Найзууд цэрэг татлагын комиссоор ороод тэнцчихсэн явах гэж байгаа гэхэд нь би ч гэсэн нэг үзээд алдъя. Цэргийн алба хаагаад буруудлаа гэж лав сонсоогүй. Харин ч аав, ах нарын үеийнхэн одоогийн залуус элдэв шалтаг тоочиж, цэргээс мултрах гэдэг болж, уг нь яваад ирвэл өөрсдөд нь хэрэгтэй юм сан гэж халаглаж байхыг олонтоо сонссон. Үд хүртэл унтаж, үхрийн дуунаар сэрдэг байсан хүн цэрэгт ирээд нар мандахтай уралдаж босох эхэндээ хэцүү байсан шүү.

Өдөр тутмын цагийн хуваарьт үйл ажиллагаа сургалт, бэлтгэлдээ хамрагдаад жигдрээд ирсний ар дээр өдөрт ийм их зүйл амжуулж болдог байх нь гэдгийг ойлгосон.

Цаашилбал, баргийн зүйлд цочиж сүрдээд байхгүй, дааж авсан ажлаа нягт нямбай хийчихдэг, бие хүн талаасаа ч тэр ядаж хөх зүү хөндлөн хатгаад хувцас хунараа оёод сурчихсан, эмх цэгцтэй, цэвэр цэмцгэр байхыг хэвшил болгочихсон, хүнтэй харьцах талаар албан тушаал, нас намбаны эрэмбэ дараа гэдэг хүний амьдралд зайлшгүй байхыг эрхэмлэж, ойлгож явах ёстойг ч ухаарсан. Цэргийн алба гэдэг эхэндээ халширмаар, яваандаа дасмаар, эцэс сүүлд нь хоргодмоор газар гэдэг үнэн юм билээ.

Одоо Зэвсэгт хүчний 327 дугаар ангидаа гэрээт цэргийн алба хаагч болчхоод явж байна. Энэ жил Зэвсэгт хүчний хэмжээнд зохион байгуулагдсан томоохон тэмцээн уралдаан болон хээрийн сургуулиудад амжилттай оролцсоны үр дүнд 2024 оны шилдэг цэргийн гэрээт алба хаагч боллоо.

Цаашдаа илүү идэвх зүтгэлтэй, урам зоригтойгоор ажиллаж, ажил албандаа эзэн нь байж, надад итгэл хүлээлгэсэн батлан хамгаалах салбар, цэргийн мэргэжлийн удирдлагын дээд байгууллага болон анги, салбарынхаа нэр хүндийг өндөрт өргөсөн офицер болно гэж бодож байгаа. Байлдагчийн халаасанд генералын мөрдөс байдаг гэдэг. Өөрийн чадах хүртлээ бүх хүчээ дайчлах болно. Эр цэргийн алба хаах хугацаандаа шилдгээр шалгарч энэ өдөр шинэ жилээ БХЯ, ЗХЖШ-ын удирдлагуудтайгаа хамтран тэмдэглэж мартагдашгүй хором мөчийг бүтээлцэж буй шилдэг дайчдадаа болон мөрдэс нэгт цэргийн алба хаагч, Батлан хамгаалах, Зэвсэгт хүчнээр овоглодог бахархдаг хүн бүрт шинэ оны баярын мэнд хүргэе.

Зэвсэгт хүчний 2024 оны шилдэг цэргийн гэрээт алба хаагч М.ОДГЭРЭЛ