sonin.mn
Сэтгэгдэл (1)

Монгол Улсын Шадар сайд Н.Номтойбаяр тэргүүтэй төлөөлөгчид 2026 оны 5 дугаар сарын 28-30-ний өдрүүдэд Бүгд Найрамдах Казахстан Улсад ажлын айлчлал хийж, Астана хотноо 5 дугаар сарын 28-ны өдөр зохион байгуулагдсан Евразийн эдийн засгийн тав дахь чуулга уулзалтад оролцов.


Евразийн эдийн засгийн чуулга уулзалтын бүгд хуралдаанд Шадар сайд Н.Номтойбаяр үг хэлэхдээ 2026 оныг Казахстан улс цахим шилжилт ба хиймэл оюун ухааны жил болгон зарлаж, энэ удаагийн чуулга уулзалт уг сэдвийн хүрээнд болж байгааг сайшаажээ.


Монгол Улсын Ерөнхийлөгч У.Хүрэлсүх нэг сар гаруйхны өмнө Бүгд Найрамдах Казахстан Улсад төрийн айлчлал хийж, олон чухал асуудлаар тохиролцоонд хүрснийг тэмдэглээд Монгол Улс, Евразийн эдийн засгийн холбоотой чөлөөт худалдааны түр хэлэлцээр байгуулж, энэхүү хэлэлцээр хоёр сар орчмын дараа хүчин төгөлдөр болон хэрэгжиж эхлэх гэж байгааг мэдээлсэн байна.



Шадар сайд Н.Номтойбаяр айлчлалын хүрээнд Монгол, Казахстаны Засгийн газар хоорондын комиссын казахстаны хэсгийн дарга, Хөдөө аж ахуйн сайд А.Сапаров, Худалдаа, интеграцийн сайд А.Шаккалиев, Шадар сайд бөгөөд Хиймэл оюун ухаан, цахим хөгжлийн сайд Ж.Мадиев нартай уулзаж, хамтын ажиллагааны зарим тодорхой асуудлаар ярилцаж, санал солилцов.

Төлөөлөгчид Астанагийн олон улсын санхүүгийн төв, Алем AI хиймэл оюун ухааны төв, “Астана - Шинэ хот”, “Астана - Технополис” эдийн засгийн тусгай бүсүүдийн үйл ажиллагаатай танилцаж, Казахстаны туршлагыг судлав.