
ЛОНДОН, 2025 оны дөрөвдүгээр сарын 2 /BBC/. Дэлхийн II дайны үед код тайлагчаар ажиллаж байсан Шарлотт “Бетти” Уэбб 101 насандаа таалал төгсжээ. Тэрбээр залуу насаа Блетчли паркт дайсны зурвасуудыг тайлан уншихад зориулсан байна.
Британийн код тайлах төв болох Блетчли паркийн хамгийн өндөр настай ажилтнуудын нэг болох тэрбээр даваа гаргийн шөнө нас эцэслэсэн гэж Хааны армийн эмэгтэй алба хаагчдын нийгэмлэг /WRAC/ мэдэгджээ.
Вустершир гүнлэгийн Вайталл суурингаас гаралтай Ш.Уэбб 18 настайдаа Букингемширийн баазад ажиллаж эхэлсэн бөгөөд хожим нь Японы кодыг тайлахад Пентагонд тусалж байв. Тэрбээр 2021 онд Францын хамгийн дээд шагнал болох “Хүндэт Легион”-ы одонгоор шагнуулжээ. Хааны армийн эмэгтэй алба хаагчдын нийгэмлэг "хатагтай Ш.Уэбб олон арван жилийн турш армийн эмэгтэй алба хаагчдад урам зориг өгч байсан” гэж тодорхойлсон байна.
“Bletchley Park Trust” байгууллагын гүйцэтгэх захирал Иайн Стэнден мэдэгдэхдээ, Ш.Уэбб зөвхөн үйл хэргээрээ төдийгүй “өөрийн болон хамтран зүтгэгчдийнхээ түүхийг мартагдуулахгүйн төлөөх хүчин чармайлтаараа” дурсагдах болно гэжээ. Блетчли Паркийн түүх, өвийг хадгалах түүний хүсэл эрмэлзэл нь олон хүмүүст энэхүү түүхтэй танилцаж, тус газарт зочлоход түлхэц өгсөн нь дамжиггүй гэж тэрбээр нэмж хэлсэн байна.
Ш.Уэбб 1975 он хүртэл өөрийн ажлаа нууцалсны эцэст сургууль болон бусад байгууллагуудад илтгэл тавьж эхэлжээ. Тэрбээр өөрийн үзэж туулсан амьдралын тухай ном бичсэнээр Блетчли Паркийн өвийг хадгалахад хувь нэмрээ оруулсан байна.
2014 онд үзэгчдийн хүртээл болсон “The Imitation Game” кинонд энэхүү төвийн талаар өгүүлдэг. 2023 онд Ш.Уэбб зээ охиныхоо хамт III Чарльз хааныг хаан ширээнд залах ёслолд уригдан оролцож байжээ. Вестминстерийн сүмд болсон энэхүү ёслолд 203 орны 2200 төлөөлөгч оролцсон билээ. Мөн тухайн онд тэрбээр 100 насныхаа төрсөн өдрийг Блетчли Паркт тэмдэглэжээ.
Э.Хулан
Эх сурвалж: "Монцамэ" агентлаг
Сэтгэгдэл3
charlotte apple cake 🥧 -ээ идэхээрээ бүгд voynich manuscript -ыг ойлгож эхлэх 📖. 🌱☘️🍀🌿🌷💐🌹🥀🌸🌺
гол нь эхний дууч модыг суга татаж хаях
Энэ эмэгтэйд ямар учраас язгууртны хэргэм шагнаагүй юм бол