sonin.mn
Сэтгэгдэл (21)

УИХ-ын гишүүн М.Нарантуяа-Нара сэтгүүлчдийн асуултад хариулав.


Энэ үеэрээ тэрээр: "Ерөнхийлөгчийн санаачилсан хууль нь Монголын ард түмнийг булшилж байгаа, Монголын ард түмнийг эрхшээлдээ байлгаж, төлөөллийнх нь дуу хоолойг боомилж байгаа асуудал юм. Эрх мэдэлтнүүдийн төлөө кноп дардаг утсан хүүхэлдэйнүүд бий болох эх суурийг хангаж байгаа хууль учраас би эсэргүүцэж байгаа юм. УИХ-ын дарга С.Бямбацогтыг огцрох боломжоо бүрэн хангасан гэж үзэж байгаа. Энэ акцыг цаашид улам өргөжүүлж, үргэлжлүүлэн явуулна. Би хувь хүнийхээ зүгээс хэзээ ч улс төрөөр амьдарч үзээгүй. Төрд орсноос хойш л төрийн цалингаар амьдарч үзэж байна. Гэвч төрийн цалин миний амьдралд хүрэлцэхгүй байгаа.


Би иргэдийнхээ дуу хоолой болж, итгэл сэтгэлээ ард түмэндээ зориулж зүтгэж байхаас биш төрийн тендер хулгайлж, шахаа хийж, эрх мэдэлтнүүдэд бөхөлзөж амьдраагүй. Тийм учраас надад энд алдах зүйл нэг ч байхгүй.


Ерөнхийлөгч У.Хүрэлсүх 2021 онд сонгогдсон. Ерөнхийлөгчийн эрх үүргийн хүрээнд Улсын Их Хуралд ажлаа тайлагнах ёстой. Гэтэл 2021 оноос хойш нэг ч удаа ажлаа тайлагнаагүй, шинэ парламент бүрдэхэд ч тайлагнаагүй байна. Татвар төлөгчдийн мөнгийг хэрхэн зарцуулж байгаа, түүний үр ашиг, зүй зохистой байдал хаана байна вэ? Олон томилолтын үр дүнг хэн ч хэмжих боломжгүй байна. Ерөнхийлөгч ажлаа тайлагнах ёстой. УИХ бол ард түмний төлөөлөл, “бага ард түмэн” учраас өөрөө ард түмэнд ажлаа тайлагнах үүрэгтэй гэдгийг та бүхэн ойлгох хэрэгтэй. Ёс зүйн дэд хорооны дарга өөрөө ёс зүйтэй хүн мөн үү? Хэрэв үнэхээр ёс зүйтэй бол Монгол Улсын татвар төлөгчдийн мөнгөөр авсан 250 сая төгрөгийн боловсролын зээлийн сангийн өрөө төлөх ёстой. Өөрөө манлайлал үзүүлж байж энэ хороог удирдах ёс зүйн эрхтэй болно.


Ёс зүйгүй хүн ёс зүйгүй хүнийг шүүнэ гэж байх ёсгүй.


Мөн нэг зүйл ярих ёстой. Албаны ёс зүй, хувь хүний ёс зүй гэж ялгаа бий. Яагаад энэ Их Хурал албаны ёс зүйг ярихгүй, харин хувь хүний хувийн амьдралыг шүүж хэлэлцээд байна вэ? Энэ байгууллага зөвхөн албаны ёс зүйг хэмжих ёстой. Гэтэл өөрсдөө хүссэн асуудлаа сонгон шүүж, ангилал үүсгэж байгаа нь ёс зүйн дэд хороо хэрхэн ажиллаж байгааг ил тод харуулж байна. Энэ бол эрх мэдэлтнүүдийн хулгай, луйвар, бузар булайг илчилсэн УИХ-ын гишүүдийг ёс зүйгээр нь боомилдог, харин эрх мэдэлтнүүдийн гар хөл болсон кнопчдыг хамгаалдаг хууль юм.


Миний хувьд ёс зүй гэдэг нь үнэнч шударга, итгэл үнэмшилдээ үнэнч байж, аливаад зөв хандаж, шударгаар хөдөлмөрлөж амьдрахыг хэлнэ. Гэтэл зарим хүмүүс чимээгүй хулгай хийчихээд, гаднаа ёс зүйтэй дүр эсгэхийг ёс зүй гэж ойлгож байна.


Үүнийг хэн цэгцлэх вэ? Ерөнхийлөгч үү? Ерөнхийлөгч өөрөө хэр ёс зүйтэй вэ? Цаашид ёс зүйтэй байж чадах уу? Тэр эрх мэдлээ хэтрүүлж, хаан мэт ажиллаж байна. Монгол Улс хаант засаглалтай юу, парламентын засаглалтай юу? 2025 онд Олон улсын парламентын холбооноос Монгол Улсыг парламентын засаглалаас илүү бэлгэдлийн шинжтэй ерөнхийлөгчийн засаглал руу шилжиж байна гэсэн судалгаа гарсан. Энэ нь бид аажмаар нэг хүний дарангуйллын систем рүү явж байгааг харуулж байна. Парламентад өөрсдийн ойр дотнын хүмүүс, төрөл садан, гар хөл, үр хүүхдээ оруулж ирдэг байдал газар авсан. Ийм нөхцөлд шударга ёсыг хэмжих боломж маш хязгаарлагдмал байна. Гэсэн ч үнэнч, шударгаар улс эх орныхоо төлөө ажиллаж байгаа хүмүүс цөөн ч гэсэн байгаа нь харагдаж байна. Энэ бүхнийг л бид харж байна." гэлээ.



Н.Отгончимэг