sonin.mn
Сэтгэгдэл (36)

Украин дахь Оросын цэргийн тусгай ажиллагаа (СВО) бүтэн хоёр жил дөрөв дэх сардаа үргэлжилж байгаатай холбогдуулан мэдээллийн тэнцвэртэй байдал хангах үүднээс украины “Унiан Telegram” сайтын “Наш час” программ, английн “The Telegraph” сонины эдийн засгийн тоймч Лилиан Бивингс Оросын түрэмгийллийн мөн чанарыг илчлэн бичсэн зэргээс орчуулж сонирхуулъя. Энд sonin.mn сайтын байр суурь тусгагдаагүй болно.



“Украинчууд биднээс илүү гоё амьдрах ёсгүй”–явж явж Оросын цэргийн тусгай ажиллагааны гол зорилго ил боллоо. Оросын ТВ-ийн ток-шоугаар нэртэй жүжигчин тэгж ярьсан болохоос Украин руу чиглэсэн ОХУ-ын бүх бодлого, цэргийн ажиллагаа энэ гасланг нь илтгэнэ. Атаархаж үхсэн, атаархалдаа шатаж гомдож, түүнийгээ өширхөл өс хонзон болгосон Путин, Кремлийн эрх баригчид, командлал, суртал нэвтрүүлэгчид, РПЦ–үнэн алдартны шашин л нүдэнд харагдаж байна. Тэд үнэхээр тэчъядаж байна. Суртал нэвтрүүлэгчид нь хамаг тархи нервээ баран хоолойгоо чичрүүлэн цахиртуулан Украиныг үзэн ядаж хашгачих нь инээтэй бөгөөд эмгэнэлтэй.



Хамгийн инээдтэй нь “Бүх дэлхий бидэнд атаархдаг”, “Оросын сайн сайханд Баруун атаархдаг”, “Оросыг ялж болохгүй, ялна гэж байхгүй. Орон орон дотроосоо л задран унаж устана” гэсэн Путины хэд хэдэн сонгодог эшлэл бий.



Оросын ТВ-ийн бас нэг ток-шоугаар үнэнээ өчиж байв. “Биднээс хэн ч айхгүй байна! Биднийг гранат атгасан сармагчин гэж хараад байна” гэж ярьж харагдав. Сүүлчийн энэ үгс яг үнэн байж таарах гээд байна. Оросын цэрэг хүний олноор тэсэн тогтож, зэвсэг сум, пуужин олонтойгоороо л Украины хотуудыг цус үнсэнд хутгаж чадаж байна. Энэ бол ялалт биш. Зүгээр л террор–аллага. Энд цэргийн урлаг, байлдааны стратеги-тактикийн гайхамшиг гэж харагдахгүй байгааг гадаадын бүү хэл оросын өөрийх нь цэргийн мэргэжилтнүүд шүүмжлэн ярина.



Фронтын байдал, Оросын нутаг дахь украины угсарсан алгасахгүй, цохилтууд шал өөр төсөөлөл өгч байна. Зөвхөн ОХУ-ын Хар тэнгисийн флотын байдлыг жишээлье. Украины судлаач Сергей Мальневын ярьснаар, байлдааны хөлөг онгоц нь 80 орчим, цаана нь ар тал-хангалтын 200 хөлөг онгоцтой байсан Оросын Хар тэнгисийн флот өнөөдөр юу болж хувирав? Дэлхийн далайд гарч байлдах нь бүү хэл Хар тэнгис дотроо хашигдав. Крымд байлдааны хөлөг онгоц хадгалж паркалж байх аргагүй боллоо. Оросын зэвсэгт хүчний бахархал байсан флот шүү дээ. Гэтэл одоо Кремлийнхэн өөрсдөө флоттоо үхлийн ял оноочихоод байна. Өөрийн флотгүй Украин нь Хар тэнгист Оростой халз тулж байлдаад өнөөдөр Оросын Хар тэнгисийн флотын талыг байхгүй болгочихсон байна. Хар тэнгис дэх Оросын байлдааны хүчин чадал дор хаяж гуравны нэгээр унасан. Алдагдал нь санхүүгийн тооцоогоор 40 хөлөг онгоц катеруудаа алдана гэдэг 4 тэрбум гаруй доллар! Үлдсэн хэдэн хөлөг онгоцоо Новороссийск руу командлал нь аваачиж нуулаа. 



Орос ингэхэд гурав дахь жилдээ байлдаж байгаа гэхэд эдийн засгаа хэл үггүй авч яваад ард түмний аж амьдрал нь буурахгүй саарахгүй цэцэглэсэн хэвээр байна уу гэдэг дэлхийн эдийн засагчдын тархийг гашилгах нэг сэдэв болжээ. ДНБ-ээр нэг хүн ам тутамдаа оноовол 14.391 доллар жилдээ ногдож байгаагаараа хуучин Зөвлөлтийн БНУ болох Казахстанаасаа доогуур дэлхийн улсуудаас 65-рт орж байна. Оросын дээр Мексик, Чили зэрэг дэлхийн дундаж хөгжилтэй улсууд жагсаж байна. Амьдралын чанарын индексээр дэлхийд 66-рт, явж явж Африкийн Кенитэй зэрэгцэн жагсаж байна. Оросын аугаа их суу, барууныхан оросуудад атаархаж, тэгснээрээ ОХУ-ыг устгахыг хүсч байна гэсний цаана ийм үзүүлэлттэй. 


