ПАРИС, 2024 оны арванхоёрдугаар сарын 18 /TASS/. Дэлхийн даяарх нүүрсний эрэлт энэ онд ажиглалтын бүх хугацаан дахь хамгийн өндөр хэмжээнд хүрч, Хятад, Энэтхэг улсууд гол хэрэглэгчид болсон тухай Олон улсын эрчим хүчний агентлагийн /ОУЭХА/ тайланд дурджээ. 

Тайланд дурдсанаар, дэлхийн нүүрсний эрэлт 2024 онд 1 хувиар өсөж, хамгийн дээд үзүүлэлт буюу 8.77 тэрбум тоннд хүрэх төлөвтэй байна. Хэдийгээр энэ хугацаанд аж үйлдвэрийн салбар хэрэглээ мөн нэмэгдсэн хэдий ч нүүрсний эрэлт нэмэгдэхэд нөлөөлсөн гол хүчин зүйл нь нүүрсээр цахилгаан эрчим хүч үйлдвэрлэдэг эрчим хүчний салбар байсан бөгөөд энэ онд 10.7 мянган ТВт-цаг эрчим хүч үйлдвэрлэх ажээ.

Хятад улс өнгөрсөн оныхтой адил нүүрсний гол хэрэглэгч хэвээр байгаа бөгөөд энэ онд тус улсын нүүрсний хэрэглээ 1 хувиар өсөж, 4.9 тэрбум тоннд хүрэх төлөвтэй байна. Тус улсад атомын цахилгаан станц (АЦС), салхи, нарны цахилгаан станц барих зэргээр эрчим хүчний салбарыг төрөлжүүлсээр байгаа хэдий ч цахилгаан эрчим хүчний эрэлт “2021 оноос хойш ДНБ-ий өсөлтийн дунджаас давж нэмэгдэж байна”. Хятадад тээвэр, аж үйлдвэрийн салбарыг цахилгаанжуулж, мэдээлэл боловсруулах төвүүд, хиймэл оюун зэрэг салбарууд хурдацтай хөгжиж байгаа нь цахилгаан эрчим хүчний эрэлт нэмэгдэх гол хоёр хүчин зүйл болжээ. 

Энэтхэг улс 1.3 тэрбум тоннын (+5%) хэрэглээгээр хоёрдугаарт бичигдсэн хэвээр байна. Европын Холбооны орнууд болон АНУ-д нүүрсний эрэлт 12 ба 5 хувиар тус тус буурч, 312 сая тонн, 368 сая тонн болж байна. ОУЭХА-ийн шинжээчдийн үзэж байгаагаар, дэлхийн нүүрсний эрэлт ойрын гурван жилд “хамгийн дээд түвшинд” хүрч, 2027 он гэхэд 8.87 тэрбум орчим тонн болно.

Энэ онд мөн дэлхийн нүүрсний олборлолт түүхэн дээд хэмжээнд хүрч, анх удаа есөн тэрбум тонныг давах төлөвтэй байна. Хятад, Энэтхэг, Индонез улсууд хамгийн том олборлогч байх бөгөөд нүүрсний худалдааны хэмжээ /2017-2019 оны дундаж түвшнээс 50 хувиар давсан үнээр/ 1.55 тэрбум тонн буюу дээд үзүүлэлтэд хүрнэ гэж шинжээчид таамаглажээ. 

Д.Жаргал

Эх сурвалж: "Монцамэ" агентлаг