sonin.mn
Сэтгэгдэл (35)

Шашны олон сайн үйлдэл хамаг амьтны тусын тулд үйлдэгддэг гэдэгт эргэлзэх юм надад байхгүй. Гандантэгчилэн хийдэд мянга мянган сүсэгтнийг цуглуулан хийж, Gandan TV орон даяар дамжуулсан Баторшил өргөх хэмээх ойрд болоогүй том ёслолыг үзээд гайхах, эргэлзэх сэтгэгдэл төрлөө. Насны абшиг ч гэх шиг мөн чанарыг нь ойлгохыг хүссэн боловч бодит үйлдэл нь шал өөр ойлголтод түлхээд байна. 


Ерөөс Төвдээс хараат Монголын шарын шашны байгууллага сүсэгтэн олныг мунхруулж, тэдний хөрөнгөөр эзэндээ ӨРГӨЛ барьж байгаа юм байна. Бүр Төвдийн том толгой хувилгаан жүдо ч гэнэ үү нэг их инээмсэглэсэн эр Далай багшийн хөргийн дор заларч Монголын сүм хийд, сүсэгтэн олноос хэдэн арван саяар татвар, хээл хахууль авах ажээ.


Гадны хүн монголын ард түмнийг бөхөлзүүлэн АЛБА ГУВЧУУР авч байна. Энэ юу болж байна. Монгол тусгаар тогтносон бүрэн эрхт улс шүү дээ. Түүнийгээ насны абшиг ч гэх шиг их сайхан нэрлээд их том шашны уншлага ном үйлдэж, тоглолт хийж байна л даа. Тэр тоглолтыг борооны дараах мөөг шиг олширч сүсэгтэн олны өргөлөөр амьдардаг Монголын энэ олон хүрээ хийд яагаад хийж чаддаггүй юм бэ. Ер нь хэдэн зуугаар жалга болгонд орших манай хүрээ хийдүүд өдөр болгон хамаг амьтны тусын тулд нүгэл барцдыг арилгах ном уншиж, тоглолт хийж байгаа шүү дээ. Тэр нь багадаа юу. Тэдний уншдаг номоор тоолбол Монголын 3 сая иргэдийн барцад аль хэдийн арилсан байх ёстой. Одоо тэдэнд бусдаар бас ном уншуулаад байх шаардлага байхгүй. Тэдэнд барьж буй өргөл тэрбумаар хэмжигдэнэ. Гэтэл бас дээр нь Төвдийн хувилгаанд их хэмжээний өргөл сүсэгтэн олноор өгүүлэх нь ямар учиртай юм бэ? Эндээс би нэг л зүйлийг олж харлаа. Манай шашин ХАРААТ юм байна. Тэгээд тэр хараа тын татвараа сүсэгтэн олноор төлүүлдэг ажээ.


Шууд хэлье. Энэ бол тусгаар тогтносон оронд байж болохгүй хууль бус үйлдэл юм. Тусгаар тогтносон улс бол бүх талаар хэнээсч ямарч улс, шашнаас хараат бус байх ёстой. Тиймээс би энэ асуудлыг УИХ, Ерөнхийлөгч, Ерөнхий сайд нарын сонорт хүргэх ёстой гэж үзэж байна.


Монгол Улсын Үндсэн хуульд "төр нь шашнаа хүндэтгэнэ" гэж заасан нь шашин дураараа, түүний дотор тусгаар тогтнолд халтай үйлдэл хийнэ гэсэн үг биш. Тиймээс үндсэн хуульд нэмэлт оруулж, шашин нь тусгаар тогтносон улсын хэв маягт харш үйлдэл үзүүлж болохгүй гэж заах хэрэгтэй байна. 

Эрхэм мэргэд, төр засаг онцгой анхаарч яаралтай арга хэмжээ авна уу.


Т.Залаа-Уул



Улаанбаатар хот, 


2024.08.22