sonin.mn
Сэтгэгдэл (0)

НЕЙПИДО, 2025 оны дөрөвдүгээр сарын 3 /NHK/. Мьянмарын нутгийн төв хэсэгт өнгөрсөн баасан гарагт болсон 7.7 магнитудын хүчтэй газар хөдлөлтийн улмаас амиа алдсан хүмүүсийн тоо 3000-аас даваад байна.


Үүнтэй холбогдуулан эрх баригч цэргийн хунтын удирдлагууд лхагва гаргаас эхлэн дөрөвдүгээр сарын 22-ныг хүртэл ардчиллыг дэмжигч хүчнүүд болон үндэстний цөөнхийн эсрэг явуулж буй байлдааны ажиллагааг түр зогсоосон тухай төрийн мэдлийн телевиз мэдээлжээ.


Олон хүний амь насыг авч одсон байгалийн гамшигт үзэгдлийн дараах тусламж, сэргээн босголтын ажлыг эрчимжүүлэхийг цэргийнхэн зорьж байна. Мьянмарын ардчиллыг дэмжигч Үндэсний эв нэгдлийн засгийн газар хоёр долоо хоногийн хугацаанд гал зогсоож байгаагаа бямба гарагт мэдэгджээ. Цэргийнхний мэдээлснээр, газар хөдлөлтийн улмаас амиа алдсан хүмүүсийн тоо 3003-д хүрч, 4515 хүн гэмтэж бэртсэнээс гадна 351 хүн сураггүй хэвээр байна.


Мьянмарын цэргийн удирдагч Мин Аун Хлайн бүс нутгийн орнуудын удирдагчдын уулзалтад оролцохоор пүрэв гарагт Бангкок хотыг зорихоор төлөвлөж байгаа бөгөөд тусламж дэмжлэг хүсэх төлөвтэй байна. 


Тэрбээр олон улсын хурал цуглаанд оролцох нь тун ховор. Цэргийн хунт 2021 онд болсон төрийн эргэлтээс хойш барууны хориг арга хэмжээнд өртөөд байгаа юм. Мьянмар улс олон улсын хамтын нийгэмлэгээс улам бүр тусгаарлагдаж байгаа тул улс орнууд өгөөмөр байдлаар тусламж үзүүлэх эсэх нь эргэлзээтэй байна. 




Э.Хулан

Эх сурвалж: "Монцамэ" агентлаг