sonin.mn
Сэтгэгдэл (36)

“Эрх чөлөө төв”-өөс дампуурсан төрийн завхрал сэдвээр мэдээлэл хийлээ.

Энэ үеэр тус төвийн гишүүн Ц.Чинбат: "Засгийн газар өнөөдрийн нөхцөл байдлыг зөв тооцож, зөв менежмент хийж чадахгүй татвар төлөгчдийн мөнгийг цөлмөх үйл ажиллагаандаа л анхаараад байна. Зуд турхан дээрээ биш сонгууль дөхөөд энтертайнмент шоу хийх үйл явдал болж байна. Оросоос л шатахуун авахгүй бол өөр улсаас авч болохгүй гэдэг социалист сэтгэхүйгээрээ гацчихлаа.



Уул уурхайн сайд нь Канадад оччихоод бид Орос руу мөнгөө шилжүүлэх гэсэн олон улсын хоригт орох гээд байна, бидэнд туслаач гээд мангар юм яриад явж байна.



Дэлхий дээр ганц Орос биш олон улс орон шатахуун үйлдвэрлэдэг. Тэдгээр орнуудаас шатахуун авах боломж байгаа. Одоо хавар болж байна. Газар тариалангын ажил эхлэх гэж байна. Дизель түлш маш их хэрэг болно. Үүнд анхаарал хандуулахгүй байна. Хөлдөөд хөл гар нь царцчихсан хүүхдүүдэд хүмүүнлэгийн тусламж үзүүлэх ёстой байтал янз бүрийн одон медаль гардуулаад, тэмдэг зүүж өгөөд солиороод явдаг Засгийн газартай байна. Тулгамдаад байгаа асуудлууд руугаа анхаармаар байна." гэсэн бол жүжигчин Д.Сосорбарам: "Улс үндэстэн маань доройтлоо гэж сүүлийн 8 жил ярьлаа. Хэн төр барьж байгаа, тэднийг хэн сонгож байгааг бүгд мэднэ.


Аливаа үндэстний уналт доройтол нь Нэгдүгээрт, данхар төртэй болсноос, олон дарга ангитай болсноос. Хоёрдугаарт, төрд их өмч төвлөрснөөс болж, гуравдугаарт эрэлт нийлүүлэлт жам ёсоороо явж байхад төрийн оролцоо ихэсч, төв банк нь цаасан мөнгө ихээр хэвлэснээс болж эдийн засгаараа баларч доройтдог.

Татвар төлөгчдийн мөнгөөр данхайж байдаг засгийг нураахгүй бол болохгүй. Цомхон бүтэцтэй, хурдтай ажилладаг засаглал, зах зээлийг жам ёсоор нь явахад садаа болдоггүй зөв бодлоготой банк, ард иргэдээ харгислал хүчирхийллээс хамгаалдаг хараат бус сэргийлэх байгууллага, хувийн өмчийг хамгаалдаг шүүхтэй, дотно гадны халдлагаас хамгаалдаг батлан хамгаалахтай эрх чөлөөт тогтолцоог бий болгохгүй бол улс үндэстэн доройтно гэж би үзэж байна.


Худалдаа арилжаа нээлттэй байхгүй бол болохгүй. Энэ зудыг хар. Зуд гэдэг халх үг гэж нэг буриад хүн хэлсэн юм. Ортой шүү. Саяхан 2 малчин залууг харлаа. Хүнээс азтай мал байх юм. Тэр малаа хариулж байгаа нь. Ийм амьжиргаатай малчид байна. Ийм хүмүүсийг зөнд нь орхиодох. Тэгж байж л эрх чөлөө дархлаажна, ингэж хэлэх гэж л өнөөдөр ирсэн юм." гэв.



М.Чой