sonin.mn
Сэтгэгдэл (20)

Украинд Оросын цэргийн тусгай ажиллагаа 2 жил 5 дахь сардаа үргэлжилж байгаатай холбогдуулан мэдээллийн тэнцвэртэй байдал хангах үүднээс Украины ЕТГ-ын зөвлөх Михаил Подоляк, Британийн БХЯ-ны онлайн товхимол, олон улсын цэргийн шинжээч Сэмюэл Рамани, Юрген Наудитт, Валерий Рябых нарын ярьснаас орчуулж сонирхуулъя. Энд sonin.mn сайтын байр суурь тусгагдаагүй болно.



Украин дахь Оросын цэргийн тусгай ажиллагаа нуралтынхаа өмнөх шатанд байна. Амсаж буй хохирол гэж даан ч их. Өдөр бүр 1000 гаруй цэргээ (оросууд өөрсдөө тооцоолсноор өдөртөө дундажаар 913 цэрэг) алуулж байна. Сайн дураараа, сэтгэлгээсээ очиж байлддаг орос цэрэг байхгүй, хөлсөөр явуулсан нь аз гийвэл амьд үлдэж, байлдана, давшина, ухарна, аз харьвал шууд л их бууны зуушинд явж, махан овоо босголцоно. Байлдахаас татгалзсан цэргүүдээ харгис хэрцгийгээр шийтгээд ч нэмэргүй, бүхэл бүтэн бригадаараа дайнаас татгалзсан хэрэг дэгдэв.


Гэвч Орост нөөц их байна. Өөрийн оросын иргэд олдохгүй боллоо гэхэд дайнаа дуусгахгүй их хүч цаана нь нөөцлөгдсөн. Украины эсрэг түрэмгийлэлдээ гадаадын иргэдийг элсүүлэх ажлыг ОХУ-д гаргуун хийдэг тухай Их Британийн БХЯ-ны мэдээлэлд тодорхой өгүүлжээ. Ердөө хоёр л аргаар хахуульдана. Ихээхэн мөнгө амлана, заримыг нь өгнө, эсвэл ОХУ-ын иргэний паспортоор шагнана. Тэгээд гадаадын хөлсний цэргүүдээр тусгай анги салбар ОХУ-ын Зэвсэгт хүчний бүрэлдэхүүнд байгуулна. Гадаадын хөлсний цэрэгт сарын 2200 долларын цалин санал болгоно, эхний ээлжинд 2000 доллар бэлнээр өгөөд, тэр дор нь ОХУ-ын паспорт шийтгэн олгоно, эрүүл мэндийн үзлэгт оруулан эмчилнэ, сургалтад суулгана. Ялангуяа Орос дахь гадаадын мигрантуудыг ийм байдлаар өлхөн элсүүлнэ.



ОХУ-ын БХЯ-нд хөрш гадаад улсуудын хөдөлмөрийн мигранттай ажиллах тусгай алба ажилладаг болжээ. 2023 оны дунд үед хөдөлмөрийн цагаачдыг ажилд авах тухай онлайн-зар интернэтэд тархсан нь энэ албаных байсан тухай британийн тагнуулынхан олж тогтоожээ. Төв Азийн орнуудаас Орост хөдөлмөр эрхлэхээр очих цагаач ажилчдад сарын 1973 доллараас 5140 доллар хүртэл цалинжуулна гэсэн байв. 2023 оны 5 дугаар сарын 15-нд Владимир Путин зарлиг буулгаж, Оросын иргэншил авахыг хөнгөвчлөх болсон тухай зарласан ба ялангуяа Украинд өдүүлсэн дайных нь хугацаанд Оросын БХЯ-тай нэг жилийн контракт байгуулсан гадаадын иргэдэд онцгой хөнгөлөлт үзүүлэхээр шийдсэн. Тэр зарлигийн дараахан ОХУ-ын иргэн болъё гэсэн өргөдөл үлэмж олширсон, “Военкомат” нэртэй цэргийн комиссууд дээр мигрантууд олуулаа цуглах болсон, иргэншил авахын өмнөх шат хэмээн Украин руу “биеийн хүчний хар бор ажил” эрхлүүлнэ гэсэн болзол тулгасан, Төв Азийн орнуудын иргэдээс гадна Энэтхэг, Балбын иргэд ч энэ амлалтад үлэмж олуулаа хууртан очсон. Ийнхүү фронтод гадаадаас цэрэг элсүүлдэг нарийн аргатай болсон ч цаад улсууд нь иргэдээ гадаадын армид хөлсөөр алба хааж дайнд явбал гэмт хэрэгт тооцох хуультай, жишээ нь Тажикистанд 5-12 жил, Узбекистанд 5-10 жил, Кыргызстанд 10-12 жил хорьж шийтгэх эрүүгийн ялтай, тэр ялаа ч эдлэж буй олон иргэд бий гэжээ.


