sonin.mn
Сэтгэгдэл (49)

Украинд Оросын цэргийн тусгай ажиллагаа 2 жил хагас үргэлжилж байгаатай холбогдуулан мэдээллийн тэнцвэртэй байдал хангах үүднээс Украины “Унiан.net” сүлжээний Telegram суваг, war.obozrevatel.com сайт, олзны орос цэрэг Алексей Белоусовын ярилцлага, Аргентин НАТО-д элсэх тухай мэдээлэл зэргээс орчуулж сонирхуулъя. Энд sonin.mn сайтын байр суурь тусгагдаагүй болно.


Энэ дайн ОХУ-ын хувьд үнэхээр гамшиг болж байна. Дэлхийн II дайнаас хойш Зөвлөлт улсын өнгөн дээр хэд хэдэн удаа интервэнц (Унгар, Чехословак, Афганистан гэх мэт) хийсэн, ОХУ-ын өнгөн дээр Чеченьд нэг ба хоёрдугаар дайн 7 жил өрнүүлснүүдийг нийлүүлснээс ч их хохирлыг Украины нутаг дэвсгэрт цөмрөн ороод ОХУ хоёр жил хагасын дотор амслаа. Цэргийн урлаг, цэргийн түүх судлаачдын анхаарлын төвд ОХУ-ын зэвсэгт хүчний энэ их хохирол нь гол судлагдахуун болж мөнхөрлөө. “Аугаа их эх орны дайн” гэх нэр томъёо зөвхөн Орост л мөнхөөрөө үлдэнэ, бусад хуучин зөвлөлтийн БНУ-ууд нь Оросын сэтгэлийг засч тэгж түр нэрлэж байгаа ба Украин дахь Цэргийн тусгай ажиллагаа гэгчээ Аугаа их эх орны II дайн болгож шат ахиулан Оросын ард түмэн, Оросын нийгмийг энэ дайндаа дайчлан босгох гээд Кремлийн эрх баригчид хүч хүрэхгүй, элдэв хуулийн арга хэрэглээд үгээ хэлэн аргаа барсан байдалтай байна. 


Украины эсрэг энэ дайндаа ОХУ-ын амсан буй хохирол рекорд үзүүлэлтдээ хүрчээ. Тоо цифрүүд үнэхээр түгшмээр. Путин хэрэг дээрээ энэ дайнаараа Украины ард түмнийг хашраагаад байгаа бус өөрийн ард түмнийг давхар устгаж, олон зуун мянган орос эрсийг пооз поозоор нь, хуй хуйгаар нь фронт руу хөөсөөр байна. “ОРОС ЦЭРЭГ”–XXI зууны энэ цаг үеийн хамгийн азгүй цэрэг эрс болжээ. Эмнэлгийн тусламж бүрэн гүйцэт авч чадахгүй, цэрэг нэг бүрийн хэрэгсэл гэж инээд хүрэм, бэлбэсэрсэн эхчүүд, гэргий нарыг Оросын БХЯ юман чинээ тоохгүй, тэд нөхвөр, ядаж оршуулгын зардал ч үгүй. БХЯ нь өнчирсөн ард иргэдээ нулимах шиг л харьцана. Оросын арми дахь ажил үйлс нэг иймэрхүү яваа тухай нэг сюжет “Униан” ТВ-ийн Telegram сувгаар гарч байх юм. Оросын сөрөг хүчний төлөөлөгчид ам уралдан Оросоо муулж харагдана.

 

Олзны орос цэрэг Алексей Белоусовын ярилцлага war.obozrevatel.com сайтад дэлгэрэнгүй гарчээ. Ам ангайгаад л Путинээ хэлэх хэлэхгүйгээр муулжээ.


“Би тэднийг үзэн ядаж байна. Энэ бол бидний дайн биш. Би энэ дайныг хүсээгүй, би энд ирэхийг хүсээгүй. Миний нөхөд ч бүгд ингэж ярьж байна. Шал тэнэг юм. Би түүнийг, Путиныг үзэн ядаж байна. Би түүнийг сонгогдоосой гэж санал өгөөгүй. ФСБшная. Энэ бол тэдний дайн. Гэтэл бид яагаад энд хамаатай болчихов? Яагаад бид хэлмэгдэж хохирч байгаа юм.


Тэдэнд Украин ямар хэрэгтэй юм? Газар нутаг нь багадаа юу? Танай талаас ч, манай талаас ч хөвгүүд үхэж үрэгдэж байна” – олзны орос цэрэг шүд зуун ярина.


