sonin.mn
Сэтгэгдэл (27)

Урт тексттэй нийтлэлээ түр азнаж энэ хэдэн зурагт тайлбар өгчих үү? Хараал зүхлээс айхаа байгаад бичээд байгаа хэрэг.


Миний хараалчид гэж гурван төрлийн хүмүүс байна:

 

1.Эх орноо хамгаалах шударга дайн (1), эзлэн түрэмгийлэх шударга бус дайны (2) ялгааг олж хардаггүй (ихэнхдээ тэнэг хүмүүс?). Орос ялаасай гэснээ л хараал зүхлээрээ илэрхийлдэг нэг хэсэг;

2.Оросоос мөнгө даалгавар авчихаад хэргээр гүтгэж үгүйсгэж хараадаг (өөр яалтай ч билээ, тэдний буруу биш, тэд ухаантай?), бүр тусгай подкаст ажиллуулаад жирийлгэж өгсөн, Путин унасны дараа, Орос ялагдсаны дараа эд яах бол гэхээс миний өр өвддөг;

3.Монгол-Зөвлөлтийн найрамдлын мананд эргэлтгүй төөрч яваа (бас л ихэнхи нь тэнэг?), бас ялаасай гэснээ хараал зүхлээрээ гадагшлуулдаг нэг хэсэг.

Иргэдээ ингэж сортолсонд уучлаарай. Өнөөдрийн хэдэн зураг.


№1 тайлбар. Би энэ 4 жилд шувтан ажиглалаа. Оросын ТВ, сайтуудаас харлаа. Украиныг, Европыг цөмийн пуужингаар газрын хөрснөөс арчина, хариу цохилт хатуу, Та нарын төсөөлөөгүй хатуу хариуг барина, одоо Лондон, Парис, Берлинг шууд устгая гэсэн Кремлийн суртал нэвтрүүлэг, оросын улс төрчдийн заналхийлэл хослоод тоогоо алдлаа. Заналхийлэгч дотор Путин ч өөрөө орчихсон манаргаж явна. Өнөөдөр ч сонсож л байна. Ёстой нэг дөжирлөө. Аргаа бараад оросын сөрөг хүчнийхэн Медведевээр нүүр хийгээд ийм зураг гаргаад ирж. Аман заналхийлэл хараал хоёрт нь цаад хязгаар, улаан шугам гэж алгаа.


№2 тайлбар. Украин тархи (ард түмнийх нь сэтгэхүй) лав 100 жил цаашаа эргэсэн байх аа. Хэд хэдэн үеэрээ Оросыг, орос хүмүүсийг үзэн ядна. Ийм их нүгэл үйлдсэн, үйлдсээр байгаа юм чинь тэгэхээс ч аргагүй. Харин би энэ тархийг баяжуулаад ганц өгүүлбэр хэлчихье. Оросын түрэмгий дээрэнгүй авир, байнгын заналхийлэл ба хараал, тэгээд байлдаж байгаа царай зүс. Ердөө л хүний амиар тоглоод байх нь тэр. Хариуд нь Украин дроны дайнд ёстой нэг гаршиж байнаа. Зеленский хэлж байна лээ: Өнөөдөр Оросын байнуудын 80 гаруй хувийг дроноор устгаж байна. Дроны ихэнхийг Украинд өөрсдөө үйлдвэрлэсэн. Зөвхөн өнгөрсөн жилд дроны цохилтоор 819737 бай устгасан гэж. Украин тархи хүний махан шуурганы эсрэг ажиллаж байна. Энэ зургийг тэгж уншлаа.


№3 тайлбар. Уран дүрслэлийн хувьд тааруухан ч хэлэмж нь ноцтой. Зеленскийн хэлснийг л нотлох зураг гэх үү дээ. Давшаад ирснийг нь устгаад байхад араас нь давшуулаад л байдаг. Оросын байлдааны тактик. Магадгүй стратеги ч юм уу? Би заримдаа гайхдаг юм. Энэ Путин гэж оросын ард түмнийг хэдэн саяар нь дайны гал руу илгээж хүн амаа зориудаар хорогдуулах тусгай даалгавартай хорлогч уу гэж? “2025 оны 12 дугаар сард манай анги нэгтгэлүүд 35000 эзлэн түрэмгийлэгчийг устгаж, эсвэл хүнд шархдуулан саармагжуулсан. Афганистанд 10 жил үргэлжилсэн дайны турш Зөвлөлтийн армийн алдсан цэргийн тоо нь манайд ердөө ганцхан сарын дотор алдсан хохирлын талтай ч тэнцэхгүй” гэж Зеленский хэлж байдаг шүү.


№4 тайлбар. Тайлбар бараг алга. Дэлхийн II дайны үеийн Нацистын Германыг ФАШИСТ гэж нийтлэг үгээр цоллодог бол одоогийн Путины Оросыг РАШИСТ хэмээн цоллож байна. Хийсэн үйлдэл нүгэл нь адил. Бусдын газар нутагт шунан эзлэн түрэмгийлэх дайн хийж байна. Фашистуудын үйлдсэнийг рашистууд давтаж байна.


№5 тайлбар. Оросын сөрөг хүчнийхний сошиалд цацсан плакат гэхээр юм даа. Хожим түүхийн өмнө Путиныг буруутгах тодорхойлолт энд бичигджээ. Манай орос хэлтэнгүүд уншаад ойлгоосой.


№6 тайлбар. “Эрхтэн дархтанд ээлтэй эрхэм коммунизм!”. Бас л плакат. Оросууд сошиалд оруулжээ. Жаахан хэтрүүлэгтэй болохоос яг л ийм л дээ. Миний үеийнхэн андахгүй. УБ-т сүү махны очер дийлдэхгүй, бид орос дэлгүүрийн үүд сахиад харуулд нь хөөгдөөд. Нийтийн хоол, хүнсний хангамж гэж маш энгийн ба хөгийн байлаа даа. Цаашаа ахмадууд өөрсдөө сэтгэ. Доголон нулимстай нүдэндээ социализмаа нэг дурсаад ав!

 

Зураач Тодын Отгонбаяр (Лондон зураач)   

2026.01.29