sonin.mn
Сэтгэгдэл (29)

МАН-ын Удирдах зөвлөлийн хурал улс төрийн нөхцөл байдалтай холбогдуулан өргөтгөсөн байдлаар хуралдаж байна.


Хурлын өмнө Ерөнхий сайд асан, МАН-ын дарга асан С.Баяр сэтгүүлчдийн асуултад хариулсаныг бүрэн эхээр нь сийрүүлэн хүргэж байна.


"Хөдөө байж байгаад хуралд дуудагдаад ирж байна.


– Та ажлын хэсэгт орж ажиллах уу?


Одоохондоо мэдэхгүй байна. Хуралд яаралтай ир гэсэн.


Би улс төрийн бодит үйл ажиллагаанаас, урсгал улс төрөөс хол хүн шүү дээ. Зөвлөлийн гишүүн учраас хуралдаа ирж байгаа юм.


Эхлээд мэдээлэл авъя. Мэдээлэлгүй байж ярих, дүгнэх гэдэг чинь хэцүү шүү дээ.


– Энэ үүсээд байгаа нөхцөл байдлыг та хэрхэн дүгнэж байна вэ? Та бол туршлагатай улс төрч шүү дээ. Энэ чинь таны оролцож байгуулсан нам шүү дээ?


Мэдээлэл бол хэвлэл мэдээллийн та нөхдийн өгч байгаа хэмжээнд л ойлголттой байгаа байх.


– Та удирдах зөвлөлийн гишүүн биш атлаа хуралд дуудагдсан байна. Тэгэхээр ажлын хэсэгт багтаахаар таныг дуудсан гэж ойлгож болох уу?


Би ойлгохдоо, удирдах зөвлөлийг бодлогын зөвлөлтэй хамтарч хуралдуулах шийдвэр гарсан гэж ойлгосон. Тэгээд хөдөө байсан ч гэсэн “хүрээд ир” гэсэн. Эхлээд бүрэн мэдээлэлтэй болъё.


– Та хоёр талыг эвлэрүүлэхээр хичээл зүтгэл гаргаж байгаа гэсэн. Тэр нь юу болов?


Тэгээд нэг л бүтэж өгөхгүй байна шүү дээ.


– Яагаад? Юунаас шалтгаалж байна гэж та үзэж байна?


Одоохондоо яг хэлж мэдэхгүй байна. Хичээл зүтгэл гаргасан, одоо бол санаа зовмоор л байна.


Нэг намын асуудал цаашаа хальсаар байгаад энэ чинь төр рүү, төрийн хямрал руу орж байна. Тийм учраас зөвхөн нэг намын хүрээнд ярих биш, төр засаг, сүүлдээ Үндсэн хуулийн Цэц оролцоод эхэллээ шүү дээ.


Тиймээс энэ асуудлыг улс орны хөгжилд хохиролгүйгээр, зөвшилцлөөр шийдэх ёстой. Түүний төлөө уулзаж, ярилцъя, зөвлөе гэж байгаа юм байлгүй. Эхлээд бүрэн мэдээлэлтэй болчихоод, та нөхөдтэй дахин уулзъя.


Н.Отгончимэг