sonin.mn
Сэтгэгдэл (41)

Миний шинэ ном уншигчдад хүрээд ам сайтай байна. Номд ийм нэг гарчигтай нийтлэл орсон. Оросууд тусгаар тогтносон Украин руу халдан түрэмгийлээд жил хагасыг туулсны дараа би тэгж бичиж байжээ. Дайнаа зогсоож өгөхгүй террорист халдлагаа болихгүй болохоор нь цөхрөхдөө тэгж бичсэн юм. Ер нь Оросын тухай, Оросын түрэмгийллийн тухай хэд хэдэн нийтлэл маань энд номд орсон.

 

Шударга үнэний талд хүн төрөлхтөн орж л таарна, энэ маргаан нэг талдаа гарч л таарна гэж би боддог. Ердөө нүдэн дээр ил харагдаж байгаа бодит баримт факт бол Украин руу ОХУ халдан түрэмгийлсэн. Оросын хийж буй дайн нь эзлэн түрэмгийлэх дайн.


Харин Украин тусгаар тогтнол, бүрэн эрхт байдал, нутаг дэвсгэрийн бүрэн бүтэн байдлаа хамгаалан байлдсан. Украины хийж буй дайн бол эх орноо хамгаалах дайн. Нэг ёсондоо Зөвлөлтийн ард түмэн 1941-1944 онд туулсан Аугаа их эх орны дайнтай агуулга нэгэн буй. 1944 оноос “чөлөөлөх дайн” нэртэй өөр дайн руу хүний нутагт шилжсэн байдаг юм. Зөвлөлт улсад суралцаад, зөвлөлтийн хоолыг идчихээд, харин ч оросуудад өртэй атал Оросын эсрэг дуугарлаа гэсэн тролл маягийн шүүмж мэр сэр явдаг, над дээр. Би айх юм алга. Мэдээж их сургуулийн боловсрол олгосон зөвлөлүүдийн оронд талархаж явдаг. Тэр талархал миний сэтгэлийн угт байдаг. Гэтэл одоо хөршийнхөө эсрэг Путин тэргүүтэй Кремлийн эрх баригчдын явуулж буй дайн миний тэр талархлыг даан ч хөгжүүлж хөхиүлж чадашгүй юм. Учир нь Путин бол Орос орон тэр чигтээ биш. Орос орныг Путинээр төсөөлөх нь харин ч хожим уршиг тарьж мэднэ.

 

Украины ард түмний эсрэг үйлдэж буй цуст дайны шууд ялтан Путин, хамсаатан Лукашенко нарыг эх орондоо урьж айлчлуулсан нь хоёр талтай. Би төр рүү дайрахаасаа өмнө өөрсдийнхөө арчаагүйг нэг сайн олж харсан байх л гэж бодсон.


Ардчиллаа ялуулаад бадруулаад гучин хэдэн жил болохдоо эдийн засгийн хамаарлаасаа гараад, ядаж л эрчим хүч, түлш шатахуунаар Оросын хяналт дарамтнаас гарчихгүй яав даа гэж би маш ихээр харамссаар явна. Гэтэл эрчим хүч, бензиний хамаарлаа “найрамдал” гээд ойлгочихсон мунхарсан монгол хүн олон байдагт би үнэхээр харамсдаг. Тэр ялтан Путин, хамсаатан Лукашенко нарыг Олон улсын шүүх, Олон улсын эрүүгийн шүүх шүүж түүхэн ял ногдуулна гэдэг харьцангүй ойлголт. Тэгж ч мэднэ, үгүй ч байж мэднэ. Тэр нь ч гол зүйл биш. Гол зүйл гэж юуг хэлхэв гэвэл Путин, Лукашенко нарт түүхэн ялыг нь Оросын ард түмэн, Беларусийн ард түмэн л онооно. Тэр ёстой гарцаагүй.


Энэ хоёр энэ цаг үедээ, энэ өдрүүдэд ялсан баатар мэт үзэгдэж, монголчуудад хүндлэгдэж байгаа ч тун удахгүй түүхэн ялаа ард түмнээсээ хүртэнэ. Тэр бол Оросын нийгмийн түүхийн жам ёсны үзэгдэл юм.


ЗХУКН-ын ХХ их хурлын индрээс Ленинийг залгамжлагч аугаа их Сталиныг тэгж яллана гэж тухайн үедээ хэн төсөөлөх билээ? Тэр ялыг Зөвлөлтийн, одоогийнхоор Оросын баатарлаг ард түмэн л оноосон шүү дээ. Сталины үнэнч албат маршал Берияг оросууд юу болгож тавилаа? Брежневийг оросууд хошин шогийн баатар болгож, одон медаль, өмчийг нь хурааж, хүргэнийг нь шоронд хатааж хайртай охиныг нь галзуугийн больницод үхүүлсэн жишээ юу юм бэ? Гэх мэт оросын ард түмэн өс хонзонгоо авч чаддагийн түүхэн жишээ Путиныг тойрохгүй гэдэгт би итгэдэг. 


Юуны төлөө тэгж хонзогнох вэ? Олон зуун мянган орос эрсээ бүтэхгүй дайны галд хуйхалж, сая сая орос иргэдээ өнчрүүлсний төлөө хамгийн түрүүн Путинд тэр ял бууна. Украины ард түмэнд учруулсан үхэл хагацал, гай зовлон жичдээ яригдана.


Олон улсын шүүх шийднэ. Түүх тэгж л өрнөнө. Түүхийн эргүүлэг гэж чухам үүнийг хэлдэг юм. Харин тэр үед нь монголчууд бид Путиныг (мөн Беларусийн ард түмний дарангуйлагч Лукашенког) дотночлон урьж авчирсандаа эрүүл зөв тайлбараа өчиж л таарна.


Монгол-Оросын найрамдал, Монгол-Беларусийн найрамдал гэдэг тайлбар тэр үед үнэ хүрэхгүй ч байж мэднэ. Дарангуйлагчаараа цоллуулаад ялтан болчихсон байх тэр үед нь бид дэлхийд биш юм гэхэд, Орос, Беларусийн ард түмэнд хэлэх үнэн үг тайлбараа сайтар бодож боловсруулсан байх ёстой. Энд бүгдийг нь дурдахгүйгээр энэ номд Октябрийн хувьсгал гэдэг нь цуст төрийн эргэлт болсон тухай гэх мэт Оросын тухай баримт бүхий нийтлэлүүд орсныг дахинтаа өчье.


Оросын дайныг эсэргүүцэж тэр тухай хойшид бичих нь миний эрх, бас дайн түрэмгийллийг эсэргүүцэн дуу хоолойгоо өргөх нь эрх чөлөөт монгол орны иргэн миний үүрэг гэж би үздэг учраас дуугаа хэнээр ч хориулахгүй.

 

Эх орныхоо сөөм газрыг СССР-т булаалгахгүй гэж тэмцсэн эх оронч сайд улс төрч С.Аварзэдийн тухай уран сайхны өгүүллээ энэ номдоо оруулсан. Тэглээ гээд би зөвлөлтийн эсрэг үзэлтэн гэдэг хоч нэр зүүхээс айхгүй байна. Тэгж яривал эх оронч С.Аварзэд агсанд Монгол Улсын Баатар цолоо нэхэн шагнаад олгочихоосой гэж хүсдэг нэгэн билээ би. Ном маань 4 бүлэгтэй (Нийтлэл, Дурсамж, Буддагийн сургаал, Уран зохиол). Шинэ номыг минь таалан сонирхоно уу.

 

 

Доржийн Сүхбаатар