sonin.mn
Сэтгэгдэл (0)

ТОКИО, 2025 оны дөрөвдүгээр сарын 3 /Reuters/. Японы “Nintendo” компани “Switch 2” консолийг ирэх зургаадугаар сарын 5-наас  449.99 ам.доллароор худалдаалж эхэлнэ гэдгээ лхагва гарагт мэдэгджээ. Шинэ төхөөрөмж нь илүү том, илүү өндөр нягтаршилтай дэлгэцтэй болсноос гадна хулгана хэлбэрээр ашиглах функц нэмэгдсэн байна.


“Switch 2” нь АНУ-д 449.99 ам.доллароор худалдаалагдах бол Япон улсад япон хэлтэй хувилбар нь 49 980 иенээр /334.09 ам.доллар/, олон хэлтэй хувилбар нь 69 980 иенээр зарагдах ажээ. Зөвлөгөө өгөх “Kantan Games” фирмийг үүсгэн байгуулагч Серкан Тото хэлэхдээ, шинэ төхөөрөмж нь үнийн хувьд олон нийтийн таамаглаж байснаас бага зэрэг өндөр байна гэлээ.


2017 онд 299.99 ам.долларын үнэтэй худалдаанд гарсан анхны хувилбар болох “Switch” нь дэлхий даяар 150 сая гаруй ширхэг борлогдсон бөгөөд техник хангамжийн шинэчлэлтүүд, “Super Mario”, “The Legend of Zelda” зэрэг хит тоглоомууд нь үүнд тус дөхөм болжээ. Харин шинэ төхөөрөмжид “Mario Kart World” зэрэг тоглоомууд багтах гэнэ. 


“Nintendo”-гийн хувьцааны ханш он гарсаар 10 гаруй хувиар өссөн байна. Тус компани шинэ консолийн зураг болон дүрс бичлэгийг нэгдүгээр сард танилцуулсан бөгөөд энэ сард дэлхийн томоохон хотуудад шинэ бүтээгдэхүүнээ турших арга хэмжээнүүдийг зохион байгуулахаар төлөвлөжээ. 



Э.Хулан

Эх сурвалж: "Монцамэ" агентлаг