sonin.mn
Сэтгэгдэл (68)

Өөрсдийгөө "Бүтэн Монгол" хөдөлгөөн гэж нэрлэсэн УИХ-ын гишүүн А.Адьяасүрэн, АН-ын дэд дарга П.Галиндэв, Нийслэлийн АН-ын дарга Т.Батцогт тэргүүтэй "Женко" Х.Баттулгын фракцийн хэсэг нөхөд мэдээлэл хийв.


Энэ үеэр А.Адьяасүрэн: "Газар нутгаа хойч үедээ бүрэн бүтэн үлдээхийн тулд "Бүтэн Монгол" хөдөлгөөн аян зохион байгуулж, Монгол орон даяар хүрч ажиллаж чадлаа. Цахимаар 100 мянга гаруй гарын үсэг, биетээр 678 мянга гаруй гарын үсэг цуглуулж чадлаа. Эхний үр дүн маань гарлаа. УИХ-ын намрын чуулганаар гадаадын хөрөнгө оруулалтын хуулийг хэлэлцэх гэж байсан. Үүнийг болиулж чадлаа. Мөн үүний дараа УИХ-ын ээлжит бус чуулган зарлаж уг хуулийг батлах гэж байсныг ч зогсоож чадлаа. Саяхан УИХ-ын дарга Г.Занданшатар мэдээлэл хийж гадаадын хөрөнгө оруулалтын тухай хуулиас газартай холбоотой заалтыг хасах хуулийн төсөл санаачлан, Засгийн газарт санал хүргүүлнэ гэж мэдэгдсэн. Энэ бол Монголчуудын тэмцэл үнэн байсан гэдгийг эрх баригчид хүлээн зөвшөөрч байгаа гэдгийн илрэл юм.


Иргэдийн хамтаар бид Ч.Хүрэлбаатар нарын өргөн барьсан газрыг гадаадынханд өгөх хуулийг эргүүлэн татуулж чадлаа. Эв нэгдэлтэй байж чадсан ард түмэндээ баярлалаа. Гэхдээ бид тайвшрах болоогүй.



Гадныханд Улаанбаатар, Эрдэнэт, Дархан, Говьсүмбэрийн газар нутгийг нийлүүлсэнтэй тэмцэх хэмжээний буюу 2,2 сая га газрыг лиценз нэрээр өгчихсөн байна."



гэсэн бол эдийн засагч Х.Батсуурь: "Миний хувьд сэтгэл зүрхээрээ "Бүтэн Монгол"-ын залуустай хамтраад ажиллалаа. Ч.Хүрэлбаатар гишүүнээ Монголын ард түмнийг бүү басамжил, битгий гүтгээрэй гэж хэлмээр байна. Хөрөнгө оруулалтын гэсэн сайхан нэртэй хуулийг оруулж ирээд, цаана нь тун ноцтой агуулга бүхий зүйлийг зүтгүүлж байгаа хүн бол Ч.Хүрэлбаатар та шүү. Эзэмших гэдэг үгийг хассан чинь "Бүтэн Монгол"-ынхон энэ үгийг буцааж оруулах гээд байна гэж та хэлсэн. Ингэж худлаа гүтгэж болохгүй ээ. УИХ-ын дарга Г.Занданшатар таны оруулж ирсэн хуулиас газартай холбоотой заалтыг авч хая гэсэн саналыг оруулж ирсэн.



Та үгэн дээр тоглолт хийгээд байна лээ, ашиглах, эзэмших гэдэг үгийн хооронд зарчмын ялгаа байхгүй. Нөгөө талаар та маш их зальтай дотор аргаар үзэж байх шиг байна. Гэхдээ бид хууртахгүй.



Бид тэмцлээ цааш нь үргэлжлүүлэх болно. Монголдоо элэггүй, Үндэсний аюулгүй байдалд заналхийлсэн, ноцтой хууль оруулж ирж байгаа төрд шургалсан нөхдүүдийг төрөөс зайлуулах хүртлээ зогсохгүй, тэмцлээ үргэлжлүүлэх болно. " гэсэн юм.



М.Чой