Тэр цэрэг бүр хадуурав. ОХУ-ын оршин суугчдад хандан Путины эсрэг зэвсэгт бослого дэгдээж, Украинд ирж байлдахын оронд Путины эсрэг тэмцэлд бос гэв. Дарангуйлагчийн амбицны төлөө энд Украинд ирж үхэхээ больцгоо гэв. “Та нар энд ирэх юм бол хичнээн их үхдэл цогцос овоорон байгааг хоёр нүдээрээ харах болно. Юуны төлөө эд нар ингэж үхэцгээв. Энд биднийг мах, мах бэлтгэлд л барьж байна. Одоо ханалаа. Зэвсгээ өргөгтүн, тэгээд эрх баригчдын эсрэг хөдлөгтүн”–Белоусовын ярьсан нь.


Украинчуудын цөхрөлийг барах, тэд Зеленскийгээ жигшэх, Оросын өмнө буулт хийлгэхээр украинчууд Зеленскийгээ шахах, тэгснээрээ Украин энх тайвнаар бууж өгнө гэсэн гэнэн төсөөлөл Путин тархийг эзэмдсэн хэвээр байгаа нь Оросын цэргийн барагдашгүй их хохирлын үндсэн шалтгаан юм. Украинчуудын цөхрөлийг барах гэж Путин амиа тавих шахаж байна. Киев дэх хүүхдийн больниц, төрөх эмнэлэг рүү залуурт пуужингаар цохилт өгсөн явдал дэлхийг шоконд оруулсан. Дэмжиж ядаж байгаа Хятадын тэсгэл барагдаж байгаа бололтой. Холбоотон гээд байгаа Энэтхэг нь илт буруушаасан. Путинээс одон авч зүүмэгцээ хүүхдийн больниц гэх мэт дайны зориулалтгүй байгууламжийг пуужиндахаа зогсоохыг Нарендра Моди хээв нэг Путинээс илээр шаардав. Эдүгээгийн Орос бол лалын террористууд шиг цайрсан террорист улс болж хувирснаа харуулсан атак боллоо, Путин бүрэн солиорчээ гэсэн дүгнэлт дэлхийн хэвлэл мэдээллийн ертөнцөд давамгайлав. Гэтэл ОХУ-ын ГХЯ-ны хэвлэлийн төлөөлөгч Мария Захарова:–Тэнд хүүхдүүд байгаагүй, тэнд нацистууд байсан хэмээн улайм цайм гөрдөн ярих нь цагаан солиот өвчтөнг санагдуулна.


Украинд туслах тал дээр Барууны ертөнц нэгдмэл байж чадахгүй, элдэв гох дэгээ бүхий хүнд суртал нь саад болж байгааг үл тэвчсэн нэг нөхөр Баруунаас тодорсон нь БРИКС эвслээс эх орноо гаргачихсан Аргентины Ерөнхийлөгч Хавьер Милей боллоо. Аргентиныг НАТО-д элсүүлэхэхэд бэлэн байна, НАТО-д элсээд НАТО-гийн зэвсэг, юуны өмнө F-16 онгоцыг Украин руу илгээж зэвсэглэнэ хэмээн гэнэт мэдэгдэв. Аргентин нь одоо Хятадаас нисэх онгоц худалдан авч байгаагаа зогсоогоод НАТО-д элсэж НАТО-гийн зэвсгээр зэвсэглэнэ хэмээн Аргентины Батлан хамгаалахын сайд Луис Альфонсо Петри бүр тодорхой ярив. “Аргентин улс НАТО-д элсэх хүсэлтээ гаргалаа. Бид ийм нөхцөл байдалд төвийг сахиж байж чадахгүй. Эрх чөлөө, ардчиллаа хамгаалдаг улс орнуудын талд байх ёстой”–Аргентины сайдын хэлсэн үгс.

 

Аргентины БХЯ-ны сайд:–Бид урд нь Куба, Венесуэл, Иран зэрэг орнуудтай сүжирдэг байв. Харин одоо бол тэсч үлдэхийн төлөө, эрх чөлөө, ардчиллынхаа төлөө тэмцэж буй улс орнуудтай нөхөрлөнө. Аргентин нь Украинд болон Израильд зэвсэг олгохоор шийдэв. Түүнчлэн бид НАТО-д элсэх бодолтой байна гэв.

 

Оростой дайн явуулахад нь бололцоотой бүх зэвсгийг Украинд тусламжаар өгөх болно. Украины энх тайвны дараагийн саммитад оролцох болно. Украинаас гадна бид Иран ба Ираны гар хөл бологсодтой хийж буй дайнд нь Израильд тусламж амлана – Сайдын цогтой үгс. Аргентинаас дэгдсэн өөрчлөлтийн салхи бүх дэлхийгээр тархана, эрх чөлөө ноёлсон дэлхийн өнцөг булан бүрт хүрнэ. Тэгэхдээ энэ бол зөвхөн эхлэл шүү. Эрх чөлөө мандтугай! Чөтгөр ав! – Аргентины Ерөнхийлөгч Хавьер Милей



Англи, opoc хэлнээс хөрвүүлсэн Дүгэржавын Номиндарь