэн нь ч 2/3 санал авахгүй.



Яагаад гэвэл аль аль нь манай намын лидерүүд байна шүү дээ. Хоёр лидер үзэхээр санал 50 орчим хувь дээр л эргэлдэнэ. Түүнээс биш 2/3 авдаг зүйл амьдрал дээр ховор.



Ийм ойлгомжтой зүйл байхад хоёулаа өрсөлдөж, 50 орчим хувийн саналууд л авцгаасан шүү дээ. Тэгээд дараа нь намынхаа дүрмийг зөрчсөн нь бүгдэнд ойлгомжтой. Энэ зүйлийг УЗ-ийн хурал дээр хэлсэн. Аль аль нь хүлээж аваагүй." гэсэн юм.



М.Чой