sonin.mn
Сэтгэгдэл (21)

Нийслэлийн Засаг дарга асан, Монгол Улсын Баатар Э.Бат-Үүл сэтгүүлчдийн асуултад хариуллаа.



Энэ үеэрээ тэрээр: "Манай нийслэлчүүд хотын дарга нь эгэл даруу, хэт тансаглал, ямбархлаас хол байхыг илүүд үздэг хүмүүс шүү дээ. Тийм учраас өөрийгөө тансаг хэрэглээ, ямбаас хол авч явах хэрэгтэй гэж би зөвлөмөөр байна. Хотын даргад маш их ажил, асар том хариуцлага хүлээгдэж байгаа. Өөрөө ч энэ хариуцлагаа ойлгож байгаа байх гэж бодож байна.

Нийслэлчүүдийн итгэл найдварыг олно гэдэг амар зүйл биш. Харин тэр итгэлийг алдана гэдэг бол өөрийнх нь нэр хүнд, улс төрийн карьертаа ч хүнд цохилт болно гэдгийг залуу хүний хувьд ойлгож байгаа байх. 2016 оны сонгуулийн дараа Ардын нам Улаанбаатар хотын эрх мэдлийг авмагцаа өмнөх удирдлагуудын эхлүүлсэн олон ажлыг зогсоосон. Гэр хорооллын дахин төлөвлөлт, метро зэрэг томоохон бүтээн байгуулалтуудыг улс төрийн хонзонгоор гацаасан гэж хардаг.

Тухайн үед С.Батболд хотын дарга болсон. Харин дараа нь Х.Нямбаатар гарч ирээд зарим ажлуудыг тодорхой хэмжээнд урагшлуулах оролдлого хийсэн. Тухайлбал, тусгай замын төсөл болон гэр хорооллын дахин төлөвлөлтийн ажлыг эрчимжүүлэх чиглэлд ажилласан нь үнэн. Хичээл зүтгэл гаргаж байсныг үгүйсгэхгүй.


Гэхдээ хот байгуулалтын бодлого, төлөвлөлтийн тал дээр мэдлэг дутмаг, хариуцлагагүй хандсан зүйлүүд их байсан гэж би шүүмжилдэг. Жишээ нь, Сэлбэ төв орчимд баригдаж байгаа томоохон хорооллын бүтээн байгуулалт ирээдүйд Улаанбаатарын томоохон эрсдэлийн бүс болно гэж харж байна. Уг нь тэр бүс нам давхар орон сууцны төлөвлөлттэй газар байсан. Үүнд би үнэхээр санаа зовдог.


Мөн хойд зуслангийн бүсүүд ирээдүйд түгжрэл, хаалттай бүс болох эрсдэлтэй. Ер нь хот байгуулалтын нэгдсэн төлөвлөгөөгөө бүрэн ойлголгүйгээр олон ажлыг хүч түрэн явуулсан. Яармаг руу хотын захиргааг нүүлгэсэн асуудал ч мөн адил. Энэ нь зарим газрын бизнесийн ашиг сонирхлыг дэмжсэн, хотын хөгжилд сөрөг нөлөөтэй шийдвэр болсон гэж үздэг.

Өөрөөр хэлбэл, зүтгэл байсан ч хот байгуулалтын мэдлэг, бодлогын алдаанаасаа болж нөхцөл байдлыг улам хүндрүүлсэн тал бий.

Харин Х.Нямбаатарыг огцруулсан асуудлын цаана илүү ноцтой зүйл болсон. Өнөөдөр Улаанбаатар хотын иргэд өөрсдөө хотын даргаа сонгож, хариуцлага тооцдог тогтолцоо үндсэндээ алдагдсан.


Өөрөөр хэлбэл, нийслэлийн өөрөө өөрийгөө удирдах ёс устсан гэсэн үг. Улаанбаатар хотын даргыг хэн байхыг нийслэлчүүд шийдэхээ больсон.


Энэ өөрчлөлтийг хийсэн хүмүүс нь Л.Оюун-Эрдэнэ, Х.Нямбаатар хоёр гэж би үздэг. Ардын нам 2022 онд хуульд өөрчлөлт оруулж, Ерөнхий сайдад нийслэлийн Засаг даргыг томилох, огцруулах эрх өгсөн. Өмнө нь Ерөнхий сайд зөвхөн огцруулах санал гаргах эрхтэй байсан бөгөөд эцсийн шийдвэрийг Иргэдийн төлөөлөгчдийн хурал гаргадаг байсан.

Гэтэл нутаг дэвсгэр, засаг захиргааны нэгжийн тухай хуульд өөрчлөлт оруулснаар Улаанбаатар хотын удирдлагыг шууд Ерөнхий сайдын мэдэлд шилжүүлсэн. Ингэснээр өнөөдрийн Улаанбаатар хот бие даасан удирдлагатай хот биш, бараг агентлаг шиг болсон.

Одоо нийслэлтэй холбоотой түгжрэл, агаарын бохирдол, дэд бүтэц зэрэг асуудлыг хотын даргаас илүүтэйгээр төв засгийн газрын сайд нар хариуцах нөхцөл үүссэн. Өөрөөр хэлбэл, Б.Пүрэвдагва бол нийслэлчүүдийн шууд сонголт биш, харин төв эрх мэдлийн томилгооны хүн болсон гэж харж байна. Тиймээс Улаанбаатар хотод асуудал үүсвэл хариуцлагыг зөвхөн хотын даргаас бус, төв засгийн түвшинд ярих нөхцөл байдал бий болсон." гэв.


Б.Төгсбаясгалан