sonin.mn
Сэтгэгдэл (48)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Харин энэ удаа Украинд дайн өдөөсөн Орос нь Трампын хүчээр ялалт хангана, Трамп гарч ирээд Украиныг хог дээр хаяна хэмээн итгэдэг хүсдэг монголчуудад хандан хэдэн санаа буулгая.


“Трампын энх тайвны төлөвлөгөө” гэдгийг The Wall Street Journal сэтгүүлд нийтлэжээ. Зохиогч нь АНУ-ын ТНБД асан Марк Помпео нар байна. Хэрэв Трамп АНУ-ын Ерөнхийлөгчийн сонгуульд ялбал Орос-Украины дайнд дараахи байдлаар хандана гэжээ:


1. Америкийн эрчим хүчний чадавхийг нэмэгдүүлнэ. Энэ нь АНУ-ын эдийн засгийг өсгөж, үнийг бууруулж, ингэснээрээ Путины дайны гэмт хэргийн төсвийг бууруулна. 

2. Саудын Араб, Израильтай харилцаагаа сэргээж, Ираны эсрэг хамтран ажиллах ба Газын зурвасын хямралыг зөөлрүүлж, дэлхийн эрчим хүчний зах зээлийг дэмжиж, АНУ-тай нэгдэн Оросыг зах зээлээс шахан гаргах боломжийг Саудын Арабт нээж өгнө. 

3. Оросын эсрэг бодит үр дүнтэй хориг арга хэмжээ авна. 

4. АНУ-ын батлан хамгаалах салбарыг хөгжүүлснээр Орос, Хятад хоёр Америкийн батлан хамгаалах хүчинтэй өрсөлдөх боломжгүй гэдгийг ойлгуулна. 

5. Умард Атлантын эвслийг сэргээж, төсөвт европчууд өөрсдийнхөө хувийг шударгаар төлдөг болгоно. НАТО-гийн гишүүн орнуудын дотоодын нийт бүтээгдэхүүний 3% хүртэл зардлын хязгаарыг батлан хамгаалах төсөвт суулган нэмэгдүүлэхийг зорино. 

6. Украинд зориулж 500 тэрбум долларын Lend-Lease-ийн хоёр хөтөлбөр хэрэгжүүлнэ. АНУ-ын татвар төлөгчдөд дарамт учруулахын оронд Оросыг ялахын тулд шаардлагатай зэвсгээ хэрэгтэй хэмжээгээрээ худалдан авахад нь зориулсан зээлийг Украинд зөвшөөрөх болно. 

7. Украины олж авсан, ашиглах боломжтой зэвсгийн төрөлд тавьсан бүх хязгаарлалтыг цуцлана. Ингэснээр Путины зардал өсөн нэмэгдэж, цаашдын ашиг олох боломжийг хаах болно гэжээ. 


Эдгээр алхмуудыг хэрэгжүүлж гэмээнэ Трампад хэлэлцээний нөхцөл тогтоож тулгах боломж олгоно. Дайн нэн даруй дуусна. Орос дахин хэзээ ч довтлохгүй болохоор Украины батлан хамгаалах хүчний боломж нэмэгдэнэ. Украины ямар нэгэн газар нутгийг Орост нэгтгэхийг хүлээн зөвшөөрөхгүй. Крымыг цэрэггүй бүс болгоно. Гадаадад царцаагдсан Оросын Төв банкны хөрөнгөнөөс Украиныг сэргээн босгоход зарцуулах болно хэмээн тус сэтгүүлд бичжээ.


Тодорхой юм биш үү? Трамп гарвал цөм авахаар л санал юм биш үү? Хэн ч гарсан АНУ-ын бодлого өөрчлөгдөхгүй гэдгийг хэлээд өгчихжээ. Угаасаа Орос, Хятад хоёр бол АНУ-ын төдийгүй дэлхийн дайсан гэдгийг Трамп нэг бус удаа анхааруулдаг.



Оросын тархи угаалтад угаартаад мэдээллийн буруу ваакум дотор төөрч яваа монголчууд минь Трамп Та бүхэнд гэрэл гэгээ авчрахгүй нь дээ. Трамп АНУ-д ялахтай зэрэг Орос эзэлсэн газраа үүрд эзэн сууж цаашаа Европыг дарамтлана, тэгээд шинэ СССР-ээ байгуулж, бид бүхнээрээ социализмын жаргалтай үедээ очно гэж бодож яваа бол маш том эндүүрэл болох нь дээ. Орос террорист дайндаа ялахгүй, ялахгүй нь улам бүр нотлогдож байна. Оросын түрэмгийллийг зөвтгөдөг троллууд Украин, АНУ, Европыг мянга түм харааж шүлстээд нэмэргүй боллоо. Гэхдээ тэр шүлсэндээ өөрөө таашаал аваад Путинээ нулимстай горьдлогын нүдээр хүлээж байхаас даа! 


Орчуулж тайлбарласан Адьяaгийн Батсайхан (бэлтгэл хошууч)