sonin.mn
Сэтгэгдэл (3)

ВАШИНГТОН, 2025 оны дөрөвдүгээр сарын 3 /CNBC/. Америкийн цахим худалдааны салбарт тэргүүлэгч Amazon компани Хятадын TikTok нийгмийн сүлжээг эзэмшигчдээс нь худалдаж авах саналыг Цагаан ордонд хүргүүлжээ. Нэрээ нууцалсан эх сурвалжийн мэдээлснээр, тус компани энэ долоо хоногт дэд Ерөнхийлөгч Ж.Д.Вэнс, Худалдааны сайд Ховард Лутникт саналаа хүргүүлсэн байна. Харин Amazon энэ талаар тайлбар өгөхөөс татгалзжээ.


TikTok-ын Америк дахь “хувь заяа” цаашид хэрхэх нь тодорхойгүй байгаа энэ үед цахим худалдааны компанийн тавьсан саналын талаар New York Times сонин анх мэдээлсэн байна.


Хэрэв уг платформын толгой компани ByteDance нь TikTok-ыг худалдах тохиролцоонд хүрч чадахгүй бол дөрөвдүгээр сарын 5-нд АНУ-д дахин хаагдах магадлалтай байна. Өнгөрсөн онд хууль тогтоогчид TikTok-ыг худалдах эцсийн хугацааг нэгдүгээр сарын 19-нөөр тогтоосон хуулийн төслийг баталсан боловч Д.Трамп хоригийг 75 хоногоор хойшлуулах тушаалд гарын үсэг зурсан юм.


Д.Трамп Америк дахь TikTok-ын талаарх шийдвэрээ лхагва гарагт зарлаж магадгүй гэж уг мэдээлэлд ойр эх сурвалжууд CNBC телевизэд мэдээлжээ. AppLovin технологийн компани мөн TikTok-ыг худалдаж авах санал тавьсан тухай хэвлэлүүд мэдээлж байна.


TikTok нь “TikTok Shop” нэртэй цахим зах зээлээ өргөжүүлэхэд ихээхэн хөрөнгө зарцуулснаар цахим худалдааны томоохон төв болж чаджээ. TikTok-ын томоохон зах зээл, мөн уг платформын 170 сая гаруй хэрэглэгч нь Amazon-ы сонирхлыг ихээхэн татаж байж магадгүй юм.


TikTok өргөжсөний дараа Amazon өөрийн богино дүрс бичлэгийн платформыг нээсэн боловч удалгүй хаажээ.


Өнгөрсөн наймдугаар сард тус хоёр компани түншлэлийн гэрээ байгуулж, TikTok хэрэглэгчдэдээ өөрийн хаягийг Amazon-той холбож, аппликейшнээс гаралгүйгээр уг цахим хуудаснаас худалдан авалт хийх боломжийг олгосон юм. Энэхүү хэлэлцээр нь үндэсний аюулгүй байдалд учирч болзошгүй эрсдэлд санаа зовниж буй хууль тогтоогчдын анхааралд өртөж байна.



Э.Хулан

Эх сурвалж: "Монцамэ" агентлаг