sonin.mn
Сэтгэгдэл (11)

МОСКВА, 2026 оны гуравдугаар сарын 16 /РИА Новости/. Европын ба Өмнөд Америкийн хөл бөмбөгийн аварга багуудын хооронд болдог тоглолтыг /Финалиссима/ цуцалсан тухай Европын хөл бөмбөгийн холбооны /УЕФА/ цахим хуудсанд мэдээлжээ.  

Товлосон ёсоор Испани, Аргентины шигшээ багуудын тоглолт Катарын “Лусаил” цэнгэлдэх хүрээлэнд энэ сарын 27-нд болох ёстой байв. Харин сарын эхээр Катарын хөл бөмбөгийн холбооноос "Персийн булангийн бүс нутагт болох бүх тэмцээн уралдааныг хойшлуулсныг" мэдэгдсэн бөгөөд ингэхдээ Испани, Аргентины тоглолтыг дурдаагүй байна.  




Одоогоор тоглолтын шинэ товыг Аргентины талтай тохиролцох боломжгүй байна гэж УЕФА-гийн мэдэгдэлд дурджээ. Уг тоглолтыг анхны товын дагуу 27-ны өдөр Мадрид хотын "Сантьяго Бернабеу" цэнгэлдэх хүрээлэнд явуулах, ингэхдээ хоёр багийн ижил тооны хөгжөөн дэмжигчдийг цэнгэлдэхэд нэвтрүүлэх хувилбарыг авч хэлэлцсэн байна. Нөгөөтээгүүр, "Финалиссима-2026”-г хоёр тоглолт болгож, эхнийхийг нь энэ сарын 27-нд "Сантьяго Бернабеу" цэнгэлдэхэд, хоёр дахь тоглолтыг Буэнос-Айрес хотод зохион байгуулах хувилбарыг мөн санал болгожээ.




Гэвч аргентинчууд хоёр саналыг хоёуланг нь хүлээж аваагүй бөгөөд ДАШТ-ий дараа тоглолтыг зохион байгуулах санал гаргасан байна.

Өмнөх "Финалиссима" тоглолтын ялагч нь Аргентины шигшээ баг бөгөөд 2022 онд Лондоны “Уэмбли” цэнгэлдэх хүрээлэнд болсон тоглолтод аргентинчууд Италийн шигшээг 3:0 харьцаагаар хожиж байв. 


Б.Адъяахүү