Харин “The Telegraph”-ын эдийн засгийн тоймч Лилиан Бивингсийн бичснээр өөр зорилго зорилт оросуудыг Украины эсрэг байлдуулжээ. Хэрэв Украиныг бүхэлд нь эзлэн авсансан бол тэр эзлэн түрэмгийлэл нь Оросыг баяжуулахад нэн чухал байжээ. Хэрэв Украиныг эзлээд авчихсан бол ОХУ шинээр төрсөн мэт болох ба шинэ, баяжсан, хүчирхэг Орос нь ирээдүйн дайндаа огтоос түүртэхгүй, тэр их хүчээрээ Барууныг эдийн засгийн байнгын шантаажанд байнга оруулах байлаа гэжээ. Хэрэв Путин хүссэндээ хүрсэн бол байгалийн хийн шантаажаар Барууныг бүрэн сөхрүүлэхээр байсан нь өргөн хэмжээний түрэмгийллийнх нь дараа шууд ил болсон. 



Оросын төлөвлөгөө нэн тодорхой байв. Украин ба украинчуудыг сэхээ авах боломж олгохгүйгээр цохилтын долгионоор бүрэн хяналтдаа авах, дараа нь магадгүй хэдэн жилийн турш, эсвэл 10 жилдээ дэлхийн эдийн засгийг бүрэн хаост автуулах байв.



Оросын тэмтрүүл дэлхийн өнцөг булан бүрт хүрэх байсан ба 400 сая хүн ардыг тэжээдэг үр тарианы экспортыг Орос ганцаараа гартаа атгах байв. Хар тэнгисийн гол гол боомт үндсэндээ Оросын хяналтад орчихно гэж төсөөлжээ.


Украины фермерүүдийн тариалсан хураасан үр тариаг Орос гартаа бүрэн оруулж аваад дэлхийг шантаажлахын хамт өөртөө ба холбоотнууддаа хуу хаман авна. Дайны эхэн үед ч харагдсан. Украинаас дээрэмдэж авсан үр тариаг өглөгч царайлан Африк руу илгээж жүжиглэсэн. Өлсгөж байгаад үр тариагаар холбоотон элсүүлэн авах нь Оросын гадаад бодлогын нэг чухал агшин болчихоод байна. 


Хэрэв Киевийг Орос тэр дор нь буулгаад авчихсан бол сүүлийн хэдэн жил хамаг хүчээ тавьж сэргээн босгосон Украины цэрэг-аж үйлдвэрийн комплекс Оросын мэдэлд 100 хувь шилжин очих байв. Тэгсэн цагт Барууныг яаж л бол яаж дарамтлан, өөрийн геополитикийн тулгалтаа хэрэгжүүлэхээр Кремльд тооцоолсон байв. 


Бүхэлдээ Украиныг эзлээд авчихсан бол Орос нь Европын Холбооны хаалганд тулж ирнэ. Европ чичирнэ. Зэвсэглэсэн зэрлэг оросуудаас Европ үнэхээр балмагдах байв. Гэхдээ энэ бүхэн өнгөрчихөөгүй. Одоо Орос нь өөрөө болон холбоотнуудаараа дамжуулан бүх дэлхийд гол төлөв хувийн зэвсгийн наймаа хийж байна. Тэгж зэвсэглүүлээд авбал тэгж зэвсэглсэн хувь хүмүүсийг нэг л өдөр төр засгийнх нь эсрэг, бүр НАТО-гийн эсрэг дотроос нь байлдуулах хувилбарыг Орост боловсруулсан байгаа хэмээн Бивингс сэрэмжлүүлжээ. 


Бивингс энэ бүхнийг дүрслэн таамаглаж бичсэнийхээ төгсгөлд “Хэрэв бид Украинаас татгалзсан бол яах байсан бэ?” гэсэн асуулт Барууныханд хандаж тавьжээ. Хэрэв тэгсэнсэн бол Орост төсөөлөмгүй том масштабын бэлэг бид барих байлаа. Бүр маш том шагнал болох байлаа. Хөдөө аж ахуйн нэн чухал талбар Украины бүх байгалийн баялаг нөөцийг Оросын мэдэлд зүв зүгээр, хүссэн хэмжээгээр нь үнэгүй бэлэглэж, ингээд Орос Баруун руу давшиж, километр бүртээ ашиг завшаан гэдгийг уутлах байлаа гэжээ.


Оросын энэхүү шуналыг таслан зогсоож чадсанаараа магадгүй Украины ард түмэн хүн төрөлхтөний түүхэнд тод үсгээр бичигдэж үлдэх биз ээ!



Англи, оpoc хэлнээс хөрвүүлсэн Дүгэржавын Номиндарь