Энэтхэгийн Ерөнхий сайд Нарендра Моди Хятадад болсон Шанхайн хамтын ажиллагааны байгууллагын (ШХАБ) дээд хэмжээний уулзалтын үеэр ОХУ-ын Ерөнхийлөгч Владимир Путинтэй хийсэн хоёр талын уулзалтаа онцгой сайн хэмээн магтжээ.

“Би Тяньжинд болсон ШХАБ-ын дээд хэмжээний уулзалтын завсарлагааны үеэр Ерөнхийлөгч Путинтэй онцгой сайн уулзалт хийлээ. Бид худалдаа, бордоо, сансар огторгуй, аюулгүй байдал, соёл зэрэг бүх салбарт хоёр талын хамтын ажиллагааг гүнзгийрүүлэх арга замуудыг хэлэлцэв. Мөн бүс нутгийн болон дэлхийн хөгжлийн талаар, Украины зөрчлийг энх тайвнаар шийдвэрлэх асуудлыг оролцуулан санал бодлоо солилцлоо. Манай онцгой, давуу стратегийн түншлэлийн харилцаа бүс нутгийн болон дэлхийн тогтвортой байдлын чухал тулгуур хэвээр байна” гэж Энэтхэгийн Ерөнхий сайд X хуудаснаа англи, орос хэлээр бичжээ.

Энэтхэгийн Гадаад хэргийн яамны мэдээлснээр, Тяньжинд болсон Орос-Энэтхэгийн хэлэлцээний дараа Моди, Путин нар эдийн засаг, санхүү, эрчим хүчний салбар дахь хоёр талын хамтын ажиллагааны талаар хэлэлцэж, эдгээр салбарт харилцаа тогтвортой өсч буйд сэтгэл хангалуун байгаагаа илэрхийлсэн байна.

Мөн хоёр удирдагч бүс нутгийн болон дэлхийн асуудлуудыг, үүнд Украинд болсон сүүлийн үеийн үйл явдлыг хэлэлцжээ. Ерөнхий сайд Украинд гарч буй зөрчилтэй холбоотой саяхны санаачилгыг дэмжиж байгаагаа дахин илэрхийлж, зөрчил дуусгах, тогтвортой энх тайван тогтоох шаардлагатайг онцолсон байна.

Путин, Моди нар хоёр орны онцгой, давуу стратегийн түншлэлийг бэхжүүлэх үүргээ баталгаажуулсан бөгөөд Ерөнхий сайд Моди энэ жил 23 дахь удаагийн дээд хэмжээний уулзалтад Путиныг Энэтхэгт угтан авахыг тэсэн ядан хүлээж байгаагаа хэлжээ.

Путин, Моди нарын уулзалт албан бус хэлбэрээр эхэлсэн бөгөөд хоёр удирдагч Путингийн Aurus автомашинд Ritz-Carlton зочид буудал руу явах замдаа хоёулахнаа нүүр тулсан уулзалт хийжээ. Моторкад зочид буудалд ирэхэд дагалдан явсан төлөөлөгчид дотогш орж, Путин, Моди нар автомашинд яриагаа үргэлжлүүлсэн бөгөөд энэ яриа 50 минут үргэлжилжээ. Дараа нь удирдагчид төлөөлөгчдийн баг хүлээж байсан хэлэлцээний танхим руу орж, төлөөлөгчидтэйгээ хамт хэлэлцээ хийхдээ ойролцоогоор 50 минут зарцуулсан байна.

М.Чой

Эх сурвалж: tass.com