2025 оны 1-р сарын 19-нд Хятадын Төв Радио Телевиз (ХТРТ)-ийн "2025 оны хаврын баярын гала тоглолт"-ын хэвлэлийн бага хурал болж, тоглолтын агуулга, хөтлөгчийн бүрэлдэхүүн, технологийн шинэчлэл болон тайзны дизайны онцлог зэргээ танилцуулжээ.

ХТРТ-ийн Редакторуудын зөвлөлийн гишүүн Жян Вэньбө технологийн инновацуудыг хэрэгжүүлэх чиглэлд олон практик шийдлийг танилцуулсан бөгөөд, ХТРТ-ийн өндөр нарийвчлалтай HD болон 8K өндөр нягтралтай дүрс бичлэг үйлдвэрлэх зэрэг шинэчлэлүүдийн талаар ярьжээ. "ХТРТ нь 'сэтгэхүй + урлаг + технологи'-г нэгтгэсэн инновациудыг идэвхтэй дэмжиж, супер өндөр нарийвчлал, виртуал бодит байдал, хиймэл оюун ухаан, 3D харагдац, гурван хэмжээст дуу гэх мэт технологиудыг ашиглан хаврын баярын гала тоглолтын үзэгчдэд хамгийн өндөр чанартай дүрс, дууг хүргэхийг зорьж байна" гэж тэрбээр онцлон хэллээ.

ХТРТ-ийн Урлагийн хөтөлбөрийн төвийн дарга Жан Гүөфэй, "Хаврын баяр"-ийг ЮНЕСКО-д бүртгүүлснээс хойш зохиогдож буй анхны гала тоглолт болохын хувьд, уламжлалт соёлын өвийг шинэчлэн оруулсан төдийгүй, хаврын баярын соёлын холбоосоор олон улсын соёл иргэншлийн харилцан ойлголцол, харилцааг сайжруулахад чиглэсэн гэдгийг тодотгожээ. Энэ жилийн гала тоглолт нь дуу бүжиг, ший жүжиг, Үшү гимнастик, хошин шог зэрэг төрөл зүйлийг багтаасан олон төрлийн хөтөлбөрийг сайтар төлөвлөсөн гэж мэдэгдсэн байна.

Гала тоглолт энэ жил БНХАУ-ын Бээжин, Чүнчин, Үхань, Лхас, Үши гэх таван газраас зэрэг явуулж, тус бүрийн хөтлөгчөөр Рэнь Лүюй, Са Бэйнин, Нигмат, Лүн Ян, Ма Фаньшү нар (Бээжин), Жан Тао, Хэ Мяомяо нар (Чүнчин), Ян Фань, Чэнь Чао нар (Үхань), Жү Шүнь, Староб нар (Лхас), Ван Иньчи, Ли Хао нар (Үши) хөтлөх юм байна.

Түүнчлэн энэ жил анх удаа хараа болон сонсголын бэрхшээлтэй үзэгчдэд зориулж, дохионы хэлний жүжигчид AR виртуал технологийг ашиглан, үзэгчдэд "тайлбар" хийх үйлчилгээг нэвтрүүлж байна. Гала тоглолт нь 8K ба 4K синхрон үйлдвэрлэлийн горимыг ашиглах бөгөөд, дотооддоо үйлдвэрлэсэн 8K төхөөрөмжийг ашиглан "8K хэт өндөр нягтралтай видео + гурван хэмжээст өнгөлөг дуу авиа"-г үзүүлэх юм.

2025 оны 1-р сарын 28-ны 20:00 цагаас ХТРТ-ийн ерөнхийлсөн суваг, соёл урлагийн суваг, хятад хэлний олон улсын суваг зэрэг олон сувгаар 4K болон 8K өндөр нягтралтай дүрсээр зэрэг цацагдах бөгөөд радиогийн олон суваг болон гар утасны аппликейшнээр дамжуулна. Мөн CGTN (Хятадын Глобал Телевизийн Сүлжээ)-ийн англи, испани, франц, араб, орос зэрэг 82 хэлний сувгууд болон платформуудаар дэлхий даяар шууд дамжуулах бөгөөд 200 гаруй улс орон, бүс нутгийн 2600 гаруй мэдээллийн хэрэгслүүд тоглолтыг шууд дамжуулах гэнэ.

Г.Бямба