Орост одоо шинэ нөөц гарч ирж байх шиг байна. БНАСАУ гэж барагдашгүй их ядуу иргэдтэй, барагдашгүй олон сая цэрэгтэй, иймд эхний ээлжинд шууд байлдуулахгүй гэж дэлхийг хуураад инженерийн цэргийн анги салбарыг нь Украин руу илгээх гэж байгааг Михаил Подоляк хэвлэлд дэлгэжээ. Хойд Солонгос нь цэргээ эзлэгдсэн Донбасст илгээх ажээ. Ингэснээр БНАСАУ нь ОХУ-тай цэргийн хамтын ажиллагаа идэхвтэй явуулаад дэлхий дахины санкцаас нэг ёсондоо аажуухан гарчихаж байгаа ба одоо Украины эсрэг түрэмгийлэгчдийн талд шууд орчихно. Хойд Солонгосын “инженерийн тусгай цэрэг” Оросын талд орж фронтод очно, хариуд нь Оросоос цэргийн, цөмийн зэвсгийн, пуужингийн технологи хаалтгүй авч байх, тэгснээрээ НҮБ-ын хоригийг НҮБ-ын Аюулгүйн Зөвлөлийн байнгын гишүүн Орос өөрөө үлгэрлээд зөрчихөд хүрнэ хэмээн Подоляк ярьжээ.


Хойд Солонгос цэргээ түр эзлэгдсэн Донецк руу “инженерийн анги салбар” нэрээр илгээх болсныг Оксфордын их сургуулийн докторант Сэмюэл Рамани мэдээлэв. Тэр нь Иран техникийн зөвлөхүүдээ Крым рүү илгээж, Орост беспилотник эзэмшихэд нь туслаж байсантай адил гэжээ. Ираны цэргийн мэргэжилтнүүд эзлэгдсэн Украинд байгаа, эсвэл байсан нь ил болжээ.


Германы шинжээч Юрген Наудитт энэ тухай өгүүлэхдээ, Хойд Солонгос нь ойрын нэг сарын дотор цэргээ Украин руу илгээнэ, гэхдээ шууд байлдуулахгүй гэсэн болзолтой гэжээ. “Гэхдээ Путин ямагт худал хэлдэг, хэлэх ч болно. Хойд Солонгос цэргээ Украинд илгээсэн тохиолдолд Барууныхан яах бол гэдгийг сонжиж туршина, НАТО-гийнх нь 70 жилийн ойн баярт нэг ёсны бэлэг барина, үүн дээр нь Хойд Солонгос тоглолт хийнэ, дэлхийд цэргийн тоогоор дээгүүрт ордог Хойд Солонгост 1.3 цэрэг байнгын бэлэн байдалд байж байгаа” хэмээн Наудитт тэмдэглэжээ.


Украины цэргийн эксперт Валерий Рябых энэ тухай өгүүлэхдээ, үнэхээр БНАСАУ нь инженерийн цэргээ Украин руу илгээх болбол энэ улс Украины эсрэг дайнд Москвагийн талд эргэлтгүй орлоо гэсэн үг болно. Украин нь БНАСАУ-ыг түрэмгийлэгч гэж үзэхэд хүрнэ. Хэрэв ингэх дээрээ тулбал Владимир Путин, хойд солонгосын дарангуйлагч Ким Чен Ун нарын хооронд, хоёр дарангуйлагч дэглэмийн хооронд хамтын ажиллагааны шинэ хуудас нээгдэх болно, үнэн чанартаа ОХУ-БНАСАУ-ын хооронд цэргийн альянс бүрдлээ гэсэн үг болно. Орос нь Хойд Солонгосоос зэвсэглэл авч хариуд нь технологио шилжүүлж, цөмийн зэвсгийг нь бэхжүүлж өгнө. Энэ бүхнийг украины тагнуулынхан гярхай ажиглаж байна, америкийн тагнуулын алба ч ажиглаж дүгнэлтээ хийнэ–Рябых ярьжээ.


Фронтын байдлаас гадна нэмэгдсэн шинэ мэдээлэл бол “Гадаад оронд цэргийн гэмт хэрэг үйлдсэн” хэмээн сэжиглэгдэн Оросын цэргийн хоёр удирдагч армийн генерал Сергей Шойгу, армийн генерал Валерий Гирасимов нар Олон улсын эрүүгийн хэргийн шүүхээс баривчлагдах бичиг (ордер) гаргуулжээ. Өмнө нь Ерөнхийлөгч Путиныг украин хүүхдүүдийг хулгайлсан хэрэгт холбогдуулан ийм баривчлах бичиг гаргачихсан байсан. НҮБ-ын Аюулгүйн Зөвлөлийн байнгын 5 гишүүний нэг улс гэхэд ОХУ-ын олон улсын нэр хүндийн тухай бүр ч ярих юмгүй болоод байгаа ажээ. 


        

       Англи, opoc хэлнээс хөрвүүлсэн Дүгэржавын Номиндарь