sonin.mn
Сэтгэгдэл (12)

Монголчууд бид ямар их мөнгө, зүтгэж олсон ажлын хөлсөө гадаад руу урсгаж байна. Цагаан сар бол үүний томоохон илэрхийлэл. Гэтэл саяхан Монгол Улсын Ерөнхийлөгч У.Хүрэлсүх үндэсний үйлдвэрүүдээрээ орж ажиллах үеэрээ ЭХ ОРОНЧ ХУДАЛДАН АВАЛТ хийхийг иргэдээ уриаллаа.


Бидэнд дэлхийг гайхуулсан "Говь"-ийн ноолуур. Дээдэс нялхастаа амсуулах чихэр бурам, садан төрөлдөө бэлэглэх гар урлал, оёдол хатгамал, арьс ширэн урлал, "Янмал"-ын оймс, ноос ноолууран бүтээгдэхүүн гээд нэг үеэ бодвол ажил хийдэг ард иргэд, аж ахуй нэгжийн бүтээгдэхүүн чамгүй л их болсон. 


Чадалтай нь ноолуур, чамбай нь ноосон эдлэл, эгэл борчуул нь оёдол хатгамал урлалаас өгсүүлээд түлхүүрийн оосор ч эх орны үйлдвэрлэгчдээсээ худалдан авч, ирсэн орсонд бэлэглээд байвал эргээд эх орондоо мөнгө нь үлдэнэ. 


Ийм л учраас Ерөнхийлөгч У.Хүрэлсүх ЭХ ОРОНЧ ХУДАЛДАН АВАЛТ ХИЙЦГЭЭЕ! гэж иргэддээ уриалсан. Монгол хүн таны эх орноосоо авсан бүтээгдэхүүн эргээд үндэсний үйлдвэрт нэг Монгол иргэний цалинг тавьж, үндэсний үйлдвэр өргөжин тэлэх нэг тоног төхөөрөмж авахад нэмэр болдог юм аа.


Таны худалдан авсан мөнгөөр Монголын нэг үйлдвэр, Монгол хүний нэг жижиг цех өргөжин тэлэх мөрөөдлөө биелүүлж байдаг. Эрээн хот руу орсон мөнгө эргэж ирэхдээ эдэлгээгүй бараа, нотолгоогүй новш л болж ирдгийг бид хагас жаран жил харлаа үзлээ. Эх орноосоо худалдан авалт хийж байгаа иргэн та эх орныхоо үйлдвэрийг өргөжүүлж эх орондоо бэлэг барьж байна гэсэн үг. Ийм л учраас Ерөнхийлөгчийнхөө уриалгаар үндэсний баяр цагаан сараар Монгол хүн бүр ЭХ ОРОНЧ ХУДАЛДАН АВАЛТ хийж ЭХ ОРОНДОО БЭЛЭГ БАРЬЦГААЯ.


О.Түвшиндэмбэрэл