УИХ-ын Сонгуулийн саналын хуудастай холбоотой асуудлаар улс төрийн намын төлөөллүүд мэдээлэл хийлээ.

Энэ үеэр УИХ-ын гишүүн, ХҮН намын дарга Т.Доржханд: "Энэ удаагийн сонгууль бол сүүлийн 30 жилийн хугацаанд болоогүй сонгууль болох гэж байна. Үндсэн хуулийн нэмэлт өөрчлөлтийн хүрээнд УИХ-ын 126 гишүүнийг сонгоно. Ингэхдээ тойргоос 78 гишүүнийг, жагсаалтаар буюу намын нэр дугуйлах байдлаар 48 гишүүнийг сонгоно. Үүний үр дүнд Монгол Улсад солонгорсон парламент үүснэ гэдэг хүлээлттэй байгаа. Нэг нам хязгааргүй эрхтэйгээр эрх барьдаг биш, олон сөрөг хүчин бий болж Засгийн газартаа хяналт тавьдаг, хоорондоо бодлогын мэтгэлцээн өрнүүлж чаддаг, эрүүл, амьд парламент үүснэ гэдэг хүлээлттэй байна.

Сонгуулийн саналын хуудас нь 2 тусдаа байх ёстой гэдэг үндэслэлийг гаргаж ирж байгаа юм. Өөрөөр хэлбэл тойргоос нэр дэвшиж буй 78 хүний нэр тусдаа нэг хуудсан дээр, жагсаалтаар нэр дэвших нь 48 нэр бүхий тусдаа хуудас байх ёстой.

Учир нь нэг хуудсан дээр хоёуланг нь хамт бичсэн тохиолдолд буруу тэмдэглэгээ хийвэл жагсаалт хүчингүй болох гээд байна. Нөгөө талдаа энэ удаагийн сонгуульд гадаадад байгаа иргэд оролцохдоо зөвхөн жагсаалт дээр байгаа намын нэрсийг дугуйлах зарчмаар орно. Эдгээр үндэслэлээр сонгуулийн санал хураах хуудас хоёр тусдаа байх ёстой гэдэг шаардлагыг СЕХ-нд хүргүүлж байна. " гэсэн бол МҮАН-ын дарга Б.Цогтгэрэл: "Сонгууль хаяанд ирлээ. Сонгогчдын хувьд саналаа өгөхөд маш ойлгомжтой байх ёстой. Харамсалтай нь бид сонгууль бүрийн өмнө сонгуулийн хуулиа өөрчилдөг. Үүнээс болж маш их төөрөгдөл үүсдэг. Ийм төөрөгдөл, будлиан байлгахгүйн тулд улстөрийн намууд нэгдээд, шаардлага, саналыг гаргаж байна.

Энэ удаагийн сонгууль холимог хэлбэрээр явагдана. Сонгогчдод ойлгомжтой болгохын тулд улстөрийн намуудыг жагсаалтаар дэвшүүлж байгаа саналын хуудсан дээр намын нэр, үзэл санаа, бодлогыг агуулсан бэлгэдэл, лого, намыг болон эвслийг тэргүүлж байгаа хүмүүсийн нэрс нь тодорхой байх ёстой. МҮАН, МНН хамтраад "Үндэсний эвсэл" байгуулж, СЕХ-нд бичиг баримтаа өгсөн байгаа.

Тэгэхээр "Үндэсний эвсэл"-ийн тэргүүн Н.Номтойбаяр гээд нэр нь байж байдаг, лого нь байдаг бол сонгогчдод маш ойлгомжтой байна.

ХҮН намын дарга Т.Доржханд, намынх нь лого байж байвал сонгогчдод саналаа өгөхөд цаг хугацааг хэмнэхээс гадна сонголтоо хийхэд маш ойлгомжтой байх юм. Тийм учраас бидний тавьж байгаа шаардлагыг СЕХ хүлээж аваад, ажил хэрэг болгох байх гэж бодож байна. " гэв.

М.Чой