sonin.mn
Сэтгэгдэл (0)

Азийн өвлийн спортын IX наадам 2025 оны 2-р сарын 7-14-ний өдрүүдэд Хятадын Харбин хотод зохион байгуулагдана. 12-р сарын 23-ны өдөр энэхүү наадмыг зохион байгуулах ажлын хоёр дахь хэвлэлийн бага хурал болж, бэлтгэл ажлынхаа тухай танилцуулжээ.


Азийн өвлийн спортын наадмыг зохион байгуулах хорооны дэд нарийн бичгийн дарга, Харбин хотын Спортын газрын дарга Бай Жигүө хэлэхдээ, "Урьдчилсан бүтээн байгуулалтын ажлууд үндсэндээ дуусаж, тэмцээний бэлтгэл уралдаанууд шат дараалан зохион байгуулагдсанаар зохион байгуулах ажил өдөр тутмын үйл ажиллагаанаас тэмцээний үеийн ажиллагааны горимд шилжсэн. Одоогоор Азийн өвлийн спортын наадмыг зохион байгуулах ажил ерөнхийдөө амжилттай урагшилж, гол ажлууд эмх цэгцтэй хийгдэж байна" гэсэн байна.


Одоогийн байдлаар Азийн өвлийн спортын наадмын талбай заал, дэд бүтэц, байгууламжийн засвар, шинэчлэлийн ажлууд бүрэн дуусч, бүх талбай болон холбогдох зочид буудлуудын засварын ажил амжилттай хийгдэж, хүлээлгэн өгсөн байна. Азийн өвлийн спортын наадмыг зохион байгуулах хороо тэмцээний үеийн командын системийг байгуулж, ерөнхий командын удирдлага дор гол үйл ажиллагааны төв, 18 тусгай удирдлагын төв, 6 тусгай ажлын баг, 5 тэмцээний талбайн удирдлагын баг, 26 тэмцээнээс бусад талбайн баг, 7 орон нутгийн сайн дурынхны баг зэрэг байгууллагуудыг ажиллуулаад байна.


Тэмцээн зохион байгуулах мэргэжлийн ур чадварыг дээшлүүлэх зорилгоор 2024 оны 10-р сараас 2025 оны 1-р сарын хооронд нийт 14 удаагийн туршилтын тэмцээн зохион байгуулж, Азийн өвлийн спортын наадмын бүх тэмцээний талбай, төрлийг бүрэн хамруулан бодит нөхцөлд туршиж, үйл ажиллагааны чадамж, түвшингээ бүх талаар сайжруулах ажлыг хийж байгаа гэнэ.


Г.Бямба