sonin.mn
Сэтгэгдэл (27)

Ерөнхийлөгч асан Н.Энхбаяр өнгөрсөн Баасан гарагт сэтгүүлчдийн асуултад хариулав.


Энэ үеэрээ тэрээр: "Эрх мэдэл гэж юу вэ гэдгийг би хэнээр ч хэлүүлэлтгүй сайн мэднэ. Хүн эрх мэдэлтэй болохоосоо өмнө ямар ааштай байсан, эрх мэдэлтэй болсны дараа ямар ааштай болсон гэдгийг нь хараад үзээрэй. Х.Нямбаатар чинь зөвхөн надтай биш, маш олон хүмүүстэй л муудчихлаа шүү дээ.

Нэг талаас нь бодоход ажлаа хийх гэж байхад нь хүмүүс янз бүрийн зүйл ярьж, шүүмжлээд байхаар хүн мэдээж дургүйцнэ. Түүнээс гадна эрх мэдэлд хүрчихээрээ аливаа асуудлыг ойлголцох, зөвшилцөх, санал бодлоо хуваалцахаас илүү хүчээр түрэмгийлэх арга барил руу орчихдог тал байдаг. Магадгүй цаг хугацаанд шахагдсан байсан ч юм уу, эсвэл хажуугаас нь “тэгээч дээ, даргаа” гэж өөгшүүлсэн хүмүүс байсан ч байж магадгүй.


Тийм учраас хүнийг ер нь нэг зүйлээр хамгийн сайн шалгаж, таньж болдог гэж ярьдаг. Тэр нь эрх мэдэл.


Хүнд эрх мэдэл өгчихвөл тухайн хүн үнэндээ ямар хүн бэ гэдэг нь илүү тод харагддаг. Харамсалтай нь эрх мэдэлтэй болсныхоо дараа ааш зан, авир нь өөрчлөгдсөн тухай олон түүх байдаг. Үүний нэг жишээ нь л болсон болов уу гэж бодож байна.

Жишээ нь Х.Нямбаатар дарга Туулын хурдны замын төслийг эсэргүүцсэн иргэдийн асуудал дээр жагсаал зохион байгуулж байсан хүмүүсийг “очоод ир, үзэлцье” гэх мэтээр дуудсан. Сэтгүүлчид очихоор микрофоныг нь булааж шидсэн, янз бүрийн ширүүн үг хэлсэн гэх мэт асуудлууд яригдсан. Асуудал ярьж, санал шүүмжлэл хэлэхээр л түрэмгий өнгө аястай ханддаг байсан гэж хүмүүс ярьдаг. Түүнээс болж олон хүн ихээхэн гомдсон шүү дээ.


Мөн Үндэсний цэцэрлэгт хүрээлэн дотор Хятадын Засгийн газрын буцалтгүй тусламжаар Үндэсний урлагийн театр барих асуудал яригдахад хүмүүс янз бүрээр хүлээж авсан.


Зарим нь 4 га газрын асуудал гэж, зарим нь бүр 40 га газрын асуудал мэтээр ойлгож, эмзэглэн хүлээж авсан. Саяхан бордюртай холбоотой асуудал яригдахдаа ч хэтрүүлсэн зүйл байсан байж магадгүй, эсвэл хэтрүүлээгүй ч байсан байж мэднэ. Гэтэл үүний цаана Н.Учрал байсан байна, одоо л мэдлээ гэх мэтээр тайлбарлах нь бас зөв арга биш.


Ер нь захирах, захирагдах ёс гэж байх ёстой.


Төрийн албан тушаалтан бүр өөрийн эрх хэмжээний хүрээнд ажиллаж, хариуцлагаа хүлээдэг байх хэрэгтэй. Ерөнхий сайд бүрэн эрхийнхээ хугацаанд Х.Нямбаатар ч байна уу, өөр хэн ч байна уу, шаардлагатай гэж үзвэл хариуцлага тооцож, асуудлыг шийдэж болно. Гэхдээ хүнийг “бацаан” гэж дуудах, хочлох, доромжлох зэрэг нь ямар ч тохиолдолд зөв зүйл биш. Энэ бол Монголын улс төрийн соёлд тогтож буй маш буруу жишиг. Албан тушаалтай хүн ч бай, жирийн иргэн ч бай бие биеэ хүндэтгэж, асуудлыг баримт нотолгоо, үндэслэлээр нь ярьдаг байх нь ардчилсан нийгмийн хамгийн чухал зарчим гэж бодож байна." гэжээ.


Б.Төгсбаясгалан