sonin.mn
Сэтгэгдэл (12)

Хаваржилт хүндэрч, зудын нөхцөл байдал гамшгийн хэмжээнд хүрээд байгаа энэ цаг үед "Олуулаа" клубын зүгээс малчдад туслах аян эхлүүлж байгаа талаараа мэдээлэл хийлээ. 


Хэвлэлийн хурлын үеэр "Олуулаа" клубын гишүүд : "Зудын гамшиг улсын хэмжээнд учраад байгаа энэ хүнд хэцүү цаг үед "Олуулаа" клубын зүгээс зудын үед мал төллөлтийн эндэгдлийг бууруулах зорилгоор малчдад малын нэмэлт тэжээл, төл угжих хуурай сүүний дэмжлэг үзүүлэх “Олуулаа олон төл аварья” аяны танилцуулга, мэдээллийг та бүхэнд хүргэж байна.



Энэ жил олон жилийн дунджаас их цас орж, малчид сүүлийн 50 жил тохиогоогүй байгалийн гамшигт үзэгдэл болох зудад нэрвэгдэн өнөөдрийн байдлаар улсын хэмжээнд 2.09 сая толгой мал хорогдоод байна.



Зудын дараах цаг агаарын нөхцөл байдалд төл малын эндэгдэл өндөр байдаг ба малчдад энэ үеийг давж, төл малаа авч үлдэхийн тулд төлийг угжих хэрэгцээ шаардлага хамгийн өндөр байдаг. Иймээс төлийг угжих, эх малыг нэмэлт тэжээлээр тэжээх шаардлага үүсдэг тул малчдад энэхүү хэрэгцээний дэмжлэгийг үзүүлэх нь уг төслийн зорилго юм. Энэхүү аян нь 03 сарын 01-нээс хэрэгжиж эхлэх ба 3-р сарыг дуустал үргэлжилнэ." гэлээ.

Харин "Олуулаа" клубын тэргүүн Ч.Өнөрбаяр: “Зудын нөхцөл байдал улс эх орныг хамарсан энэ цаг үед хаврын мал төллөлтийг хорогдол багатай давахад бидний хамтын оролцоо чухал байна.



Бид “Олуулаа олон төл аварья” аяны хүрээнд олон улсын байгууллагуудад хамтран ажиллах уриалгыг хүргүүлэн ажиллаж байна. Төл малыг угжих, эх малыг өвс тэжээлээр тэжээх нь зудын дараах нөхцөл байдлыг давахад маш чухал нэмэр болно” гэсэн юм.



Нэг кг төл мал угжих сүү 15,000-18,000 төгрөгийн үнэтэй байна. Малчин өрх 200 толгой малаас төл хүлээж авлаа гэхэд багадаа 50 кг хуурай сүү авах хэрэгтэй гэж үзвэл 900,000Т-өөс дээш төгрөгөөр сүү авах хэрэгтэй болно. Гэтэл энэ цаг үед малчид өвс, тэжээл, хивэгт бүх санхүүгээ зарцуулсан тул ийм боломжтой малчид цөөн болсон иймд тэдэнд туслах бодитой шаардлагатай хэмээн тус клубын хамт олон үзжээ.


Тус аян нь төл малын эсэн мэнд бойжуулах, малчдын амжиргааг хамгаалах, тэдний уламжлалт амьдралын хэв маягтай соёлын өвийг хадгалахад нэн чухал ач холбогдолтойг мөн онцолсон юм. Зуднаар мал сүргээ алдаж буй хүнд байдалд байгаа малчдад төл малаа алдахаас урьдчилан сэргийлэхэд тусалж, тус хандивт байгууллага, хувь хүмүүс нэгдэхэд нээлттэй юм байна. Хэрэв та олуулаа клубтэй холбогдож аянд нэгдэж хандив өргөх бол “Олуулаа клуб” фейсбүүкийн хуудсаар холбогдох боломжтой юм.