sonin.mn
Сэтгэгдэл (5)

Монгол Улсын төр, шинжлэх ухаан, боловсролын салбарт үнэтэй хувь нэмэр оруулсан нэрт эрдэмтэн, төр, нийгмийн зүтгэлтэн, академич, Шинжлэх ухааны гавьяат зүтгэлтэн, Ардын багш, доктор, профессор Ж.Болдбаатар таалал төгсөж, төрөлх Булган аймаг төдийгүй Монголын шинжлэх ухаан, боловсролын салбарт нөхөж баршгүй хүнд гарз тохиолоо.


Боржигин овогт Жигжидийн Болдбаатар нь 1949 онд Булган аймгийн Бугат суманд төрж, эх орныхоо түүх, төр ёс, шинжлэх ухааны хөгжилд амьдралынхаа үнэт он жилүүдийг зориулсан эрхэм хүмүүн байлаа.


Тэрээр 1967–1971 онд Монгол Улсын Их Сургуулийн түүхийн ангийг төгсөж, олон арван жил эрдэм шинжилгээ, дээд боловсролын салбарт үр бүтээлтэй ажилласан юм. 1971–1991 онд МУИС-д багшилж, олон зуун шавь, судлаачдыг бэлтгэн хүмүүжүүлжээ. Мөн 1992–1996 онд Монгол Улсын Их Хурлын гишүүн, УИХ дахь Намын бүлгийн даргаар ажиллаж, төрийн бодлого боловсруулах үйл хэрэгт үнэтэй хувь нэмэр оруулсан төрийн зүтгэлтэн байлаа. Түүнчлэн Монгол Улсын Үндсэн хуулийн цэцийн гишүүнээр олон жил ажиллажээ.


Түүний хөдөлмөр, бүтээлийг төр засгаас өндрөөр үнэлж, 2004 онд Монгол Улсын Шинжлэх ухааны академийн жинхэнэ гишүүн, академич, 2007 онд Шинжлэх ухааны гавьяат зүтгэлтэн, 2022 онд Ардын багш цолоор шагнасан билээ.


Түүний мэдлэг оюун, эрдэм судлалын хөдөлмөр, эх түүхээ дээдэлсэн үзэл санаа нь хойч үед өв болон үлдэж, Монголын шинжлэх ухаан, боловсролын салбарын түүхэнд мөнхөд дурсагдах болно. Талийгаачийн гэр бүл, төрөл төрөгсөд, шавь нар, хамтран зүтгэгчид, анд нөхдөд нь Булган аймгийн Засаг даргын Тамгын газар, аймгийн иргэдийн нэрийн өмнөөс гүн эмгэнэл илэрхийлж, уй гашууг нь хуваалцаж байна.

Ум ма ни бад мэ хум.