“Баялагтаа эзэн Монгол” ТББ-аас улстөрийн намуудад шаадлага хүргүүлж буй талаараа мэдээлэл хийлээ.

Энэ үеэр уг ТББ-ын тэргүүн, иргэн Г.Хажидмаа: "Монгол Улсын Их хурлын 2024 оны сонгуульд оролцох гэж байгаа бүх намууд Монгол улсын бүх ашигт малтмалыг ашиглахад ард түмний хараа хяналт дор, байгалийн баялаг ард түмний эзэмшилд байх зарчимд нийцүүлэн, түүний үр өгөөжийн дийлэнх нь ард түмэнд ноогдож байхын тулд ашигт малтмалын орд бүрийн борлуулалтын орлогын 20 хувийг орон нутгийн мэдэлд бүрэн шилжүүлэх заалт нэмж батлуулахыг бүх талаар дэмжин, 2024 оны УИХ-ын сонгуулийн мөрийн хөтөлбөртөө оруулахыг бүх намын удирдах дээд байгууллага болон нийт гишүүдэд нь уриалж байна.

Байгалийн баялгийг ухаж сэндийчээд, нөхөн сэргээлт хийлгүйгээр бүх баялаг маань гадагшаа урсаж байна. Ард нь хэн ядарч үлдэж байгаа вэ?

Тийм учраас тухайн орон нутгийн байгалийн баялгийг ухаж ашиглаж байгаа л бол борлуулалтын орлогын 20 хувийг орон нутагт нь үлдээх санаачлага дэвшүүлж байна. Ингэх юм бол цаашдаа тухайн сум, орон нутгийн хөгжилд асар том нөлөө үзүүлнэ. Өнөөдрийг хүртэл төр төлөөлж сууж байгаа удирдлагуудаас яагаад ийм бодлого гарч ирээгүй юм бэ? Бидний баялаг хэн нэгэн харь орны эздүүдийн гарт орчихсон байгаа учраас Монгол төрийг төлөөлж байгаа хүмүүсээс ийм бодлого гарч ирдэггүй юм болов уу? гэж хардаж байна. " гэсэн бол тус хөдөлгөөний төлөөлөл: "Монгол Улсад одоо ашиглаж байгаа стратегийн ордуудын 50+1 хувийг Монголын ард түмний мэдэлд хувьцаа болгож өгөх ёстой.

Бидэнд Арабын Шейхүүд шиг, Кувейтийн Эмиратууд шиг амьдрах нөхцөл байна. Одоо ашиглаж байгаа ордуудынхаа 51 хувийг хувьцаа болгоод ашиглах юм бол бид болон бидний үр хүүхдүүд санаа зовохгүйгээр амьдарна.

Тавантолгойн 0,04 хувийг л ард түмэнд хувьцаа болгоод өгөхөд л бидэнд хэдэн төгрөг оногдож байгаа билээ. Дийлэнх олонхи нь олигархууд, хулгайчдийн гараар ороод дуусаж байна. Улаанбаатар хотод баригдаж байгаа өндөр барилгууд бол нүүрсний хулгайн мөнгө шүү дээ. Монгол Улсад ашиглаж байгаа стратегийн ордуудынхаа 50+1 хувийг Монголын ард түмэнд өгөх ёстой. Хувьцааг нь эзэмшүүлэх ёстой. Удирдах зөвлөлийг нь ч 50+1 хувийн эзэмшигчдээсээ сонгодог байх ёстой юм. Ард түмэнд уул уурхайн дийлэнх эрх мэдэл байх ёстой. Түүнээс төрд давамгай эрх мэдэл байж болохгүй. " гэв.

М.Чой