Монгол Улсын Ерөнхий Сайд Г.Занданшатар Б.Энхбаярыг Хууль Зүй, Дотоод Хэргийн Сайдаар томилж буй шийдвэрээ анх зарлахдаа "Та бүхэн санаж байгаа. Залуучууд гудамжинд жагсаж, нүүрсний хулгайтай тэмцэхийг шаардаж байсан. УИХ, Засгийн газар тухайн үед нээлттэй сонсгол зохион байгуулсан.

 Б.Энхбаяр тухайн үед уг сонсголыг зохион байгуулж байсан.

Би яг үүнтэй адилхан Д.Амарбаясгаланг нүүрсний хулгайн тэмцэлд хамтран ажиллана гэж итгэж байсан. Нүүрсний хулгайд холбогдсон гэдэгт нь итгэхийг хүсээгүй. Харамсалтай нь Д.Амарбаясгалан энэ асуудлуудад нэр холбогдсон байсан.

Өнөөдөр эвлэлдэн нэгдэх тухай ярьж байна. Эв нэгдэл шударга ёсон дээр тулгуурлах ёстой. Тийм учраас Монгол Улсын Ерөнхий сайд би Монгол Улсын Үндсэн хуульд заасан онцгой бүрэн эрхийнхээ дагуу УИХ-ын гишүүн Баттөмөрийн Энхбаярыг Хууль зүй, дотоод хэргийн сайдаар томилж байгаагаа ард түмэндээ хандан мэдэгдэж байна. Нүүрсний хулгайтай хийх тэмцлээ илүү эрч хүчтэй, эрс шийдэмгий үргэлжлүүлэхийн тулд Б.Энхбаярыг Хууль зүй, дотоод хэргийн сайдаар томиллоо" гэж байв.

МАН дахь нүүрсний хулгайчдын бүлэглэл уг томилгоог бүх хүчээрээ эсэргүүцэж, зогсоохыг оролдсон ч үнэнд гүйцэгдсэн юм.

Б.Энхбаяр Хууль Зүй, Дотоод Хэргийн Сайдаар томилогдсоноос хойш төрийн өндөр албан тушаалтнууд болон тэдгээрийн хамаарал бүхий этгээдүүдтэй холбоотой хэргүүд идэвхтэй шалгагдаж эхэлсэн.

Өдгөө УИХ-ын гишүүн Д.Амарбаясгалан, Х.Булгантуяа, Ерөнхий Сайд асан Л.Оюун-Эрдэнийн хамаарал бүхий этгээдүүд болох Б.Баатар, А.Амундра нарт холбогдох хэргийн мөрдөн шалгах ажиллагаа дуусч, яллах дүгнэлт үйлдэн, шүүхэд шилжүүлэхэд бэлэн болжээ. Яг үүнтэй зэрэгцэн Хууль Зүй, Дотоод Хэргийн Сайд Б.Энхбаяр руу чиглэсэн хар пиарын кампанит ажил эрчимжиж эхэллээ. Ерөнхий сайд асан Л.Оюун-Эрдэнэ Хууль Зүй, Дотоод Хэргийн Сайд Б.Энхбаярыг АТГ-т шалгуулахаар хүсэлт өгсөний дараа түүний хөтөлж, улс төрд оруулсан УИХ-ын гишүүд элдэв янзын шалтаг, сэжүүр гарган дайрч эхлэв.

 Б.Энхбаярын сурч байсан АНУ дахь сургууль нь дампуурчихжээ ч гэж байх шиг...Мөн 10 орчим медиад их хэмжээний мөнгө төлж, Б.Энхбаярыг харлуулах аяныг эхлүүлсэн байна.

Нүүрсний хулгайчдын бүлэглэлийн төлөвлөгөө энгийн аж. Авилгатай тэмцэж буй Б.Энхбаярыг өөрөө авилгач гэж дайрч эхлээд, улмаар түүнийг Хууль Зүй, Дотоод Хэргийн сайдаас нь огцруулахаар Ерөнхий Сайд Г.Занданшатартай тохиролцоонд хүрэх. Цаашилбал шүүх дээр хэргээ наймаалцаж чадна гэж тооцож буй бололтой. Иймээс л Нүүрсний хулгайчдын бүлэглэл Б.Энхбаяр руу бүх хүчээрээ дайрч буй ажээ.

Э.Солонго