Украин дахь Оросын цэргийн тусгай ажиллагаа (“СВО”) 3 жил 12 дахь сардаа (тасралтгүй 1430   өдөр шөнө) үргэлжлэх гэж байгаатай холбогдуулан мэдээллийн тэнцвэртэй байдал хангах үүднээс украины мэдээллийн UA сайтын “Страна 404” булангийн мэдээлэл, мөн Украины лидер В.Зеленский, МГИМО-гийн профессор Андрей Зубов, украины урвагч О.Царев, оросын суртал нэвтрүүлэгч В.Соловьев нарын зэрэг эх сурвалжаас хөрвүүлж сонирхуулъя. Энд sonin.mn сайтын редакцын байр суурь огт тусгагдаагүй болно.

“1418 өдөр шөнө”- анхлан Путин ба оросын цэргийн жанжнууд ингэж тооцоогүй. “Киевийг 3 өдөрт”, “нийт Украиныг 7 хоногт”, цаана нь запастай үсрээд 10 хоног гэж тооцож дайрч ороод цусан намагт суугаад яг 1430 хоног буюу цаг хугацааны хэмжүүрээр нөгөө Эх орны дайнаасаа давчихсан. “Киевийг 3 өдөрт” гэдэг нь шөнө байлдахгүй, гэгээн цагаан өдөр баярын маршаар танкийн цуваа маршилсаар цэцгэн хэлхээн дунд укр ахан дүүсээрээ угтуулна гэсэн фантааз нь үлгэр болсон. Чеченьд нийт 7 жил дайтсан юм чинь Украин дахь “1430” ч Путинд яамай байнаа!  

Орос блогероос. Хэрэв Орос Ираныг алдах аваас Оросын Европын хэсэг хэнд ч хэрэггүй болно. Төв Азийн орнууд ОХУ-ын нөлөөний хүрээнээс эргэлтгүй гараад алга болно. Уралын нуруунаас цаашхи Орсын дорнод хэсэг Хятадтай худалдаагаа бие дааж хийх болно. Оросыг Европт байлгаад байгаа нь ердөө ираны шахед. Түүнийгээ Украины эсрэг хэрэглэж байгаа тулдаа Орос Европт байна. Путин эдүгээ Сирид ялагдсан, Азербайжанд ялагдсан, Молдовад ялагдсан, Украинд ялагдсан, Венесуэлд ялагдсан, тун удахгүй Иран, Кубад ялагдах болно. Ийнхүү Путин лузеруудын чемпион боллоо!

Орос геополитикийн бүх төслүүдээ алдаж дуусч байгаа бол Оросын холбоотон Хятад юу алдаж байна вэ? Мөнгөн дүнгээр тооцоо гарчээ. Хятад бол зүгээр л хамаг мөнгөө гөвж дууслаа. Мөнгөний цаана тэр улсыг бүхлээр нь худалдаад авчихна гэсэн тооцоо! Си даргын өнгөн дээр Хятад нь Орост $400 тэрбумыг, Венесуэлд $65 тэрбумыг, Индонезид $50 тэрбум, Латин Америкт бүхэлд нь $118 тэрбумыг, тэр дундаа бүр Эквадор улсад $12 тэрбумыг, Африкт $60 тэрбумыг, түүний дотор зөвхөн Aнголд $7.4 тэрбумыг, Ойрхи Дорнодод $55 тэрбумыг үр дүнгүй зарцуулсан гэх тооцоо гарчээ.

Путины дайны тухай. Финландын Ерөнхий сайд асан хатагтай ярьжээ:–Украин ялж Крымээ буцааж авахад нь бид чадах бүхнээ хийх ёстой. Дайн хэзээ дуусахыг бид мэдэхгүй ч Украины ялалтаар дуусгах ёстой. Өөр сонголт байхгүй. Хэрэв Орос ялбал бид хэдэн арван жилийн турш энэ үйлдлийг давтах болно. Оросын “СВО” гэдгийн мөн чанарыг илчилсэн товч тодорхой мэдэгдэл! 

Владимир Зеленский ярьжээ:–Дайнаа Орос өөрөө хэзээ ч зогсоож байгаагүй. Тэд сайн дураараа дуусгасан дайн түүхэнд байгаагүй. Польш, Турк, Финланд, Сири, Гүрж, Абхаз, Өмнөд Осет, Чечень гээд янз бүрийн цаг үед Москвагийн эсрэг дайн хийсэн бүх улс орон, хүмүүс үүнийг нотлож чадна. Энэ жагсаалтыг цааш хязгааргүй үргэлжлүүлж ч болно, учир нь Оросын бараг бүх газар нутаг нь дайн байлдааны үр дүнд бүрэлдсэн. “Ийм л хүмүүн, ийм л улстай” бид харьцаж байна. Бид бол Украин, бид бол Европ, Америк, бүх дэлхий!

