УИХ-ын гишүүн асан Д.Дамба-Очир сэтгүүлчдийн асуултад хариулсныг сийрүүлэн хүргэж байна.

ЖДҮ-ийн хэргээр цөөхөн хэдэн хүнд ял оноосон. Түүний нэг нь бол та. Энэ хэргийг хэр үнэн шүүсэн гэж боддог вэ?

Мэдэхгүй дээ, улс төрийн шийдэл байсан юм байгаа биз. Би тэр ЖДҮ-г нь аваагүй. 3-4 хүн шоронд явсан ш дээ. Улс төрч байхгүй, бүх юм л байхгүй болсон, тэгээд л явцгаасан. Олон УИХ-ын гишүүд холбогдсон, зарим гишүүд нь сайд, дарга болчихсон явж л байна. Хэдэн хүн хэлмэгдээд өнгөрсөн. "Женко" Баттулга гэдэг хүн сонгогдохын тулд маш олон хүн шоронд хийсэн, түүний нэг нь би.

Тэгэхээр энэ хэрэг "Женко" Баттулгатай холбоотой гэж үү?

Би тэгж ойлгодог. Тэр үед чинь олон шалтгаанаар их олон хүн явуулсан ш дээ. Намайг хорих дээр очиход 30-40 хүн баригдсан байсан. Дөрвөн Ерөнхий сайд, хоёр Шадар сайд гээд олон гишүүд очсон байсан.

Тийм юм болоод түүнээс хойш би бол даруухан амьдарч байна.

АТГ болон хууль хяналтын газар ажлаа сайн хийж байна гэж үзэх үү, эсвэл ялгавартай хандаж байна гэж үзэх үү?

Дандаа л захиалга байдаг байлгүй дээ, би тэгж боддог ш дээ. 3-4 хүн шоронд яваад тэр ЖДҮ гэдэг асуудал нь байхгүй болсон, тэгээд л чимээгүй болсон.

Тухайн үеийн улс төрийн тулалдаанд ялагдсан хүмүүс ял шийтгэл авсан гэж үзэж байна уу?

Ялсан, ялагдсаныг нь би одоо сайн мэдэхгүй байна аа. Ямар ч байсан нэг хэдэн хүн бол явсан. ЖДҮ гэдэг бол жишээ нь, би бол ингээд нэг бичиг хийж өгсөн. Тэрбум 300 сая төгрөгийн зээл аваад явсан. Одоо бол яригдаж байгаа юм нь хэдэн саяар нь ярьдаг байсан бол хэдэн тэрбумаар ярьдаг болсон юм шиг байна. Их л замбараагүй болсон юм шиг байна. Цэгцтэй байхгүй бол болохоо байсан байна. Бид нарын үед их л цэгцтэй байсан.

Ингээд харж байхад бол УИХ-ын гишүүд энэ тэр жилээс жилд улам л муудсаар байна.

Туршлагатай хүмүүс их бага байна. Залуучууд их орж ирж байна. Ялангуяа сүүлийн үед сайд болж байгаа хүмүүс дандаа залуу хүмүүс байна. Туршлага дутаж байна. Гаргаж байгаа шийдвэрүүд нь их амаргүй шийдвэрүүд гаргаж байгаа харагдаж байна.

Надад бол нэг их гоншигноод яриад байх юм байхгүй.

Та улс төрд оролцоо их бага байна уу?

Намайг ч ороод ир гэх хүн алга. Би ч өөрөө нэг их оръё гээд гүйгээд байсан юм байхгүй. Надад бол одоо улс төрд орох сонирхол тун бага байна.

Шүүхээс танд 3.6 жилийн ял өгсөн, түүнийгээ биеэр эдэлсэн үү?

Тэр намайг орохоос өмнө хэвлэл мэдээллээр гарчихсан. “Хэдэн жил өгнө, тэгнэ ингэнэ” гээд. Би ч өөрөө “арай ч үгүй байлгүй дээ” гэж бодоод костюм, бинтүүгээ аваад очоод ачигдаж байсан. Амаргүй л юм байна лээ. Яагаад гэвэл би өөрөө тэгчихнэ гэж даанч бодоогүй. Манай гэр бүлийнхэнд их хүндээр туссан. Бусдаар бол яах вэ, явж л байна.

Би бол УИХ-д 3 удаа гишүүн болсон байна.

Засаг төрд нилээн олон ажил хийж байсан. Энэ жил Эрдэнэтийн 50 жилийн ой гээд Эрдэнэт рүү нааш цааш явах ажил их байна. Эрдэнэтийнхний 50 жилийн ойг сайхан хийгээд өгчихье гэсэн бодолтой. Эрдэнэтийнхэн маань намайг 3 удаа УИХ-д сонгож байсан болохоор би их баярладаг.

Н.Отгончимэг