sonin.mn
Сэтгэгдэл (16)

Эцэст нь арай гэж цахилгаан станцын үнийг чөлөөлөх юм руу маш бяцхан ойртлоо. Маш бяцхан шүү. Гэхдээ чөлөөлбөл л сүйрчих юм шиг байдаг асан сэтгэлгээнд бол том салхи оруулж чадлаа.


“Цахилгааны үнийг барина”, “махны үнийг анхаарна”, “гуриланд татаас өгнө” гэсэн балайрлыг залуу ерөнхий сайд давтсангүй нь Монголын зол юм шүү. Цахилгааны үнийг үе шаттай нэмнэ гэж тэрээр амлалаа. Амласандаа хүрэхийг шаардах нь ч бидний үүрэг боллоо. Тэгэнгүүт Ерөнхий сайд овоо их балбаасыг тэсвэрлэх хэрэг гарна.



Таньсан тайчууд байна гэдэг шиг хэдхэн газраас л балбадаг. Мэдээний доор комментын фронт зохион байгуулна, элдэв контент, сэтгүүлзүй хийж түгээнэ, биет хүн гарч ирж ард түмний нэрийг барьж эсэргүүцнэ.



Мэдээж яг ийм бодит, органик хүмүүс байлгүй яахав дээ, гэхдээ нээх нөмөрч ирээд байдаггүй л юм. Учир нь цахилгааны үнэ чөлөөлөхийн алт шиг үр дүнг сайн ойлгож байгаа, хүсэж байгаа хүмүүс ч бас зөндөө бий.


Ер нь хэн хэн балбах вэ гэвэл,


• Мэдээж улс төрийн эсрэг талынхан. Ерөнхий сайд Н.Учралын шийдвэр нийгмийн бухимдлыг байнга төрүүлж байх нь тэдний гол зорилго. Энэ бол сөрөг хүчний нам, мөн нам доторх сөрөг хүчин.


• Дутуу ойлголттой иргэд. “Яаж амьдар гээд байгаам бэ!” гээд ороод ирнэ.


• Манайд цахилгаанаа зардаг улсад мэдээж энэ таалагдахгүй. Монголчууд цахилгаанаа өөрсдөө хангаж чадахгүй байх гол нөхцөл нь үнийг нь хямд барих юм шүү дээ. Хэзээ ч өөдлөхгүй, бас үхдэггүй, мөнхийн хэвтэрт оршиж байх нь тэдэнд маш ашигтай.


Үндсэндээ ийм л юм сошиал медиад өрнөнө. Хэрвээ цахилгааны үнийг нэмэх, улмаар чөлөөлөх нь хүн бүхний гэрт гэрэл асах боломж өгөх юм бол үүний төлөө бяцхан нэгдэх, дор бүрнээ дэргэдэх хүнийхээ харанхуй бодолд нь эхлээд гэрэл асаая аа!


Үнэндээ тэр нэмнэ гээд байгаа үнэ нь ганц лааз шар айргийн л мөнгө. За яахав 2 лааз л биз. Эсвэл нэг мөндөл, ганц аяга кофе, тал хэрчим торт, хайрцаг тамхи л авна. Харин оронд нь бид тасардаггүй тогтой болно.



Жил бүр бараг 50 тэрбум төгрөгийг цахилгаан станцуудад улсаас өгдөг юм билээ. Гү одоо өөр юм хийвэл өчнөөн их мөнгө шүү дээ.



Тэгээд ч өнөөдөр хэн 4000 төгрөгөөр авсан хөдөөнөөс авчирсан сүүгээ дэлгүүртээ 400 төгрөгөөр зарах юм бэ?


Та өөрийнхөө хөдөлмөрийг сарын 2 сая төгрөгөөр үнэлсэн ч гэсэн, “яах вэ надаад 20 мянган төгрөг байхад болно” гэх үү? Яг л ийм галзуу солиотой үзэгдэл манай дулаан, цахилгаан үйлдвэрлэлд бий болчихоод, болиулах зоригтноо олон жил хүлээж клиник үхэлд хэвтсэн юм даа.


Учралын хамгийн том чөлөөлөлт энэ салбарт л явах учиртай. “Чөлөөлөх дайн” гэж нэрлэсэн ч яадаг юм. Монголын цахилгаан л хөл дээрээ босож байвал. Тэгвэл Монгол босно!