Украины лидерийн үг голд ортол мэдрүүлж байна. Оросын ийм санаархлыг Украинд яг тас цохиж байна. Бутцохих болоогүй, ямар ч гэсэн зогсоож чадлаа. Одоо амжвал нөгөө Приднестровын БНУ гэдгийг Молдовын түүхээс арчина. Цаашаа ямар ч ДНР, ЛНР, ямар ч Абхаз, Өмнөд Осет, ямар ч Крымгүй болгоно. Рашист Оросын дээрмийн анклавуудыг үгүй хийх цаг ирнэ. “Тоглоомын БНУ” байгуулан дотроос нь хагалдаг тоглоом дуусна.

Фронт дээр Кремлийн тавьсан бүх зорилт төлөвлөгөө гацаж зогслоо. Путин өөрөө тэргүүлэх чиглэл гээд байсан чиглэлүүдэд, тухайлбал Украины Покровск, Мирноград, Родинское зэрэг хотууд тэссээр байна. Европын сайн санаатнууд “Хүсэл зоригийн эвсэл”-ийн гишүүн орнууд Украинд эрчим хүчний анхан шатны туслалцаа үзүүлсээр, ОУАЭХА Запорожийн атомын цахилгаан станцад засвар хийхээр гал зогсоохыг санаачлаад, мөн украины дронууд Оросын байгууламжууд руу онилсон цохилтоо өгсөөр, энэ бүх нааштай үйл явц оросын агаарын террортой зэрэгцэн явагдсаар байна. АНУ мэдэн будилсаар, Путинд Трамп итгэл төрүүлэнгээ оросын сүүдрийн флотын бүх танкерыг газрын тостой нь хамт олзлон авах аянд мордсон. Ийм л дүр зураг ойрын өдрүүдэд харагдаж байна.

“СВО” зорилгодоо хүрлээ хэмээн шоглон оросын нэг блогер ийм зураг оруулаад жагсаалт бичжээ. Путин үнэхээр “тавьсан зорилгодоо ингэж хүрчээ” хэмээн тавлажээ. 

- НАТО-г сэргээчихжээ

- НАТО-тай хиллэдэг хилээ хоёр дахин томсгожээ

- Бүх холбоотнуудаасаа хагацжээ

- АНУ ба Европын Холбоонд $300+тэрбум алтан валютын нөөцөө алджээ

- АНУ ба ОПЕК-т нефть ба хийн зах зээлээ алджээ

- Төсвийн хямрал Оросоос салахаа байжээ

- Нефтиэ Хятадад 3/1-ийн хямд үнээр зарж байна

- Орос нь өөрөө Хятадын вассал улс болжээ гэжээ.

“СВО” явуулсны дүнд оросын 19 генерал фронт дээр алагдсан үзүүлэлтээр энэ дайн Оросын армид дэндүү үнэтэй тусч байгааг илтгэнэ гээд “Киевийг 3 өдөрт” гэдэг авантюрынх нь үнэ өртөг энэ, Афганы дайндаа (1979-1989 он) уртаашаа 3-хан генералаа (бас хоёр генерал өвчнөөр өөд болсон, нийт 5!) алуулж байсантай харьцуулбал Украины дайн гамшиг боллоо. Бие бүрэлдэхүүний амьд хүчний хохирлыг хэмжиж нэрлэж чадашгүй хэмээн орос блогер төгсгөлд нь бичжээ. 

Профессор Андрей Зубов бичиж байна. Дайнд хавтгайдаа (тотально) ялагдаж байна. Байлдааны талбарт ч, стратегийн ганц ч объект эзэлж чадаагүй; дипломатын талаар ч, Оросын холбоотнууд гэдгийг хар даа, янз бүр, Уганд ч байх шиг; геополитикийн хувьд ОХУ нь зүгээр л Хятадын хавсарга боллоо; соёл-хүмүүнлэгийн хувьд хамаг ухаантнууд нь Оросоос явчихлаа гэжээ.

Коллаборационист Олег Царев (коллаборационист–гадаадын дайсантай хамтран ажилладаг урвагчдын нэршил) гэдэг хүн хүлээн зөвшөөрч байна. Хэдийгээр Путин Украинд өөрийнх нь цэрэг байхгүй гэж худал мэлздэг байсан ч Оросын арми 2022 оноос өмнөх Донбассын бүх байлдаанд оролцож байсан, тэр үед манайд иргэний дайн дэгдээд байсан, оросын арми оролцсон операцууд хийгдсэн. Тэгж ярих юм бол Донбасс руу ОХУ-ын халдлага 2014 онд эхэлсэн. Орос худал мэлзэхээ хэзээ болих юм бол? Өмнө нь Орос ямагт няцаадаг байлаа. Одоо бол Орос оролцсон операц явагдаж байлаа хэмээн өөрсдөө хүлээн зөвшөөрч эхэлж байна, мөд няцаахаа бүрмөсөн болих биз ээ гэжээ.

Алдарт суртал нэвтрүүлэгч Владимир Соловьев бол Оростоо элэг доог болохын наахнуур байгаа нэг ёсны “цуцашгүй цагаан хоолой” юм. Кремлийн суртал нэвтрүүлэгчид нь армидаа голдоо ортол итгэнэ, итгэл нь бөхөж өгөхгүй. Оросын арми ундарч баршгүй үй түмэн зэвсэг техниктэй, бэлэн байдалд олон арван сая цэрэгтэй мэт сэтгэж дааж давшгүй, бүтэшгүй шаардлага (санал!) армидаа тавина. Нэхнэ. Шаардана. Хуучин Зөвлөлт, хожмын ТУХН-ийн бүх гишүүн орны эсрэг ОХУ-ын эрх ашгийн үүднээс “СВО” явуулахыг Соловьев ТВ-ээрээ хашгачин уриалж байгаа нь харагдав. Хуучин Зөвлөлтийн ямар ч улсад Баруун, АНУ хөл гишгээ л бол “СВО” явуулаад бай гэж уриалав. ОХУ-ын үндэсний аюулгүй байдлын номлолыг эргэж харахыг Соловьев уриалахдаа юуны өмнө Армены эсрэг СВО явуулъя, араас нь ОХУ-ын нөлөөний бүс болох бусад цэгүүдэд явуулъя, одоо бид Сири, Венесуэлыг орхиё. Харин бид хуучин Зөвлөлтийн нутагт байр сууриа алдаж хэрхэвч болхогүй. Хамгийн чухал нь тэд бол манай ойрын гадаад улсууд. Венесуэлд өрнөж байгаагаас илүү Арменд өрнөж байгаа үйл явдал бидэнд хөндүүр тусна. Арменыг алдана гэдэг маш том асуудал болно. Энэ Төв Ази дахь асуудлууд байна, бидний хувьд асар том асуудал болно. Иймд бид манай зорилго, зорилтыг маш тодорхой томъёлох ёстой. “Тоглоом дууссан шүү!” гэдгээ бид ойлгуулах ёстой. Олон улсын хууль, олон улсын дэгийг нулимах хэрэгтэй. Манай үндэсний аюулгүй байдалд хэрэгтэй гэж үзээд л бид Украины нутаг дэвсгэрт СВО ажиллагаа эхлүүлсэн шүү дээ, тэрчлэн манай нөлөөний хүрээний бусад бүсэд ч бид СВО явуулах талаар бодох цаг нь болсон. Манай нөлөөний хүрээний бүс гэж юу вэ гэдгээ үндэсний нотлолоороо дахин тодорхойлъё. Гэхдээ бүгд ойлгомжтой байх ёстой шүү–цогтой пропагандист Соловьев!

Украины нисэхийн эксперт–инженер Константин Криволап “Орешник” пуужинг дүгнэжээ. “Орешникоос бүү ай. Энэ бол зүгээр л солирын бороо гээд бодчих. Зүгээр л тэнгэрээс унаж байгаа солир. Түүнд байлдааны эд анги гэж тийм ноцтой зүйл байхгүй. Энэ бол тэнгэрээс унаж байгаа зүгээр нэг чулуу. Тэр чулуунд шинэ юм гэж нэг ч байхгүй” гэжээ. Путины аман заналхийллийн бэлгэдэл–пуужингийнх нь байж байгааг яг хэлээд тавьчихсан бус уу? “Оросын стратегийн зэвсэг гэж нэг иймэрхүү болж орхисон. Хөгжүүлээгүй, Зөвлөлт улсаас өвлөж авсан нь энэ, үлдэх ганц нэгийг нь авилгачид нь тоноод дууссан” гэж шүүмжилжээ. Суртал нэвтрүүлэгчид нь ийш тийш нь хамаа намаагүй харвахыг уриалан дууддаг, Берлин, Лондонг цөмийн пуужингаар газрын хөрснөөс арчих тухай Сергей Караганов гэх мэт. Гэтэл Криволапын тодорхойлсон нь! Шившиг онигоог ийнхүү хослуулна. 

Төгсгөлд нь НҮБ-ын Аюулгүйн Зөвлөлийн яаралтай хуралд Орос, Украины төлөөлөгчид биеэ хэрхэн авч явсныг америкийн нэг сайт дүрслэн бичсэнийг хүргэе. ОХУ-ын байнгын төлөөлөгч Василий Небензя бол уг гарлаараа украин үндэстэн бөгөөд Украин дахь Оросын дайны өнгөн дээр сүр сүлдээ бүрмөсөн үхүүлсэн, хүний нүүр харж чадахгүй, ямагт гөлөлзөж газар шагайж явдаг, дуу нь суларсан, амнаас нь гарч байгаа үг тэр бүр сонсогдохгүй, нэг үгээр амиа хорлох тухай үе үе боддог юм шиг царайтай гэжээ. Гэтэл Украины байнгын төлөөлөгч Андрей Мельник зүв зүгээр харин ч англи хэлээр Оросыг шүүмжлэнгээ “Тэгвэл оросоор хэлчихье. Та нарын стратегийн ялагдал хаяанд ирсэн. Хүүхдүүд ээ, тоглоом тун удахгүй дуусна” гэж хэлэв гэжээ.  

                                   Орос, англи хэлнээс хөрвүүлсэн Дүгэржавын Номиндарь